Siti si Colosas saya ya sin saytaw nin impurtantin syudad sa bandan baytan nan prubinsyan Asia. Sin saytaw mantawagen yayti nin “Alakin Syudad nan Prygia”. Baleꞌ, sin tyimpo na ni Pablo, daiteꞌ ya tanan syudad ta sa kaꞌtengan ket nagꞌin nin amboꞌ nin bilang gindat a kayamanan na ket nadaeg nayan syudad nin Laodicea, a siti itaw ya sa panrupan na, tan wanin na anamaet nin si syudad nin Hierapolis a iti sa amyanan nin panrupan na. Itaw yaynamaet sa bandan panrupan na a syudad nin Efeso.

Si Pablo, kai ya et gapo nin nakapikaꞌ sa Colosas, baleꞌ napaririket ya nin say natandaan na a saray mammemper itaw ket matarigꞌen sara sa pammemper ra tan main nin pangangadoꞌ ra konran tutawo nan Dios (1:3-6). Narngeꞌ raya a Mabistan Patandaꞌ nin nipatandaꞌ na konra ni Epafras a sayay tagadtaw (1:7; 4:12,13). Sin sinurat naya baleꞌ tin surat ni Pablo kalamoꞌ naya si Epafras nin mangkapriso (Filemon 1:23).

Abaw sara konran myimbro sa dupong ran mammemper sa Colosas a amboꞌ nin Judio (1:27). Niꞌsa, main anamaet nin rinmateꞌ itaw nin saray mangangakay nin amboꞌ nin kusto. Ket saraytin tutawo, ginulo ray isip ran paꞌsar malagoꞌ et nin mammemper. Kanyaꞌ nin saray raruma konra, naayat sara sa sakalakon kaugalian tan kaisipan a maipaꞌkaꞌ sa tepre-tepren ra (2:16-23). Manꞌiyakay ran saraytin mangangakay a say peteg kanon katutulok konan Dios, ket amboꞌ tamoꞌ a tepren ya si Cristo no kai edet, matkap a pananangkaꞌ sa lalaman tan matkap a mangrayo konran uanghil tan saray raruman uispiriton main nin pakayadiꞌ. Sin natandaan na ni Pablo nangibwat kona ni Epafras a maipaꞌkaꞌ sa saytin mampangibarang nin akay, sinmurat ya konan dupong ta pigaw nin matulungan nasaray mammemper kona ni Cristo nin tumulok sa katutuꞌwan. Rabay na nin matandaan ra kumon a si Cristo kalamoꞌ naya nin Dios itaw sa langit nin mampagꞌuray sa intiron sarban pupakayadiꞌ sa sangkamundwan (2:9-10,15) kanyaꞌ nin matkap a say pangrarayo ra ket para tamoꞌ kumon kona ni Cristo (3:1-2).