Matkap a say Kanakman tamo, Kipada sa Kanakman na ni Cristo
2
Sawanin, mangkumsaw a nakem moyo banaꞌ kona ni Cristo, tan manliwaliwawen kamo nin pangangadoꞌ na. Naikalamoꞌ kamo kona nin Ispirito nan Dios, ket maadoꞌ kamo tan mangkiingar kamo sa saya tan saya. 2 Edet anaod, banaꞌ ta wanin moyo, pasibuluten moyo pa a ririket ko mangibwat sa napasaya nin pangingisip moyo tan sa peteg nin pangangawaꞌnan moyo sa saya tan saya. Napasaya pa kumon a gagara moyo a bilang nin sayay tawo kamo tamoꞌ. 3 Andiꞌ kamo nin gumwaꞌ nin animan nin say apes moyo ket para sa lalaman moyon diri tamoꞌ, o ta pigaw nin pasirayo kamo tamoꞌ. No kai edet, mipaayupaꞌ kamo, ket ibilang moyo saran mas ataꞌgay dyan siꞌkamo a kapada moyon tawo. 4 Pagawan moyo anamaet a kaabigan ran kapada moyon tawo amboꞌ a kaabigan moyo tamoꞌ nin bukod. 5 Wanti e a pangingisip nan si Cristo a si Jesus, ket matkap a magꞌin anamaet nin wanti a pangingisip moyo:6 Si Cristo, mataman no iti nin pirmi kona a kinaDios,
kasa sa pinanakem na a ipaseꞌseꞌ na a sya kapada nayay Dios.
7 No kai edet, nangibwat nin mismo sa nakem na,
liningwanan nay karabayan nan diri tan pinaaripen ya.
Ket nagꞌin yan kabakas-bakas ran tutawo
tan naimatunan nin mapalaway a tawo ya.
8 Ket nituluy-tuloy nan pinaayupaꞌ a kadiryan na a tinmulok ya konan Dios.
Saytin katutulok na, ket nangangga sa patiti
tan lalo et sa kadingꞌeyan sa nikaipasak na sa kudos.
9 Ket banaꞌ sa sain nin katutulok na, si Dios,
pinataꞌgay naya nin tuloy
ket nibi naya kona a titulo a sangkataꞌgayan sa sarba.
10 Ginwaꞌ na in ta pigaw nin say sarba ngaꞌmin,
itaw sara man sa langit o iti sara sa lutaꞌ, o itaw sara sa rarem nin lutaꞌ sa kamiꞌnan ra nin nati, ket
manalimukod saran sumukoꞌ kona ni Jesus
11 tan ta pigaw nin say sarba ngaꞌmin ket,
alilbien ra a si Jesu-Cristo syay Uunuren.
Ket mangkarayo ya a Dios a Ama konan siin.
Say Gugawaꞌ a Matkap nin Suetan tamon Magwaꞌ
12 Ket mangibwat anaod konan siin a ihimplo ni Cristo, mampablyen kon bubsat, mas masuet kamo et kumon nin tumulok sawanin ta adayoꞌ ako komoyo dyan sin isen ako komoyo. Siꞌkamo, akuen moyo nin sililiꞌmo a rispunsibilidad moyo nin pangibwaten a pakapasibulot nin pakaisalba moyo. 13 Wanin ta kalamoꞌ moya man layi nin pirmi a Dios, ket sya a mampangibwatan nin karabayan moyo tan nin pakababaꞌ moyo nin gumwaꞌ nin mabistan karabayan na.
14 Gawꞌen moyo a sarba nin gawꞌen moyo nin andiꞌ kamo nin bere-bere o misasangkinian 15 ta pigaw nin kasa gapo nin kadukaan komoyo tan kasa nin pamalawan komoyo. Ket maꞌkit a aꞌnak nakamon Dios nin kasa anaod nin maiparsan dukaꞌ komoyo abirno iti kamo sa busel ran amboꞌ nin matunong tan maraet nin tutawo. Banaꞌ sa wanin, magꞌin kamon mammimin palaway konra a bilang kamon maslag a bituen itaw sa taꞌgay 16 leleg a manꞌiyuprisi moyay Saritaꞌ nin siti a ibwatan nin byay a anggan-angga nin iti konan Dios. Ket no gawꞌen moyo in, siꞌkamo liꞌ a puon nin ririket ko sa awro nin sumubliꞌ ya si Cristo. Siꞌkamo liꞌ a pakaꞌkitan a say pagal ko ket kai nin naꞌmet a kakanaan.
17 Say pagmamatalek moyo tan pagsisirbi moyo konan Dios ket bilang nin pangingidaꞌton kona. Ket abirno wadiꞌ nin matkap a paturuen ko et a dayaꞌ ko nin kalamoꞌ a daꞌton moyo, maririket ako tan itao katamo sa ririket ko. 18 No wanin, siꞌkamo, maririket kamo kumon anamaet tan itao rako pa anamaet sa ririket moyo.
Main nin Sayay Ibakiꞌ Para sa Ikaririket ran itaw sa Filipos
19 Sawanin, no iyaburoy na ni Uunuren tamon Jesus, mampilalo ako nin maibakiꞌ koyadsen komoyo sa amboꞌ anan maꞌteng si Timoteo. No wanin, maipatandaꞌ na kongko a kapapaꞌsar moyo ket siꞌko anamaet a mapaririket. 20 Kal-la sya tamoꞌ a kalamoꞌ kodti nin peteg nin mapaga maipaꞌkaꞌ sa kapapaꞌsar moyo kapada nin pammaga ko sa kapapaꞌsar moyo. 21 Kal-la sya tamoꞌ, banaꞌ ta saray raruma ket say para sa kaabigan ran diri ana tana a manꞌasikaswen ra tan kasaynan pangangasikaso ra sa no paꞌno ra nin magwaꞌ a karabayan na ni Jesu-Cristo. 22 Tandaꞌ moyo anamaet ana nin peteg a pigagawaꞌ na ni Timoteo. Tinmulong ya kongko nin baraꞌmon anak ko sa nipangipatandaꞌ ko nin maipaꞌkaꞌ kona ni Jesu-Cristo. 23 Ket saytaw liꞌ no mapiho koyna no ani a piratꞌanan kodti sa priswan, sya a ibakiꞌ kodsen nin tampor komoyo. 24 Manꞌilalwan ko anamaet a iyaburoy nan Dios a sa amboꞌ nin maꞌteng ket makapikaꞌ akodsen a lamang nin mismo komoyo.
25 Anaod sawanin, naisip ko a mabista layi no pasublien koyaynadsen komoyo si busat tamo sa pammemper a si Epafrodito. Nibakiꞌ moyadti nin tumulong kongko tan napagsirbyan nako sa nipangalap nan lugar moyo. Kalamoꞌ koya nin mampangipatandaꞌ konan Mabistan Patandaꞌ tan mampangiꞌdeng konan siti konran saray kuntra. 26 Pasublien koyaynadsen komoyo banaꞌ ta mailiw yaynan tuloy. Mapaga ya nin natandaan moyon nagmasakit ya. 27 Pageꞌ a nagmasakit ya nin grabi tan dandani ya nin nati. Baleꞌ sa ingangaꞌdo nan Dios kona ket inmandaꞌ yayna. Iningangaꞌdo nako anamaet lamang nin Dios banaꞌ ta no nati ya kumon si Epafrodito, nalamuꞌnan kumon a idap nin nakem ko.
28 Sa sain a rason, mas rabay ko a sumubliꞌ yaynadsen. Wanin ta pigaw nin, no maꞌkit moya anamanaet, ket maririket kamoyna, tan ta pigaw nin mainawnan ako anamaet ana sa pakaaburido ko maipaꞌkaꞌ komoyo. 29 Kanyaꞌ nin, siririket nin risibyen moya si Epafrodito ta sya saya yan mampagsirbi konan Uunuren. Pablyen moyoy tutawo nin bilang kona. 30 Gawꞌen moyo in ta, sa nipangwaꞌ na sa animan nin nipagwaꞌ na ni Cristo, dandani ya nin nati tan nisanlaꞌ nay byay na sa nipangisakit na kongko a syay pangingisakit moyoynan lamang kongko ta kasa kamodti.