Ibabakiꞌ nayan Dios Si Pablo para konran Amboꞌ nin Judio
3
Oꞌ a, banaꞌ sa katutulok ko konan Cristo a si Jesus ta pigaw nin makakiramaꞌ kamon amboꞌ nin Judio sa kaabigan nin iti kona ni Cristo ket mangkapriso ako. 2 Sigurado ako a natandaan moyoyna a si Dios, nipya nayti kongko si gawaꞌ a iparateꞌ a kamaungan na komoyo. 3 Tandaen moyo et a nipatandaan naytin Dios kongko a gindat ket kai na nin manꞌipatandaan sa siꞌnuman. Maipaꞌkaꞌ konan siti ket main anan anted a wangko sa nuꞌnan nisurat kodti. 4 Ket sublien moyon basawen anamaet ta pigaw nin matandaan moyoy natarusan ko maipaꞌkaꞌ sa man-gawꞌen na ni Cristo a gindat ket kai nin manꞌipatandaan. 5 Sin saytaw, kai ti gapo nin nipatandaan sa siꞌnuman a tawo, baleꞌ sa tulong nan Ispirito na, manꞌipatandaan nayna sawanin nin Dios kontamo nin naitalaga nin apostoles na tan mangilalaman kona. 6 Wanti a manꞌipatandaꞌ na: Banaꞌ sa nikaipasaya moyo kona ni Cristo ta namper kamo konan Mabistan Patandaꞌ, siꞌkamon amboꞌ nin Judio ket maikikalamoꞌ kamo konran Judio sa sarban kaabigan nin kamaungan nan Dios tan sa pagꞌin anamaet nin pinakalalaman nan Cristo a si Jesus tan sa pakagaꞌmor moyo anamaet sa nipangakoꞌ nan Dios. 7 Para konan sitin Mabistan Patandaꞌ, nagꞌin akon ibabakiꞌ nan Dios nin ipatandaan koya. Nibi nayayti nin Dios a gawaꞌ ko mangibwat sa kamaungan na tan ginwaꞌ na mangibwat sa pakayadiꞌ na.8 Mataman no siꞌko ket sangkaayupaan ako sa sarban tawo nan Dios, wanin man, si Dios, nibi na kongkoy pagkanawanawa nin ipatandaꞌ komoyon amboꞌ nin Judio a maipaꞌkaꞌ sa kai nin masukat nin mabistan magaꞌmuran tamo nin mangibwat kona ni Cristo. 9 Nibakiꞌ nako anamaet nin mangipapalaway sa no paꞌno a say rabay naynan gawꞌen nin gindat ket yadien nayna. Sa linmabas anan panaon, si Dios a syay namarsa nin sarba, kai na nin nipatandaan ti sa siꞌnuman a gindat anan rabay nan gawꞌen 10 ta pigaw nin sawanin ket manꞌipapalaway nayna a maipaꞌkaꞌ sa nikapapasaya tamon tutawo na. Anaod, no maꞌkit ra in a ginwaꞌ nan Dios para kontamo nin saray pupangulo tan saray main nin kapangyadian nin magꞌuray itaw sa kalangitan ket matandaan ra a sangkaandaan a kadunungan nan Dios sa sarba ngaꞌmin nin pakaꞌkitan. 11 Nipaipapalaway na in a kadunungan na nin panunukid sa niplano naynan gawꞌen nangibwat et sin adapen nin naparsa a animan tan tinukid na in sa nipagwaꞌ na konan Cristo a si Jesus a Uunuren tamo. 12 Naipasaya atamo kona ni Cristo ket matpel atamoynan kumadani konan Dios ta tandaꞌ tamo a akuen natamo yupaꞌ sa pagmamatalek tamo sa ginwaꞌ na ni Cristo. 13 Wanin anaod, bubsat, kanyaꞌ nin sayti say pangingirangep ko nin dyaꞌdyaꞌ para tamoꞌ komoyo ket matkap a andiꞌ nin pangibwatan a tumapoꞌ a nakem moyo, ta sayti ket gawꞌen a magꞌin nin makakiramaꞌ kamo sa pinasyan andaꞌ a iti konan Dios.
Rabay na ni Pablo nin Matandaan ray Adoꞌ na ni Cristo
14 Ket banaꞌ anaod sa sarban sain, manalimukod akon dumasal konan Ama tamon Dios 15 a syay Ama nin sarban pinarsa na a mataman no itaw sara sa langit o iti sara sa lutaꞌ ket maipaꞌkit konra a pagkaama na. 16 Mandawaten ko kona a mangibwat sa kai nin masukat a makapakaꞌngap nin kamaungan na, ket paksawen na kumon nin main nin pakayadiꞌ a kukanakman moyo sa pangangantabay nan Ispirito na. 17 Wanin a mandawaten ko ta pigaw nin banaꞌ ta mampagmatalek kamo kona ni Cristo, ket misyon ya komoyo tan ta pigaw nin, banaꞌ sa adoꞌ na, ket marigsa tan matarigꞌen a baꞌyon byay moyo. 18 Ket, siꞌkamo nin kalamoꞌ ran sarba ran tutawo nan Dios, ket mababaꞌ moyon tarusan no paꞌnoy kaalawangan tan kaalakyan nin adoꞌ na. 19 Wanin et a masariꞌ moyo in nin pangangadoꞌ a iti kona ni Cristo mataman no kasan makatandaꞌ nin peteg sa sain. Wanin a dawat ko kona ta pigaw nin magkamain komoyo nin masibulot a sarban nikaDios nan Dios.
20 Edet, marayo yay mampagtrabaho sa byay tamo a si Dios! Banaꞌ sa kai nin masukat nin kaalakyan nin pakayadiꞌ na a man-gumwaꞌ iti kontamo ket makagawaꞌ ya nin mas et nin adayoꞌ dyan sa maisip tamo o sa madawat tamo. 21 Kanyaꞌ nin, kona edet ket, ibi tamo a alaki nin unor, siꞌtamon napasaya nin saka-sakalakon tutawo tan naipasaya konan Cristo a si Jesus sawanin tan sa anggaynan-angga!
Peteg a wanin anaod.