Ipatyoꞌ tamo a Kabibyay tamo sa say Iti sa Pudir na ni Cristo
3
Edet sawanin, mabyay kamoynan iti konan Dios ta naikalamoꞌ nakamo kona ni Cristo sin pinasubliꞌ nayan mabyay. Kanyaꞌ nin tikapen moyon pirmi a say iti sa pudir nan Dios a saytin lamang a iti sa pudir na ni Cristo, a syay mangkipagꞌuray konan Dios. 2 Ipatyoꞌ moyon pirmi a panggep moyo sa bagay-bagay a iti sa pudir nan Dios tan amboꞌ a say iti tamoꞌ sa mundo. 3 Wanin ta paꞌsar moyoyna anaod a nati no maipaꞌkaꞌ sa makaayat nin bubagay iti sa mundo. Wanin anamaet a lamang ta say peteg nin byay moyo, kai et nin naipaꞌkit konran tutawo ta naikalamoꞌ ana kona ni Cristo a itaw konan Dios. 4 Ket no ipadar naya liꞌ nin Dios konran tutawo si Cristo a kona nin naipasayay byay tamo, maipaꞌkit liꞌ a pinasyan andaꞌ nin kapapaꞌsar moyo, banaꞌ ta kiramaꞌ kamo sa sarban itaw kona.5 Banaꞌ konan siin, matkap a peteg moyon andiꞌ gapo nin byan nin lugar in say dukaꞌ a rabay moyon gawꞌen a bilang sa:
amboꞌ nin manepeg a pirararay,
mangwaꞌ nin madawal a gawaꞌ-gawaꞌ,
sunuren a makasugsog nin kaingaran,
apes nin mangwaꞌ nin dukaꞌ tan
maagom. No maagom atamo, say kayamanan tamoynay mampagꞌin nin dios tamo.
6 Andiꞌ moyo nin gawꞌen a wanin ta talagan sa sager nan Dios, dusawen nasara liꞌ a tutawon kai nin tinmulok kona ket ginwaꞌ ra in. 7 Siꞌkamo, gindat ket wanin anamaet a nipagkabyay moyo, a say pigagawaꞌ moyo ket dukaꞌ. 8 Sawanin anaod edet, gurutan moyoynay sarban dukaꞌ a gawaꞌ-gawaꞌ bilang sa pananager, pangunguraꞌ moyo sa kapada moyon tawo, paninidaꞌ nin kapadan tawo, pagꞌiirgon mabyat sa kapadan tawo tan pagꞌiirgon dukaꞌ. 9 Andiꞌ kamo nin mibulaꞌ-bulaꞌ sa saya tan saya. Wanin ta ginlat moyoynaytaw say gindat nin dukaꞌ a pitatawo moyo tan say mangibwat kona nin dukaꞌ nin gawaꞌ-gawaꞌ, 10 tan sawanin nagkamain kamoyna nin pitatawon matunong. Si Dios, inuman nay nikatawo moyo ket man-gawꞌen na nin magꞌin kamon kapada na ket no wanin, peteg moyon matandaan no siꞌno ya. 11 Ket banaꞌ sa wanin a man-gawꞌen nan Dios, kasaynan pangipurukan no Judio ya man a sayay tawo o amboꞌ; naturiꞌ ya man o kai; di-adal ya man o kai; tawon tatalon ya man o atap yan tawo; aripen man o amo. No kai edet, si Cristo, syaynaod a sangkaimpurtantiwan sa sarba tan syay pakaipurukan kontamon sarba ngaꞌmin.
12 Si Dios, piniliꞌ nakamon magꞌin nin tutawo na tan nipurok nakamo para konan diri tan kawaꞌnan nakamon tuloy. Ket banaꞌ ta wanin, matkap a peteg kamon kiingar sa kapada moyon tawo, matkap a maong kamo sa kapada moyon tawo, matkap a maayupaꞌ, mauyamoꞌ, tan mapamasinsya kamo. 13 Miaabutan kamo et sa saya tan saya. No main wadiꞌ nin nakagwaꞌ nin abas komoyo, pirdunawen moyo saran mangibwat sa pangangadoꞌ nin peteg nin kapadan nipamirduna na ni Cristo komoyo sa kukasalanan moyo. 14 Si mas impurtanti dyan sain ngaꞌmin baleꞌ ket si matkap a kawaꞌnanen moyo a saya tan saya, banaꞌ ta siin a mamipasaya nin peteg komoyo. 15 Napiliꞌ nakamon pinipasaya sa pinakalalaman na ni Cristo. Kanyaꞌ nin matkap a idalan a pikakalamoꞌ moyo nin katinekan a nangibwat kona ni Cristo. Ket, pirmi moyan kisalamatan a Dios. 16 Paararmen moyoy pakatandaꞌ moyo maipaꞌkaꞌ kona ni Cristo. Gawꞌen moyo in nin iyakay tan bibilinen moyon say maibagay konra a barang saya tan saya komoyo. Mangansyon kamo et nin nikantan susaritaꞌ nan Dios, uimno tan raruma et nin kukanta tan mangrayo kamo anamaet konan Dios nin main nin pakikisalamat sa kukanakman moyo. 17 Ket, sarban ibaritaꞌ tan gawꞌen moyo, matkap nin maikanaꞌ nin ibaritaꞌ tan gawꞌen ran saray ikon na ni Jesus, leleg nin kisalamatan moyay Dios a Ama nin ipadalan moyo kona ni Jesus.
Gawꞌen moyoy Manepeg konran saray iti sa Pammali moyo
18 aSiꞌkamon uasawan babayi, akuen moyon pagꞌurayan rakamon uasawa moyo banaꞌ ta sain a manepeg nin gawꞌen moyo ta naipasaya kamo konan Uunuren.
19 Siꞌkamo anamaet nin uasawan lulalaki, kawaꞌnanen moyo saray uasawa moyo tan andiꞌ moyo nin labasen a pakauray moyo konra.
20 bSiꞌkamon uaꞌnak, sunuren moyo saran pirmi a mangatua moyo banaꞌ ta sain a makapaririket konan Dios tan banaꞌ ta naipasaya kamo konan Uunuren.
21 Siꞌkamo anamaet nin mangatua, andiꞌ moyon tuloy nin labasen a pangipatunong konran aꞌnak moyo ta pigaw nin kai nin tumapoꞌ ana edet a nakem ra.
22 cSiꞌkamon aripen, sunuren moyo saran pirmi a amo moyo, tan andiꞌ moyo tamoꞌ nin gawꞌen a trabaho moyo no mangkaꞌkit rakamo banaꞌ tamoꞌ sa apes moyo nin magustwan rakamo, no kai edet, ipasaya moyoy kanakman moyo sa pangngawaꞌ nin gawaꞌ moyo banaꞌ sa pangingigalang mo konan Uunuren. 23 Animan a gawꞌen moyo, gawꞌen moyon sisisibulot a nakem banaꞌ ta say pagtatrabaho moyo ket amboꞌ tamoꞌ nin para sa tawo no kai edet, para konan Uunuren 24 banaꞌ ta tandaꞌ tamoyna a si Uunuren, tubaleen natamo liꞌ bilang sa nipangakoꞌ na. Wanin ta si Uunuren tamon si Cristo a tutuon mampagtrabahwan tamo. 25 Ket sara anamaet a mangwaꞌ nin abas, byan nasara liꞌ nin manepeg nin dusa ra sa kadukaan nin ginwa-ginwaꞌ ra banaꞌ ta si Uunuren, kai ya nin mamaburito.