6
aSiꞌkamon uaꞌnak, sunuren moyo saray mangatua moyo banaꞌ ta naipasaya kamo konan Catawan, ket siin a manepeg moyon gawꞌen. 2 Wanin ta si uꞌnan Gan-gan nin main kalamoꞌ nin pangakoꞌ ket wana, “Igalang ma a ama mo tan ina mo 3 ta pigaw nin magꞌin nin mabista a kapapaꞌsar mo tan umanro a byay modti sa lutaꞌ.”b4 Siꞌkamo anamaet nin mangatua, sa pamaalaki moyo konran aꞌnak moyo, andiꞌ moyo sara byan puon nin manager komoyo no kai edet, iyakay tan itungtong moyo sara nin bilang sa gawꞌen nan Catawan no syay matua ra.
5 cSiꞌkamon uaripen, sunuren moyo saray amo moyo nin main nin pangigalang, liꞌmo tan masibulot a nakem moyo a bilang si Cristo a mansunuren moyo. 6 Wanin lawas a gawꞌen moyo, amboꞌ tamoꞌ no mangkaꞌkit ra sa apes moyon magustwan rakamo no kai edet, banaꞌ ta aripen nakamo anamaet ni Cristo nin gawꞌen moyoy karabayan nan Dios sa anggawan nin mababaꞌ moyo. 7 Magsirbi kamon maruros a nakem ta ikwinta moyoytin pagsisirbi moyo konan Catawan, amboꞌ tamoꞌ sa tawo. 8 Tandaꞌ tamo a aripen ya man o amboꞌ a sayay tawo, no maabig a gawaꞌ na, tubaleen naya liꞌ nin Catawan.
9 Siꞌkamo anamaet nin uamo, wanin a lamang, matkap a maong kamo konran aripen moyo. Andiꞌ moyo sara nin liliꞌmwen banaꞌ ta tandaꞌ moyo a sarba tamo, aripen man o amboꞌ, ket pari-parihon main sayan-sayay amo tamo itaw sa langit tan sya ket kasan ayunan na.
Ta Naipasaya atamo kona ni Cristo, Kuntrawen tamoya si Satanas
10 Bubsat, sayti a masusuyot nin ibaritaꞌ ko komoyo: Pakagsen kamon mangibwat sa nikaipasaya moyo konan Uunuren tamon si Jesu-Cristo tan sa alakin pakayadiꞌ na. 11 Bilang pinakasundaloꞌ nan Dios, usaren moyoy sarban pinakaarmas a manꞌibi nan Dios komoyo ta pigaw nin makuntra moyo a tutaktika nan Dimunyo. 12 Wanin ta amboꞌ nin tawo a mangkilabanan tamo no kai saray dudukaꞌ a kai nin maꞌkit nin main nin pakayadiꞌ itaw sa kalangitan, tan saray uunuren, tan saray main nin kapangyadian, tan saray mampagꞌuray konran saray tutawo nin iti sa sirong nin pakayadiꞌ nin kadedleman iti sa mundo. 13 Kanyaꞌ anaod, bubsat, nin kwinta isulot moyoyna a kumplito nin pinakaarmas a manꞌibi nan Dios komoyo pigaw nin, sa udas a atakyen nakamon dukaꞌ a kalaban tamo, ket makakilaban kamon magsen anggan nayadiꞌ ana liꞌ a laban ket nasadyaꞌ kamo et a lamang sa raruma ana et.
14 Kanyaꞌ nin matkap a nakasadyaꞌ kamon pirmi nin kwinta nisulot moyoy pinakaarmas. Say bilang barkes moyon pangigaletan nin agamiren ket say katutuꞌwan. Say bilang salaban nin kerep tan gurot moyo ket say mapteg nin kabibyay moyo. 15 Say bilang kumayat nin apin nin ayi moyo ket say nikaituno moyo konan Dios a nangibwat konan Mabistan Patandaꞌ na. 16 Sa sarban mangyadiꞌ, matkap moyoy talek konan Dios ket siti a bilang sayay alakin manalaban sa lalaman moyo nin usaren moyo a kasa gapo nin magwaꞌ nin sain say bilang ipanaꞌ nan main nin apoy nin si sya a Kadukaan. 17 Matkap moyo et a say bilang hilmit nin prutiksyon moyo a say pangingisalba nan Dios komoyo. Akuen moyoyti tan say bilang ispada nin pakilaban moyo a say nibaritaꞌ nan Dios nin ipapanemtem nan Ispirito na komoyo. 18 Leleg nin nakasadyaꞌ kamon wanin, pirmi kamon masuet nin dumasal sa panininreg nan Ispirito nan Dios komoyo a no ani-ani a dawaten tan idasalan moyo. Banaꞌ konan sitin laban, pirmi kamon sisasadyaꞌ ta pigaw nin maituluy-tuloy moyo saran idasalan a sarban tutawo nan Dios. 19 Siꞌko anamaet, idasalan rako nin ibi na kongko nin Dios a kuston susaritaꞌ nin irgwen ko ta pigaw nin maksaw a nakem kon ipatandaꞌ yay mabistan plano nan Dios nin gindat a niadi a ikalamoꞌ nasaray amboꞌ nin Judio konran tutawo na. 20 Mangkapriso ako banaꞌ sa sain nin nangibakian nan Dios kongko. Baleꞌ idasalan rako a kai ako nin magꞌalangan nin ipatandaan koya ta sayti a manepeg kon gawꞌen.
Paksawen na ni Tiquico a Nakem ran Taga Efeso
21 No maipaꞌkaꞌ kongkodti, si Tiquico ana liꞌ a mangibaritaꞌ komoyo sa kapapaꞌsar tan man-gawꞌe-gawꞌen ko. Sya, busat tamoya sa pammemper nin mabli komi tan saya yan mailalwan sa pangwaꞌ na nin manꞌipagwaꞌ nan Uunuren tamo kona. 22 Kanyaꞌ nin ibakiꞌ koyadsen komoyo ta pigaw nin mangibwat kona, matandaan moyoy kapapaꞌsar mi tan ta pigaw nin mapaksaw na a nakem moyo.
Say Pammindisyon
23 Sapa kumon ta si Dios a syay Ama tamo tan si Uunuren a Jesu-Cristo, byan rakamo, bubsat, nin mabistan kapapaꞌsar tan paꞌgeten ra a pilalabyan moyo nin main nin maꞌget nin pagmamatalek konra. 24 Sapa kumon ta ituluy-tuloy nakamon bindisyunan nin Dios, siꞌkamon sarba nin mampangawaꞌnan kona ni Uunuren tamon Jesu-Cristo nin mapangawaꞌnan a kasan anggawan.