Si Surat na ni Pablo konran Taga
COLOSAS
1
Siꞌko si Pablo a sa karabayan nan Dios ket tinudoꞌ nakon apostol nan Cristo a si Jesus. Iti yan kalamoꞌ ko si Timoteoa nin busat tamo sa pammemper.2 Ipaꞌwit miyaytin surat komoyodsen nin kapada min tutawo nan Dios sa syudad nin Colosas, a mandumaer nin naipasaya konan Cristo.
Sapa kumon ta si Dios a syay Ama tamo, bindisyunan nakamo tan byan nakamon mabistan kapapaꞌsar.
Kisalamat sara si Pablo banaꞌ sa Pagmamatalek ran Taga Colosas
3 No dumasal kami para komoyo, kisalamatan miya tanan pirmi banaꞌ komoyo a Dios a syay Ama ni Uunuren tamon Jesu-Cristo. 4 Kisalamatan miya tanan pirmi a Dios nangibwat sin naiparateꞌ komi no paꞌno kamon mampagmatalek konan Cristo a si Jesus tan no paꞌno moyon manꞌipaꞌkit a pangangadoꞌ moyo konran sarban kapada moyon tutawo nan Dios. 5 Wanin a man-gawꞌen moyo banaꞌ ta mailalwan moyon gaꞌmuran moyo liꞌ a sarban nisadyaꞌ nan Dios itaw sa langit para komoyo. Say maipaꞌkaꞌ sa sain ket natandaan moyoyna sin nuꞌna sin natandaan moyoy katutuꞌwan maipaꞌkaꞌ sa pakaisalba tamo, a kasan raruma no kai si Mabistan Patandaꞌ. 6 Naipatandaꞌ yayti komoyo a kapada a naipatandaꞌ ya konran abaw anan tutawo sa saka-sakalakon lugar. Kanyaꞌ nin manꞌumabaw sara et a mamper tan mabista a man-gawꞌen nan siin sa byay ra a kapada nin say mampangyadiꞌ komoyo anggan sawanin ta nasariꞌ-sariꞌ moyon peteg a tutuon kamaungan nan Dios nangibwat sin narngeꞌ moyaytin Mabistan Patandaꞌ. 7 Siin anaod a nipatandaan na komoyo ni Epafras nin manꞌaduen min katrabahwan tan mailalwan ya sa manꞌipagwaꞌ na ni Cristo para sa kaabigan moyo. 8 Niparateꞌ na et a lamang komi a maipaꞌkaꞌ sa alakin pangangadoꞌ moyo a nangibwat konan Ispirito nan Dios konran kapada tamon mammemper.
Matkap tamon Matandaan no Siꞌno ya si Cristo
9 Siꞌkami, banaꞌ sa sain a narngeꞌ mi maipaꞌkaꞌ komoyo, nangibwat ana sin awron naiparateꞌ in komi, manꞌidasal rakamo anamaet. Manꞌidasal mi a sapa kumon ta tandaen moyon maong no ani a rabay nan Dios nin gawꞌen moyo, a say rabay nan irgwen ket si magkamain kamo nin peteg nin kadunungan tan pakataros sa kusto o abas a pammemper. 10 Manꞌidasal mi in ta pigaw nin magkabyay kamon maibagay sa kamaungan nan Uunuren ta pigaw nin magwaꞌ moyoy pirmin makapaririket kona. Ket, magwaꞌ moyoy nagsikabarang nin mabistan gawaꞌ tan lalo et nin malamuꞌnan a matandaan moyo maipaꞌkaꞌ konan Dios. 11 Kumsaw anamaet kumon a nakem moyon mangibwat sa kasan kapadan pakayadiꞌ nan Dios. Ket banaꞌ konan siin nin pakayadiꞌ, mababaan moyon itpel nin siririket a sarban rumateꞌ-rateꞌ komoyon kaidapan 12 tan kisalamatan moyay Dios Ama banaꞌ ta ginwaꞌ natamon maikanaꞌ nin kiramaꞌ sa sarban ibi na konran tutawo na nin nikwa na sa pudir nin mapalaway.
13 Si Dios, ginlat natamo sa pakaaripen nin pakayadiꞌ nin dedlem a say rabay nin irgwen, pakayadiꞌ na ni Satanas, tan sawanin si mampagꞌuray ana sa byay tamo ket si Anak na a si Cristo nin kawaꞌnan nan tuloy. 14 Ginwaꞌ na in nin Dios banaꞌ sa ginwaꞌ nan sitin Anak na a say rabay nin saritaꞌnen, napirduna atamoyna sa kukasalanan tamo.
15 Banaꞌ konan sitin Anak na, maꞌkit yan peteg a Dios a kai nin maꞌkit nin siꞌnuman.
Gindat anan manepeg a magꞌuray ya sa sarba ngaꞌmin nin pinarsa nan Dios.
16 Anaod, say sarba ngaꞌmin nin iti sa lutaꞌ tan itaw sa langit ket kona nin naipagamet a nipamarsa, wanin et sa say maꞌkit tan mataman nin say kai nin maꞌkit,
lalo saraynay kai nin maꞌkit, animan a pagꞌadian, pagꞌuuray, purok, o pakayadiꞌ ra.
Say sarba ngaꞌmin ket, pinarsa nan Anak,b nangibwat sa karabayan nan Dios ta pigaw nin sya nin Anak ket pagsirbyan ya.
17 Wanin anamaet banaꞌ ta main yaynan gindat a Anak baꞌyo nin nagkamain a animan,
tan mantumuloy nin main a sarba tan main nin uksoy banaꞌ ta sya a mampangipalalako nin sarba.
18 Sya anamaet a pangulo ran pinipapasaya nan Dios ta syay bilang ulo nan sayay lalaman tan saray mammemper, sara a bilang lalaman na
ta syay puon nin byay ran mammemper banaꞌ ta syay sangkauꞌnawan nin nanalo sa patiti.
Edet, say gagara nin sain ket, si magꞌin nin bukod na a sangkataꞌgayan sa sarba ngaꞌmin.
19 Wanin ta, karabayan nan Dios a say sarban nikaDios na ket iti anamaet konan Anak na
20 tan karabayan na et a banaꞌ sa gawꞌen nan Anak na ket, maituno konan diri nin Ama a sarba mataman no iti sara sa lutaꞌ o itaw sara sa langit.
Kanyaꞌ nin tinmuroꞌ a dayaꞌ nan Anak na a si Cristo sa kudos ket ginlat nan Dios taw say mangisyay nin say sarba kona.
Si sya a Cristo, Ginwaꞌ natamon Uamigo nan Dios
21 Siꞌkamo, gindat a kalaban moyay Dios tan ginurutan moya banaꞌ ta say pangingisip tan pigagawaꞌ moyo ket dukaꞌ. 22 Wanin man, si Dios, ginwaꞌ nakamon uamigo na banaꞌ sa patiti na sa kudos nin Anak na a si Cristo. Nisukoꞌ na ni Cristo a lalaman na nin mati sa kudos ta pigaw nin maringgasan kamo sa sarban kukasalanan moyo tan kasa gapo liꞌ nin pagkurangan moyo no iyadap nakamo konan Dios. 23 Wanin a mangyadiꞌ no ituluy-tuloy moyoy pammemper moyo konan Mabistan Patandaꞌ. Matkap a paꞌgeten moyoy pagmamatalek moyo kona ni Cristo tan ituluy-tuloy moyoy milalo sa sarban nipangakoꞌ nan Dios nin natandaan moyo sin nipatandaꞌ yay Mabistan Patandaꞌ komoyo. Oꞌ, sitin manꞌibaritaꞌ a Mabistan Patandaꞌ, naipatandaꞌ ya sa intiron mundo, ket siꞌko a si Pablo, naibin gawaꞌ ko nin pagsisirbi kona ni Cristo a ipatandaꞌ koyaytin Mabistan Patandaꞌ.
Say Nisikrito sin Saytaw ket si Cristo, Miikap yadti kontamo
24 Sawanin sa kapresan, mataman nin mampangirangep akon nagsikabarang nin idap, maririket ako et a lamang banaꞌ ta sain ket para sa kaabigan moyo. Yupaꞌ sa sain lamang, makusto ko ngaꞌmin a nipairangep na kongko ni Cristo sa lalaman ko para sa kaabigan ran pinipapasaya nan Dios a baraꞌmon sara a lalaman nan diri. 25 Si Dios, ginwaꞌ nakon katulungan ran sarba ran mamper kona tan nipudir na kongko a pammaga komoyon amboꞌ nin Judio para sa kaabigan moyo ta pigaw nin mailaꞌpos kon iparateꞌ a patandaꞌ nan Dios. 26 Sayti nin patandaꞌ nan Dios, sa leleg nin linmabas anan panaon, kai na gapo nin nipatandaan sa siꞌnuman, baleꞌ sawanin nipatandaan nayna in kontamon tutawo na. 27 Karabayan nan Dios nin matandaan tamo in si pinasyan andaꞌ nin gawꞌen na para sa sarban tutawo pati komoyon amboꞌ nin Judio. Siti ket, si Cristo, piikapen nayadti kontamo. Banaꞌ kona, mailalwan moyo a makakiramaꞌ kamo liꞌ sa pinasyan andaꞌ a iti konan Dios. 28 Maipaꞌkaꞌ kona a manꞌipatandaan mi sa sarban tutawo. Mambibilinen misara tan manꞌiyakay misaran maibagay sa barang saya tan saya konra ta pigaw nin si barang sayay naipasaya kona ni Cristo ket kasan pagkurangan na no iyadap misara konan Dios. 29 Ket, masuet ako sa pangingipatandaꞌ ta pigaw nin magꞌin nin wanin. Masulit ako anaod banaꞌ sa alakin tulong a mangibwat sa pakayadiꞌ na ni Cristo a iti kongko.