Sinurat nayaytin surat na ni Pablo sin itaw ya sa priswan (1:7,13-14) a iparateꞌ nay pakikisalamat na konran mammemper kona ni Cristo itaw sa syudad nin Filipos, banaꞌ sa katutulong ra kona yupaꞌ sa nibi ran rurigalo tan wanin et sa kadadasal ra para kona (1:5; 4:10-19). Mataman nin naiketeg yayna nin patyen (2:17), manꞌilalwan na et a makaliwaꞌ yan lamang sa priswan ta pigaw nin maituloy na nin tulungan nasaran umaligwas sa pammemper ra (1:22-26).

Si syudad nin Filipos, iti ya sa prubinsya sa amyanan nan Grecia a mangaran Macedonia. Ket itaw sa Filipos ya nuꞌna nin sinumrep si Pablo sa nuꞌnan nipako na sa Europa, ket itaw nipatandaꞌ naya a Mabistan Patandaꞌ tan nipaꞌdeng naya a dupong ran mammemper (Ginwa-ginwaꞌ 16:6-40). Nipau-pauꞌna nayna ni Pablo konran mammemper sa Filipos a matkap nin mangitpel sara a bilang sa nipangitpel na ni Cristo tan sya nin si Pablo, a sya ket mampangitpel ya et anggan sawanin. Ket no mampangyadiꞌ anayti konra, ibilang rayti kumon nin bindisyon nin nangibwat sa pammemper ra kona ni Cristo (1:27-30).

Main nin prublimadti sa dupong ran mammemper sa Filipos banaꞌ ta saray raruma konran myimbro ket tepren ran matkap nin sumunor sa Gugan-gan na ni Moises, ta no kai, kai nin maisalba. Baleꞌ si Pablo, kai nasarayti makunsinti nin myimbro, tan nami yayna nin pammatalad konran mammemper (3:2-11). Sitin surat, napnoꞌ ya anamaet lamang nin ririket. Mataman nin itaw ya sa priswan si Pablo, maririket ya banaꞌ ta nagkamain ya nin kadunungan maipaꞌkaꞌ sa animan a kapapaꞌsar ta nadalanan nayna a sarban klasin idap, tan banaꞌ ta mapanemtem nay sarban adoꞌ a nipaꞌkit ran saraytin tutawo sa dupong sa Filipos, tan banaꞌ ta manꞌiyarunsa na nin Dios a pangingipatandaꞌ konan Mabistan Patandaꞌ yupaꞌ sa nikapriso na ni Pablo.

Ipapanemtem na ni Pablo konra a saray tutawo nan Dios ket napasaya sara kumon nin mabyay sa mabistan kapapaꞌsar (2:2; 4:2,3) tan mangisip sara nin say kaisipan ra ket bilang kona ni Cristo (2:1-11).