2 Bubsat, pakaseseg kamon dumasal nin siaaram kamo tan sisasalamat kamo. 3 Iranod rakami anamaet sa dasal moyo; idasal moyo a ibi na kumon nin Dios a pagkanawanawa komi ket maipatandaan mi a maipaꞌkaꞌ kona ni Cristo nin gindat ket kai nin nipadar. Mangkapriso ako sawanin banaꞌ ta nipata-patandaan koyna ket maituluy-tuloy ko et kumon. 4 Ket, idasal moyon maipapalaway ko konran tutawo ta siin nin talaga a matkap nin gawꞌen ko.

5 Sa pakikala-kalamoꞌ moyo konran amboꞌ nin mammemper kona ni Cristo, magkabyay kamon mapanaros. Ket, usaren moyon maong a sarban pagkanawanawa moyon mangitao nin maipaꞌkaꞌ kona ni Cristo. 6 No kiirgu-irgo kamo, matkap a say pagꞌiirgo moyo ket mabista tan makaayat. No wanin a gawꞌen moyo ket matandaan moyo a maibagay moyon iꞌbat sa siꞌnuman.

7 No ani a mampangya-pangyadiꞌ iti kongko, ipatandaan nadsen liꞌ komoyo ni Tiquico a sya mabli ya komi nin busat tamo sa pammemper. Sya, katrabahwan miyan kapagpyawan sa manꞌipagwaꞌ nan Uunuren komi. 8 Ibakiꞌ koyadsen komoyo ta pigaw nin mangibwat kona ket matandaan moyoy kapapaꞌsar mi ket no wanin, mainawnan kamo. 9 Kaaluyon naya liꞌ si Onesimo^a a saya anamaet lamang nin mabli komi nin busat tamo sa pammemper. Kapagpyawan ya. Taga yadsen sa Colosas. Sarayna liꞌ a mangibaritaꞌ komoyodsen sa sarban mampangyadiꞌ iti.

10 Mampakumustawen rakamo ni Aristarco^b nin kalamoꞌ kon mangkapriso, tan ni Marcos^c nin kapiꞌsa na ni Bernabe^d. Binibilin katamoyna maipaꞌkaꞌ kona ni Marcos. Sanꞌilyen moya liꞌ no mako yadsen komoyo. 11 Si Jesus a pinangaranan nin Justo, mampakumustawen nakamo anamaet. Sara tamoꞌ nin tulodti a Judio nin mammemper a kalalamoꞌ ko sa pangingipatandaꞌ nin maipaꞌkaꞌ sa pagꞌaadiꞌ nan Dios. Abaw a mangkaitulong ra kongko.

12 Mampakumustawen nakamo anamaet ni Epafras. Aripen nayan si Cristo a si Jesus tan taga yadsen anamaet lamang komoyo sa Colosas. Manꞌidasalan nakamon pirmi. Masuet nan manꞌidasal a sapa kumon ta si Dios paꞌgeten na a pammemper moyo kona ni Cristo tan mataros moyo kumon nin peteg no ani a rabay nan Dios nin gawꞌen moyo. 13 Maibaritaꞌ ko a seseg na para sa kaabigan moyo tan wanin et anamaet sa kaabigan ran taga Laodicea tan Hierapolis.

14 Mampakumustawen nakamo ni Lucas a syay kawaꞌnan min duktor, tan wanin anamaet kona ni Demas.

15 Iparateꞌ moyoy pammakumusta mi konran saray kalalamoꞌ tamon mammemper itaw sa Laodicea, tan kona ni Ninfa tan konran saray mammemper nin mampidudupong itaw sa bali na ta pigaw nin raywen rayay Dios. 16 No nabasa moyaynayti liꞌ nin surat nin siꞌkamon mammemper isen sa Colosas, ipaꞌwit moya konran saray mammemper itaw sa Laodicea ta pigaw nin mabasa raya anamaet. Miꞌsa kalapen moyay surat ko konradtaw ta pigaw nin mabasa moya anamaet. 17 Ibaritaꞌ moyo kona ni Arquipo^e a ituloy nan pageꞌ nin gawꞌen a naibin trabaho na a nangibwat konan Uunuren.