4
Bubsat ko, mailiw akon tuloy komoyo. Mabli kamo kongko. Mampaririketen rako tan baraꞌmo nin siꞌkamo a primyo ko sa pagtatrabaho ko. Ket maitukoy sa nipapalaway ko komoyo, dumaer kamon kikalamoꞌ konan Uunuren tamon Jesus.Bibilin a Mitutuno sara nin Iti sa Dupong
2 Dawaten ko komoyo, Euodia tan Sintique, midunong kamo kumon nin katutulok moyo konan Uunuren a nakaipasayawan moyo. 3 Ket siꞌkadsen, siꞌkan peteg nin katrabahwan ko, tulungan mosara anamaet nin makapidunong. Gawꞌen mo in ta masuet saran nikipagal intaw kongko sa pangingipatandaꞌ konan Mabistan Patandaꞌ. Wanin a nikipagal sara anamaet kona ni Clemente tan konran raruman katrabahwan ko a say ngaran ra ket itaw sa libron listawan ran saray magkamain nin anggan-angga nin byay a iti konan Dios.
4 Ibaritaꞌ ko komoyo a rumiriket kamo nin pirmi banaꞌ ta naipasaya kamoyna kona ni Uunuren tamon Cristo. Umanen ko anamanaet nin ibaritaꞌ komoyo,
“Rumiriket kamo!”
5 Ipaingar moyoy kabistawan nin ugaliꞌ moyo sa sarban tawo banaꞌ ta sa amboꞌ ana nin maꞌteng ket sumubliꞌ yayna si Uunuren tamon Cristo. 6 Andiꞌ kamo gapo nin aburido maipaꞌkaꞌ sa animan. No kai edet, idasal moyon dawaten nin napaaluyunan nin pakikisalamat konan Dios a sarban matkap moyo. 7 Ket no gawꞌen moyo in, si Dios, pamainen nay katinekan sa kabibyay moyo a kai gapo nin masukat nin kaisipan nin tawo. No wanin anaod, masustini na in a katinekan nin kanakman moyo banaꞌ sa nikaipasaya moyo konan Cristo a si Jesus.
8 Kalansuyutan, bubsat, pitutunwen moyon ipatyoꞌ a kaisipan moyo sa sayti:
say tutuo, say pakapꞌunan nin pangingigalang, say matunong, say kasan sukat nin pakabalawan, say bubagay a makapaririket, say manepeg nin maipasirayo. Dalepdepen moyon pirmi nin kasan tegen a say maabig tan say manepeg a sukat nin marayo. 9 Ibyay moyo a naadal moyo sa kabibyay ko, say naimatunan tan say narngeꞌ moyo kongko.
Ket no gawꞌen moyo in, si Dios a syay puon nin pitutuno, kalamoꞌ moyan pirmi.
Kisalamat ya konran Taga Filipos si Pablo sa Tulong ra
10 Sa nikaipasaya ko konan Uunuren tamo, pinasyan tuloy nin ririket ko a mayadiꞌ nin linmabas a anron panaon sin natulungan rako intaw, ket sawanin mantulungan rako anamanaet. Anaod, tandaꞌ kon pagawan moyo kumon a matkap ko baleꞌ kasa tamoꞌ nin pagkanawanawa moyo nin makatulong kongko. 11 Sapa kumon ta mataros rako! Kai ako nin mamarnge-parngeꞌ banaꞌ sa pakatkapan ko ta naadal koyna a magꞌin nin mapdaꞌ sa animan a kapapaꞌsar ko. 12 Dinalanan koyna a kapapaꞌsar nin kasa-kasa tan dinalanan koyna anamaet a magsubra-subra. Nagkamain ana kongko a kadunungan maipaꞌkaꞌ sa animan a kapapaꞌsar. Ket kuntinto ako, mangkakusto man a pangangan ko o mangkabitilan ako. Wanin et a lamang no main o kasa man a matkap ko. 13 Sa sarba ngaꞌmin nin kapapaꞌsar, main nin pakababaꞌ ko banaꞌ ta si Cristo a mampami nin siin kongko. 14 Wanin man, aninay andaꞌ nin nipanulong moyo kongko sa kaidapan ko.
15 Peteg anaod, siꞌkamo nin isen sa Filipos a nakatandaꞌ nin peteg sa kapapaꞌsar ko sin linmakwan akodtaw sa Macedonia intaw sin nitaranaꞌ koya tamoꞌ nin nipatandaꞌ a Mabistan Patandaꞌ. Siꞌkamo tamoꞌ isen sa dupong nin mammemper a naranod sa gastos tan nakakiramaꞌ sa bunga nin sain nin nipangipatandaꞌ ko. 16 Ket mataman et sin itaw ako sa Tesalonica, pinaꞌwitan rako nin nirwa nin tulong moyo kongko. 17 Kisalamatan ko, baleꞌ amboꞌ a say mangrisibi tana nin pirmi a manꞌapesen ko, no kai edet, say manꞌapesen ko ket si gun-gunawan nakamo nin Dios banaꞌ sa sain a tulong moyo kongko.
18 Ket, narisibi koyna a sarba. Sawanin, banaꞌ sa malaem nin tulong moyo kongko nin awit na ni Epafrodito, kai ana nin mampagkurang a nagsikabarang nin matkap ko. Masurok et pa et. Ket sain nin tulong moyo kongko, amboꞌ tamoꞌ nin para kongko, no kai edet, para konan Dios anan lamang ta sain, ket baraꞌmon sangkaandaan nin daꞌton nin maakoꞌ nan Dios tan makapaririket kona. 19 Ket si Dios nin mampamaga kongko, a syay main nin ikon nin kai masukat nin kayamanan, sya a mami nin masurok nin sarba ngaꞌmin nin matkap moyo banaꞌ konan si Cristo a si Jesus.
20 Ket, itandudoꞌ ya anggan-angga a ngaran nan Dios a syay Ama tamo.
Peteg a wanin.
Patanid ya si Pablo
21 Iparateꞌ moyoy pammakumusta ko konran sarba ran tutawo nadsen nin Dios banaꞌ ta nipatukdoꞌ ra a byay ra konan Cristo a si Jesus. Wanin anamaet sa pammakumusta ran bubsat sa pammemper nin kalalamoꞌ kodti.
22 Mampakumustawen rakamo anamaet nin sarba ran tutawo nan Dios iti, lalun-lalo saray mampagsirbi konan Impirador.
23 Rumateꞌ kumon komoyo ngaꞌmin a bindisyon na ni Uunuren a si Jesu-Cristo.