5
Edet, banaꞌ ta aꞌnak nakamon kawaꞌnan nan Dios, arigen moyay Dios sa pigagawaꞌ moyo. 2 Ket magkabyay kamo nin mapangawaꞌnan konran saray kalalamoꞌ moyo kapadan nipangawaꞌnan na kontamo ni Cristo. Wanti e a ginwaꞌ na: Binulꞌisan nay peteg a kapapaꞌsar na para sa kaabigan tamo, ket say patiti na, saya nin pagsasakripisyo nin manglat nin kukasalanan tan sayan rigalon mabanglo a makapaririket konan Dios.3 Anaod, nipurok nakamon tutawo nan Dios ket matkap a kasa gapo kumon nin abirno maulit tana nin pakiraray moyo sa amboꞌ moyon asawa, a nikasamaꞌ a gawaꞌ-gawaꞌ moyo, o a mangagom kamo. 4 Amboꞌ a lamang nin manepeg a magꞌirgo kamon madawal, kasan kabalikasan tan nikasamaꞌ, no kai edet, say bubagay a mampakisalamatan moyo konan Dios. 5 Wanin anaod kumon ta tandaꞌ moyoynayti: Si tawo nin mangkiraray sa amboꞌ nan asawa, o mampangwaꞌ nin nikasamaꞌ a gawaꞌ-gawaꞌ, kai ya gapo nin pangikunen nin kaabigan nin iti sa Pagꞌadian na ni Cristo tan nan Dios. Wanin a lamang konan tawon maagom, ta say bagay nin manꞌapesen na ket magꞌin anan dios na.
6 Ket andiꞌ kamo nin paulaw sa siꞌnuman nin mangiꞌdeng a amboꞌ kanon kasalanan in a gawaꞌ-gawaꞌ, ta si Dios guraꞌ na in tan dusawen nasara liꞌ a mansumubag kona. 7 Ket andiꞌ kamo gapo kiranod konran man-gumwaꞌ nin sain. 8 Wanin ta gindat, nagꞌurayan kamon kadedleman baleꞌ sawanin mampagꞌurayan kamoynan palaway banaꞌ ta naipasaya kamoyna kona ni Cristo. Anaod, magkabyay kamoynan kipada kona a pangibwatan nin palaway 9 ta say ibat kona ket say sarbaynan klasin gugawaꞌ a maabig, mapteg tan tutuo. 10 Adalen moyon gawꞌen no ani a makapaririket konan Uunuren. 11-12 Anaet, andiꞌ kamo nin kiranod sa kasan sirbin gawaꞌ-gawaꞌ ran mampagꞌurayan nin dedlem ta makapadingꞌey nin tuloy, ni irgwen tana a man-gawꞌe-gawꞌen ra sa adi, no kai edet, siꞌkamon bilang palaway, palawayan moyoy dukaꞌ a gawaꞌ-gawaꞌ ra. 13 No main nin animan a itaw sa dedlem ket mapalawayan ya, maꞌkit a tutuon bakas na. 14 Sarba ngaꞌmin, no mapalawayan nin maong, magꞌin palaway anan lamang. No maipaꞌkaꞌ sa wanin, main yayti si wanra a wana,
“Siꞌkamon mampaꞌlek, mimata kamo!
Siꞌkamon nati, mabyay kamo,
ta palawayan nayna ni Cristo a byay moyo.”
15 Kanyaꞌ nin pakailag kamo sa pagkakabyay moyo. Magkabyay kamon bilang manakem nin tutawo amboꞌ nin bilang tutawon kasinakem. 16 Usaren moyon maong a sarban pagkanawanawa nin gumwaꞌ nin kaabigan ta konan sitin panaon ket abaw saraynay tawon gawꞌen ra a dukaꞌ. 17 Andiꞌ kamo nin kumimey nin bilang kasinakem no kai edet, tarusan moyon maong no ani a rabay nan Uunuren nin gawꞌen moyo. 18 Andiꞌ kamo nin mipabok ta makasidaꞌ ti sa kabibyay moyo.
Ana edet, aburuyan moya a Ispirito nan Dios nin pagꞌurayan nakamon maong
19 ket paksawen moyoy nakem nin saya tan saya yupaꞌ sa susaritaꞌ a mangibwat sa Kukanta, sa uimno tan raruma et nin kukansyon a pangrarayo konan Dios;
raywen moyay Catawan sa kanta tan tugtog a mangibwat sa kanakman moyo;
20 naipatukdoꞌ sa nikaipasaya moyo konan Catawan tamon Jesu-Cristo, kisalamatan moya et sa sarban mangyadiꞌ a Dios a syay Ama tamo;
21 paisirong kamo et sa saya tan saya banaꞌ sa pangungunor moyo kona ni Cristo.
Paisirong sa Saya tan Saya
22 aBilang wadiꞌ, siꞌkamon bubbayi, wanin moyo kumon konran asawa moyo kapada a nipaisirong kamo konan Criston Uunuren. 23 Wanin ta si lalaki, syay pinakaulo nan babayi kapada a si Cristo, syay pinakaulo tamon tutawo na nin pinakalalaman na ta syan diri a nangisalba kontamon pinakalalaman na. 24 Kapada anaod a siꞌtamon tutawo na ket mampaisirong atamo kona ni Cristo, siꞌkamo nin bubbayi, matkap a paisirong kamon liso konran asawa moyo.
25 Siꞌkamo anamaet nin lulalaki, kawaꞌnanen moyo saray asawa moyo kapadan pangangawaꞌnan na ni Cristo kontamon tutawo na a bilang nin nubya na. Wanti a ginwaꞌ na, nibi nay byay na para kontamo 26 ta pigaw nin maisadyaꞌ natamon magꞌin nin maikanaꞌ kona yupaꞌ sa nikaparinggas tamo sa nipagdisidido tamo nin pabawtismo tan sa sain a nibibilin na kontamo. 27 Ginwaꞌ na in ta pigaw nin maiyadap natamo liꞌ a tutawo na konan diri nin bilang sa sayay balasang nin ikasal a pinasyan bista, kasan mansa o geren nin rupa na o animan a dipikto; maringgas ya tan kasa gapo nin pagkurangan na.
28 Wanin anamaet si lalaki, matkap a kawaꞌnanen naya a asawa na kapadan pangangawaꞌnan na sa dirin lalaman na. Wanin ta say pangangawaꞌnan nan si lalaki konan asawa na, pangangawaꞌnan naynan lamang sa dirin lalaman na 29 tan kasan tawon manguraꞌ sa dirin lalaman na, no kai edet, pakanen tan pagawan naya. Sain a kapadan pammaga na ni Cristo kontamon naipasaya kona 30 ta siꞌtamo nin mammemper a puparti nan pinakalalaman na ni Cristo. 31 Wanin a kawaꞌnanen nayan lalaki a asawa na ta wana sa Masanton Kasuratan, “Banaꞌ konan siti nin ginwaꞌ nan Dios, si sayay lalaki, lakwanan nasara si ama na tan si ina na ta kipasaya ya konan asawa na ket saran rwa, magꞌin saran sayan-saya.”b 32 Siin si pagꞌin nin sayan-saya, main nin ararem nin pipaꞌkaan na, ket ipaꞌsar kon wanin konan Cristo tan saray naipasaya kona. 33 Wanin anamaet, magwaꞌ et a manꞌirgwen nay maipaꞌkaꞌ konran mitraasawa. Anaod, si barang saya komoyo nin siꞌkamon lulalaki, kawaꞌnanen may asawa mo kapadan pangangawaꞌnan mo sa lalaman mon diri. Siꞌka anamaet nin babayi, igalang may asawa mo.