Sinagyat atamon Mipapasaya
4
aEdet, banaꞌ sa sain, siꞌkon mangkapriso banaꞌ sa katutulok ko konan Uunuren a si Cristo, ibibilin ko pa tana a magkabyay kamon maibagay sa pagkakabyay ra nin tawo nan Dios a syay nanagyatan na komoyo. 2 Matkap a pirmin maayupaꞌ, mauyamoꞌ tan mapamasinsya kamo. Miaabutan kamo sa saya tan saya banaꞌ sa pangangadoꞌ moyo. 3 Ipamuspusan moyon ituluy-tuloy a mabistan uksoy moyo nin pinangibwat nan Ispirito nan Dios banaꞌ sa pitutuno moyo a syay mampamipasaya komoyo. 4 Anaod, siꞌtamon sarba nin mammemper, ket paꞌsar tamo a iti sa sayan-sayay lalaman na ni Cristo, tan sayan-saya a Ispiriton mampiikap kontamo. Anamaet, pariho sa sain, sinagyat natamo ngaꞌmin nin Dios a main nin sayan-sayay manꞌilalwan tamo 5 tan sayan-sayay Uunuren tamo a syay Cristo, tan sayan-saya yay mantepren tamo, tan sayan-sayay bawtismob tamon mangipaꞌkit sa sain. 6 Sayan-saya a Dios a syay Ama tamon sarban mammemper. Sya a magꞌuray, syay magtrabaho, tan syay mampiikap sa sarba kontamo.7 Ket, say barang saya kontamon sarba ket pinayaburan na ni Cristo nin saka-sakalakon pakababaꞌ nin maitukoy sa sain a nipami nan diri nin byay na. 8 Mabasa anaod sa Masanton Kasuratan,
“Sin inmarwas yan nako sa langit,
niꞌras nasaray sarban tinalo na tan
pinaya-payaburan nasaray tutawo na.”c
9 Ket si wanan inmarwas yan nako sa langit, say rabay nan irgwen, nanaoy yayna yapoꞌ nin nako sa rarem nin lutaꞌ. 10 Sitaw si nanaoy sa rarem nin lutaꞌ, syaytaw lamang si nuliꞌ anamanaet sa sangkataꞌgayan nin langit. Ginwaꞌ na in ta pigaw nin pasibuluten nay sarba. 11 Ket sya, mampayaburan natamo.
Main saray pinayaburan na nin magꞌin nin ibabakiꞌ na, main nin magꞌin nin mangingilalaman kona, main nin magꞌin nin mangingipatandaꞌ konan Mabistan Patandaꞌ sa nagsikabarang a lugar, tan main nin magꞌin nin mammaga tan mangangakay konran mammemper.
12 Mampamayabor yan saytin pupakababaꞌ kontamo ta pigaw nin isadyaꞌ natamon makapagsirbi konran tutawo na para kona tan ta pigaw nin siꞌtamon pinakalalaman na ni Cristo ket maparigsa atamo. 13 Bunga liꞌ nin sain a sarba tamo ket napasaya sa pammemper tan sa pakatandaꞌ tamo konan Anak nan Dios. Siꞌtamon pinakalalaman na ni Cristo, mipatuntawo atamo et ket mapasibulot yaytin pinakalalaman nin kapadan kasibulot na ni Cristo.
14 Ket no wanin ana liꞌ, amboꞌ atamoyna nin baraꞌmon aꞌnak nin mainumꞌay nin maꞌwit nin animan nin bakas nin uakay a maiyarig sa sayay baluton manꞌiyanur-anor nin daluyon o manꞌipadpad nin siri. Kai atamoyna maibarang nin bulaꞌ a uakay ran saray masisirib nin tutawon maong nin manaktika. 15 Siꞌtamo baleꞌ, say katutuꞌwan a pirmi nin irgwen tan sunuren tamon siaadoꞌ. Ket matkap tamon tumuntawo sa sarban pigagawaꞌ tan sa kanakman nin bilang kona ni Cristo a syay pinakaulo tamo a mammemper. 16 Yupaꞌ sa pakauray na, siꞌtamon pinakalalaman na ket unungen natamo nin bilang sa pupartin lalaman na nin masustintwan na a sarba ta naigalet a saya sa saya, ket gawꞌen nin barang saya kontamo a kanepegan nan gawꞌen. Mangibwat sa piaaduan ket tumuboꞌ yay pinakalalaman na ni Cristo tan umadilanta ya.
Sinagyat atamo Para sa Maringgas a Kabibyay
17 Kanyaꞌ nin mairot kon ibibilin komoyo sa pakayadiꞌ nan Uunuren komoyo a andiꞌ kamoyna nin magkabyay nin bilang konran tutawon kai nin mampangalilbiꞌ konan Dios. Say kukaisipan ra ket kasan pipaꞌkaan 18 ta kasan tandaꞌ ra no maipaꞌkaꞌ konan Dios tan matibꞌey a ulo ra. Ket kasa konra a bakas nin byay a manꞌibi nan Dios tan kasayna gapo nin pakataros ra sa man-gawꞌen na. 19 Kai sarayna gapo nin madingꞌey tan kai rayna gapo nin mandangkaan a karabayan nin lalaman ra no kai edet, kaririktan ra a mangwaꞌ nin nikasamaꞌ a gawaꞌ-gawaꞌ.
20 Baleꞌ siꞌkamo, amboꞌ nin wanin a naadal moyo maipaꞌkaꞌ konan Cristo nin si nipangakoꞌ nan Dios. 21 Sigurado ako a rinngeꞌ moyo a niparateꞌ na tan nipaiyakay na maipaꞌkaꞌ sa kabibyay moyo nin iti kona. Say katutuꞌwan maipaꞌkaꞌ sa sain ket maꞌkit sa kabibyay na ni Jesus. 22 Naadal moyoyna a no maipaꞌkaꞌ sa gindat nin kabibyay moyo, matkap moyoynan galten a maꞌran nin kinatawo moyo nin mampanidaꞌ komoyo yupaꞌ sa pamapain nan siti nin uapes a mangibarang komoyo, 23 ket mamabaꞌyo kamoynan kukanakman tan kukaisipan. 24 Isubray moyoyna a baꞌyon nikatawo moyo a pinarsa nan Dios nin kapariho nan peteg nin mapteg tan maringgas.
25 Kanyaꞌ nin andiꞌ atamoyna nin mibulaꞌ-bulaꞌ. Matkap a kasan piwadiꞌ-wadiꞌ a pakilimug-limog tamo sa saya tan saya banaꞌ ta nagꞌin atamoynan sayan-saya, siꞌtamon pupartin lalaman na ni Cristo. 26 No main wadiꞌ nin puon a manager kamo, pakandaꞌ kamo nin andiꞌ kamo nin magkasalanan.e Parayꞌepen moyoynan tampor a ulo moyod 27 ta pigaw nin andiꞌ moya nin byan nin tsansa a Dimunyo.
28 No main wadiꞌ komoyo a mampanakaw, itgen nayna. Say gawꞌen nayna edet ket, mamaturoꞌ yan saynget na nin magtrabaho ta pigaw nin makatingkap ya sa matunong a padalan ket makatulong ya konran mampagkurang.
29 Ilagen moyoy makapagꞌirgon dukaꞌ. Anaod, say irgwen moyo ket say makatulong konran kapada moyon tawo a bagay sa sitwasyon ta pigaw nin main nin maabig a mapurot ran saray makarngeꞌ.
30 Ket anaod, andiꞌ kamo nin gumwaꞌ nin animan nin pangibwatan a rumereꞌ yay Ispirito nan Dios a sya, malinis yan peteg. Nibakiꞌ nayan Dios nin miikap komoyo nin pakaꞌkitan a tutawo nakamo tan pakaꞌkitan a rumateꞌ liꞌ a awro a ilaꞌpos nakamon galten nin Dios sa pakaaripen moyo sa kadukaan.
31 Galten moyoyna a sarban sakit-nakem, sager tan pangunguraꞌ. Andiꞌ kamoyna nin mangarga-gargar, manidaꞌ, tan mamasakit nin nakem ran kalalamoꞌ moyo. 32 Anaod, matkap a maong kamo sa saya tan saya, tan makakiingar kamo sa saya tan saya, tan pirdunawen moyoy saya tan saya mangibwat sa pangangadoꞌ a kapadan nipamirduna nan Dios komoyo banaꞌ kona ni Cristo.