Ipaꞌwit miyaytin surat ko komoyodsen nin tutawo nan Dios sa Filipos a naipasaya konan Cristo a si Jesus tan lalun-laloyna konran saray mammaga komoyo tan saray kukatulungan ra.

2 Sapa kumon ta si Dios a syay Ama tamo tan si Uunuren tamon Jesu-Cristo bindisyunan rakamo tan byan rakamon mabistan kapapaꞌsar.

3 Kisalamat ako konan Catawan tamon Dios banaꞌ sa sarba ngaꞌmin nin mapanemtem ko maipaꞌkaꞌ komoyo. 4 Ket tepeꞌ nin idasalan katamo, napnoꞌ ako nin ririket 5 banaꞌ sa manꞌibi moyon tulong kongko sa pangangakay ko konan Mabistan Patandaꞌ nangibwat ana sin awro nin tinmaranaꞌ kamon mamper kona ni Jesu-Cristo angga et nin sawanin. 6 Ket, sigurado ako nin si Dios, ituluy-tuloy na a ilaꞌpos nay gawaꞌ na komoyo anggan sa awro nin sumubliꞌ ya a Cristo a si Jesus ta syay nangitaranaꞌ nin gumwaꞌ nin mabista komoyo.

7 Mabli kamo kongko, kanyaꞌ nin maibagay nin wanti a kaingaran ko banaꞌ komoyo. Nikiramaꞌ kamo ngaꞌmin sa sarba nin tulong nan Dios kongko mataman sin mangkapriso ako o sin manꞌitarigꞌen kon tutuo ya anaod a Mabistan Patandaꞌ maipaꞌkaꞌ kona ni Jesu-Cristo. 8 Tandaꞌ nan Dios nin wanin ana a iliw ko komoyo, banaꞌ ta mabli kamon tuloy kongko, kapada nin pammabli na nin Cristo a si Jesus komoyo.

9 Sya e a dasal ko konan Dios maipaꞌkaꞌ komoyo, a paalakyen na et kumon a pangangadoꞌ moyo kona tan sa sarba nin tutawo. Ket sain nin pangangadoꞌ, ipatyoꞌ nin say peteg a pakatandaꞌ tan say pangipurok nin say talagan tutuo, 10 ta pigaw nin puruten moyo ket gawꞌen moyo no ani a peteg nin matunong. Ket no wanin a mangyadiꞌ, sa awro liꞌ nin sumubliꞌ ya si Cristo, maringgas kamo tan kasa liꞌ gapo nin maitudoꞌ nin kasalanan moyo. 11 No wanin a pangangadoꞌ moyo, pamainen nan pinakabunga komoyo ni Jesu-Cristo a sarba nin mapteg sa pangingikit nan Dios. Ket banaꞌ ta wanin marayo tan mapagalangan yay Dios.

12 Bubsat, rabay ko nin matandaan moyo a nangyadiꞌ sa nikapriso ko. Imbis nin nakapaed ti kumon sa pakaipatandaꞌ nan Mabistan Patandaꞌ maipaꞌkaꞌ kona ni Jesu-Cristo, ket mas nakapaaligwas ana edet. 13 Wanin a wangko banaꞌ ta sarba ran sundaloꞌ a gwardya nan Impirador iti, tandaꞌ ra a say rason a naipriso ako ket banaꞌ ta mampagsirbi ako kona ni Cristo. Wanin et konran saray raruman tutawodti. 14 Nakapaaligwas ana edet et ta, kaꞌbawan konran kapada tamon mammemper, naꞌkit ray nagwaan nan Uunuren leleg nin iti ako sa priswan. Kanyaꞌ nin napagsen et a pagmamatalek ra kona, ket nagꞌin saran matpel tan nalamuꞌnan a suet ra nin mangiparateꞌ nin say minsahi a nangibwat konan Dios.

15 Ket anaod, main sara anamaet a amboꞌ nin matunong a gagara ra. Manꞌipatandaꞌ ra tamoꞌ a maipaꞌkaꞌ kona ni Cristo banaꞌ ta maimbel sara kongko ket rabay rako nin daegen. Main saraytaw baleꞌ saray say gagara ra ket peteg a matunong. 16 Ket manꞌipatandaan ray maipaꞌkaꞌ konan Cristo banaꞌ ta kawaꞌnan rako tan banaꞌ ta mataros ra nin nikwa nakodti nin Dios ta pigaw nin maiꞌdeng koyay Mabistan Patandaꞌ maipaꞌkaꞌ konan Cristo. 17 Sara in baleꞌ saray raruma anaod, say gagara ra nin mangipatandaꞌ nin maipaꞌkaꞌ kona ni Cristo ket amboꞌ nin matunong. Mampangapes sara tamoꞌ nin pakairaywan ra nin bukod. Manꞌipaꞌkaꞌ ra a malamuꞌnan ray idap a manꞌirangep kodti sa priswan no matandaan koy kaaadilanta nin trabaho ra. 18 Wanin man, sarain saray mampangipatandaꞌ nin maipaꞌkaꞌ kona ni Cristo, abas man o matunong a gagara ra, kasa nin kwinta kongko dapot no maipatandaan a maipaꞌkaꞌ kona ni Jesu-Cristo. Maririket ako et a lamang no wanin!

19 Anaod, maririket ako lawas. Wanin ta tandaꞌ ko a say sarba nin mampangyadiꞌ kongko, say piratꞌanan liꞌ ngaꞌmin ket sa kaabigan ko.^a Mangyadiꞌ in banaꞌ sa pangingidasal moyo kongko tan sa panunustini nan Ispirito nin nibakiꞌ na ni Jesu-Cristo. 20 Ilalo tan apes ko nin tuloy a kai ako kumon gapo makagwaꞌ nin animan a kadingꞌeyan ko kona ni Cristo. Say apes kon pageꞌ ket si lawas a matpel ako, laloyna sa saytin pangingirangep ko ta pigaw nin siꞌko, mataman nin mati o mabyay ako man, mapagalangan koya si Cristo sa intiron byay ko.

21 Wanti ta no para kongko, say gagara kon mabyay iti sa lutaꞌ ket para tamoꞌ kona ni Cristo, tan no mati ako, syay kaaadilanta ko. 22 Baleꞌ no tumuluy-tuloy ako et nin mabyay, gawꞌen ko et a no ani a maabig. Ani baleꞌ a pageꞌ a rabayen ko, si mabyay ako et o mati akoyna? 23 Man-gulwen akon sayti. Rabay koynan tuloy a kisyay konan siti nin byay ta pigaw nin makakikalamoꞌ akoynadtaw kona ni Cristo ta siin a sangkabistawan para kongko. 24 Baleꞌ impurtanti nin tuloy a mabyay ako et ta matkap moyoko et. 25 Anaod, banaꞌ konan siin, sigurado ako nin kai rako et nin patyen. Ket, maituluy-tuloy koy pakikalamoꞌ ko komoyo ngaꞌmin ta pigaw nin matulungan katamo et nin umaligwas a pammemper moyo tan mas et a ririket moyo nin mampagmatalek konan Cristo. 26 Ket, no makaliwaꞌ akodti, sa pakasubliꞌ kodsen liꞌ komoyo ket peteg a lalon marayo ya a Cristo a si Jesus.

27 Edet, peteg kumon nin maibagay a kabibyay moyo sa ginwaꞌ na ni Cristo para komoyo sigon konan Mabistan Patandaꞌ. No wanin, makapikaꞌ akodsen man komoyo o kai, say matandaan ko ket mandumaer kamo sa sayan-sayay gagara sa kabibyay moyo. Matandaan ko et a napasaya kamo nin sigegsen nin mamper a naipatukdoꞌ konan Mabistan Patandaꞌ 28 nin kasa gapo nin liꞌmo konran sarain saray mampanguntra komoyo. Oꞌ, ta say pagkakabyay moyo konan Cristo nin wanin, mangipaꞌkit konra a madaeg sara, ket siꞌkamo, manalo kamo. Si Dios, gawꞌen nan wanin. 29 Andiꞌ kamo nin maliꞌmo ta mangibwat sa kamaungan na ket binyan nakamon pagkanawanawan magmatalek kona tan anamaet, nin pagkanawanawan mangirangep nin pakapadyaꞌdyaꞌ ta pigaw nin umaligwas a gagara na ni Cristo. 30 Ket kapada katamoyna nin mangkilaban para konan Cristo. Anaod, naimatunan moyo a ginwaꞌ ko sin saytaw tan marnge-marngeꞌ moyo a man-gawꞌen ko et anggan sawanin.