Ipamuspusan nin Liso yan Makatandaꞌ si Cristo
3
Ket sawanin, bubsat, siti a ibaritaꞌ ko komoyo: Rumiriket kamo banaꞌ sa sarban ginwaꞌ nan Uunuren tamon si Jesu-Cristo.Kai ako nin sumawaꞌ nin umanen ko anamanaet nin isurat komoyo a nibaritaꞌ koyna intaw, ta no rengꞌen moyoyti anaod ket maiyilag kamo. 2 Pakailag kamo konran saray tutawo nin baraꞌmo saran uaso nin makapasalak; sarain, ipasuet ray dukaꞌ a gawaꞌ tan say pannuriꞌ a amboꞌ nin matunong para konan Dios, no kai manugat-sugat sara tamoꞌ. 3 Adalen moyo anaod nin maong a amboꞌ sarain, no kai, siꞌtamo nin mammemper konan Cristo a peteg nin maipurok a baraꞌmon turiꞌ. Wanin ta siꞌtamo, raywen tan pagsirbyan tamoyay Dios sa panunulong na kontamo nin Ispirito na. Siꞌtamo et ket ipasirayo tamoy maipaꞌkaꞌ konan Cristo a si Jesus. Siꞌtamo et a lamang ket kai atamoyna nin milalo sa matunong a gawaꞌ nin ipagwaꞌ nin Gugan-gan ta pigaw nin akuen natamon Dios. 4 Oꞌ tutuo in. Wanin man, siꞌko, main nin puon kon milalo a ikwinta akon matunong nin ipatukdoꞌ sa Gugan-gan. No main nin mampangipaꞌkaꞌ a maisalba nan diri a lalaman na, mas alaki a rason kon mangipaꞌkaꞌ nin wanin.
5 Tinuriꞌ ako sin ikawalon awro ana nangibwat sin naiyanak ako sigon sa ipagwaꞌ nin Gugan-gan. Puro akon Israelita. Puri nako ni Benjamin. Ugaliꞌ ran Hebreo ngaꞌmin a sarban naimatawan ko. No maipaꞌkaꞌ sa panunumbok sa Gugan-gan, Pariseo ako ket ginwaꞌ ko ngaꞌmin a sarban ipagwaꞌ. 6 Ket sa suet ko, ginwaꞌ koy anggawan nin mababaꞌ ko angga et sa dinuksa-duksaꞌ kosaray pinipapasaya nan Dios konan Cristo. No say pagꞌirgwan ket say pagꞌin nin mapteg nin ipatukdoꞌ sa Gugan-gan, kasan pakabalawan ko nin animan.
7 Baleꞌ sawanin, nasilyan ana in banaꞌ kona ni Cristo. Sain nin maadilanta nin byay ko sin nuꞌna, sain a lamang ket nibilang koynan kasan sirbi. 8 Oꞌ peteg anaod, manꞌibilang koyna nin kasa gapo nin kwinta a sarba ngaꞌmin no ikumpara sa kabistawan a natandaan koya a Cristo a si Jesus a syay Uunuren ko. Banaꞌ kona, sarban ginwa-ginwaꞌ kon nibilang kon maabig sin saytaw, nibilang koynan kasan kakanaan tan baraꞌmon basura nin nitampal koyna. Ibilang kon wanin ta pigaw nin magaꞌmuran koy gun-guna sa ginwaꞌ na ni Cristo 9 tan maꞌkit ana a naipasaya ako kona. Sa wanin anaod, napapteg akoyna banaꞌ sa pagmamatalek ko kona ni Cristo, amboꞌ gapo nin banaꞌ sa katutumbok ko sa Gugan-gan, ta nikwinta natamon Dios nin mapteg banaꞌ ta mampagmatalek atamo sa ginwaꞌ na ni Cristo. 10 Oꞌ say rabay ko anaod, ket si liso koyan makatandaꞌ si Cristo. No wanin, makakiramaꞌ ako sa pakayadiꞌ na nin magkuri sa nisusubliꞌ nan mabyay tan makakiramaꞌ ako et sa pangingirangep na nin idap angga nin say pinanakem ko, magꞌin nin bilang sa pinanakem na sin tinmulok yan mati. 11 Sain a rabay ko ta no wanin ket mailalwan kon pasublien nako liꞌ nin mabyay nin Dios.
12 Kai ko nin rabay nin ibaritaꞌ a liso koyaynan katandaꞌ o a kasayna nin pagkurangan ko. Baleꞌ say man-gawꞌen ko ket si manꞌipamuspusan kon talagan magꞌin wanin ta siin a rabay nan mangyadiꞌ nin si Cristo a si Jesus sin ginwaꞌ nakon magꞌin nin ikon na.
13 Bubsat, pageꞌ a kai ko et narateꞌ in. Baleꞌ, si man-gawꞌen ko ket, say nayadiꞌ koyna nin nagwaan, kai koyna mampanemtemen, ana edet, manꞌiꞌpos koy pakababaꞌ ko nin gumwaꞌ para sa adapen et ta pigaw nin magaꞌmuran ko in. 14 Mantumuluy-tuloy akon gumwaꞌ, a bilang nin mangkilumbaꞌ akon malayo. Malayo akon ratꞌen koyay peteng, ta pigaw nin magaꞌmuran ko a primyo nin nisadyaꞌ nan si Cristo a si Jesus, nin manꞌisagyat na nin Dios nin pangitaꞌgay na kontamo.
15 Wanin a matkap a iti sa kaisipan tamo, siꞌtamo nin kustoynay pinanakem no maipaꞌkaꞌ konan Cristo. Baleꞌ ipataros nan Dios no ani a manepeg konran saray raruma komoyo a say pangingisip ra ket naiduma sa animan sa sayti. 16 Si matkap a tuloy sawanin ket si ibagay tamon pirmi a kabibyay tamo sa katutuꞌwan nin manꞌipatarusan na kontamo nin Dios.
Arigen a Pigagawaꞌ ran saray Tutuon Nibakiꞌ
17 Bubsat, mipapasaya kamon mangarig sa pigagawaꞌ ko tan adalen moyoy pigagawaꞌ ran raruma nin kipaday pigagawaꞌ ra komi. Arigen rakami 18 ta awaꞌ a lamang nin kai moyo sara maarig a raruma a man-gawꞌen ran kasan kakanaan a pipaꞌkaan nin patiti na ni Cristo sa kudos. Abaw saray wanin. Nibaritaꞌ koynayti intaw komoyo nin niꞌnu-niꞌno baleꞌ ibaritaꞌ ko anamanaet sawanin nin tumuroꞌ a lwaꞌ ko sa bereng banaꞌ sa man-gawꞌen ra. 19 Sarain nin tutawo, kasa liꞌ nin raruman pangikaan konra no kai sa impyirno. Say mampagꞌuray sa byay ra ket, say karabayan nin lalaman ra. Ipasirayo ray gawaꞌ-gawaꞌ ra nin sukat kumon nin ikadingꞌey ra. Say byay ra tamoꞌ iti sa lutaꞌ a mampanemtemen ra. 20 Andiꞌ moyo sara nin arigen ta siꞌtamo, si peteg nin piikapan tamo ket itaw sa langit. Ket masulit atamon mantumaꞌgan sa isusubliꞌ nan mangisalba kontamo nin mangibwat itaw a sya si Uunuren a Jesu-Cristo. 21 Sya, silyan nayti liꞌ nin makapoy tan mati nin lalaman tamo a gawꞌen na nin bilang sa pinasyan andaꞌ nin lalaman na. Gawꞌen na in ta main nin pakayadiꞌ na a magwaꞌ nan ikwa a sarba sa pakauray na.