2
Anaod, rabay kon matandaan moyo a wanin anan tuloy a paga ko para sa kaabigan moyo tan para konran mammemper sa Laodicea tan para et konran sarba ran raruman mammemper isen sa raruman lugar, konran kapada moyon kai et nakaꞌkit kongko nin pirsunal. 2 Mapaga akon wanin banaꞌ ta rabay kon umget a pammemper moyo konan Dios mangibwat sa adanin tuloy a pikakalamoꞌ moyo banaꞌ sa piaaduan moyo sa saya tan saya. Rabay ko et nin magkamain komoyo a sarban kaabigan nin mangibwat sa peteg nin nikapalawayan tan pakatandaꞌ a si niyadi na yapoꞌ nin Dios sin saytaw, ket si Cristo. 3 Nakaator kona a sarban matandaan tamo maipaꞌkaꞌ sa kanakman tan kadunungan nan Dios. 4 Manꞌibaritaꞌ koyti komoyo ta pigaw nin kai kamo nin malingo nin siꞌnuman banaꞌ sa makaayat nin susaritaꞌ na 5 ta abirno kasa akodsen komoyo, pipanemtem katamo tanan pirmi tan maririket ako banaꞌ sa mabistan pikakalamoꞌ moyo tan maꞌget a pagmamatalek moyo kona ni Cristo.Si Cristo, Syay Uunuren tamo
6 Inakoꞌ moyay akay a si Jesus ket syay Criston Uunuren. No wanin edet, matkap a magkabyay kamon kumpruntado sa karabayan na. 7 Baraꞌmon kayon nakayamot anan ararem, wanin anamaet a ituluy-tuloy moyoy magmatalek kona ni Cristo a bilang sin inakoꞌ moya, tan peteg a magkabyay kamo et kumon nin maibagay sa niyakay nin gawꞌen moyo, tan mas paꞌgeten moyo et a pangingilalo sa niyakay komoyo. Matkap a kisalamatan moyan pirmi a Dios banaꞌ sa kaabigan nin iti kona ni Cristo.
Andiꞌ Kamo nin Magꞌin nin Tumutumbok ran Raruma
8 Pakailag kamon kai kamo nin mataktika nin siꞌnuman nin magꞌin kamon tumutumbok na yupaꞌ sa manꞌiyakay nan baraꞌmon matunong a uakay nan Dios, baleꞌ sayti ket bulaꞌ-bulaꞌ tan kasan kabalikasan banaꞌ ta tinawir ti tamoꞌ nin uakay tan gugan-gan nin maipaꞌkaꞌ sa gawaꞌ-gawaꞌ tamoꞌ. Kumuntrayti sa akay nin maipaꞌkaꞌ kona ni Cristo.
9 Pakailag kamo sa sain banaꞌ ta say tutuo ket, iti sa lalaman na ni Cristo a sarban nikaDios nan Dios. 10 Wanin anamaet, banaꞌ sa nikaipasaya moyo kona ni Cristo, say sarban main kona ket main ana komoyo anamaet. Syay magꞌuray konran sarban main nin pakauray iti sa lutaꞌ tan itaw sa langit. 11 Banaꞌ et sa nikaipasaya moyo kona, nangyadiꞌ komoyo a sayay pakaꞌkitan a tutawo nakamo nin Dios. Siin nin nangyadiꞌ ket bilang anan lamang nin nikaturiꞌ, baleꞌ amboꞌ nin gawaꞌ nin tawo, no kai edet, gawaꞌ na ni Cristo ta ginlat na a dukaꞌ nin pitatawo moyo a bilang nin tinuriꞌ nakamo, 12 ta baraꞌmo kamon naikitabon kona ni Jesu-Cristo sin nipabawtismo kamo, tan baraꞌmo kamo et a lamang nin naikalamoꞌ nin sinmubliꞌ nin mabyay kona ni Cristo. Wanin a nangyadiꞌ komoyo banaꞌ ta nagmatalek kamo sa pakayadiꞌ nan Dios a syay namasubliꞌ nin mabyay kona ni Cristo.
13 Siꞌkamo, gindat ket makasalanan kamo tan kasa ya komoyo a marka a ikon nakamon Dios, ket no maipaꞌkaꞌ sa rilasyon moyo kona, nati a paꞌsar moyo. Baleꞌ sawanin, si Dios, naikalamoꞌ nakamoyna kona ni Cristo sin pinasubliꞌ nayan mabyay ket mabyay kamoyna. Pinirduna na mangibwat sa pangangadoꞌ a ngaꞌmin nin kukasalanan tamo, 14 ket sawanin, laspingen nayayna nin Dios a listawan nin dimanda na kontamo. Dusawen natamoyna kumon baleꞌ ana edet, nikipasak naytin dimanda kontamo kona ni Cristo sa kudos, kanyaꞌ nin kasaynan puon nin madusa atamo. 15 Ginlat na et nin Dios a pagꞌuuray ran uispirito tan saray main nin kapangyadian ket niparayoa na sa sarba a kasaynan pakayadiꞌ ra ta tinalo nasara banaꞌ sa ginwaꞌ na ni Cristo.
16 Ket banaꞌ ta wanin, bubsat, andiꞌ moyo sara nin rengꞌen in saray manita komoyo maipaꞌkaꞌ sa pangangan tan pinnom moyo tan say kai moyo nin paninilibra sa tinaon, binulan, tan lininggo nin pista ra. 17 Sain nin bubagay ket naibi sin nuꞌnan panaon nin baraꞌmon alina nan si rumateꞌ et. Baleꞌ rinmateꞌ yayna, sya si Cristo. 18 Andiꞌ moyo sara nin rengꞌen in saray manita komoyo nin wanra ket kai kamo kano nin mampiayupaꞌ nin mangrayo a bilang konra. Manꞌibaritaꞌ ran matkap sara kanon pagdibusyunan a uanghil. Sarain nin tutawo ibaritaꞌ ra a nipaꞌkit kano konran diri a maipaꞌkaꞌ sa sayti sa sayay baraꞌmon taynep. Baleꞌ mangkalingo sara tamoꞌ nin mampangipaꞌkaꞌ a ataꞌgay sara ta say mampangibwatan nin kukaisipan ra ket say pangingisip ra bilang tawo tamoꞌ. 19 Nikisyay saran bukod konan si pinakaulo tamo a si Cristo, a sya, patubuen nayay pinakalalaman na sigon sa karabayan nan Dios. Sa pangipalalako na kontamon pinakalalaman na, unungen nasaray parti na tan sustintwen na ta napasaya saran nigagalet.
20 Banaꞌ ta naipasaya kamo kona ni Cristo a nikwinta kamoynan naranod nin nati kona, nailibri kamon paisirong sa gugan-gan nin maipaꞌkaꞌ sa gawaꞌ tamoꞌ. Baleꞌ mayin a say pigagawaꞌ moyo ket kapada et a lamang nin pigagawaꞌ ran tutawon kai et nin nakaalilbiꞌ kona ni Cristo? Oꞌ a, ta mantumbuken moyo a uakay ra a wanra, 21 “Andiꞌ kamo nin mangan nin wanti e! Andiꞌ kamo nin manaway, o mangudit nin wanti e!” 22 Sain nin uakay ra ket nangibwat tamoꞌ sa nakem nin tawo. Sain say iyawaꞌ ra, bilang say kanen, ket main nin anggawan nin pakausar. 23 Oꞌ a, sain say manꞌiyakay ra a matkap tamo kano a magdibusyon, a mipaayupaꞌ atamo, tan matkap nin paidapen tamoy lalaman tamo, no kai ti nin amingawen nin maong, baraꞌmon kusto. Baleꞌ say katutuꞌwan, amboꞌ nin kusto, ta sa sain, kasa gapo nin magwaꞌ ta pigaw nin madangkaan tamoy lalaman tamon diri sa karabayan nin mangwaꞌ nin dukaꞌ.