4 Wanin man, wanin anay ingangaꞌdo nan Dios kontamo. Anaod, mabli atamon tuloy kona ket mangkawaꞌnanen natamo nin 5 gawꞌen nan mabyay atamo mataman no banaꞌ sa kasusubag tamo ket nati anay paꞌsar tamo kona. Ginwaꞌ na in yupaꞌ sa nipangikalamoꞌ na kontamo anamaet sa nikaisubliꞌ na nin mabyay ni Cristo. Banaꞌ tamoꞌ sa kamaungan na a nisalba natamon Dios. 6 Anaod, nipasaya natamo konan Cristo a si Jesus ket pinasubliꞌ natamo anamaet nin mabyay nin naikalamoꞌ kona tan mampatekreen natamon Dios nin kiranod sa pangingigalang kona ni Cristo itaw sa langit. 7 Ginwaꞌ na in nin Dios ta pigaw nin maipaꞌkit nan anggan-angga a kai masukat nin kaalakyan nin kamaungan na sa pangangadoꞌ na kontamo nin mangibwat konan Cristo a si Jesus. 8 Wanin ta say kamaungan nan Dios a nangibwatan nin nisalba nakamo sin nagmatalek kamo kona ni Cristo. Kai in nangibwat komoyo ta rigalo na in nin Dios. 9 Kai in nangibwat sa mabistan gawaꞌ nan tawo ta pigaw nin kasa gapon magwaꞌ nan ipasirayo maipaꞌkaꞌ sa nikaisalba na.

10 Anaod, si Dios, syay nangwaꞌ kontamo no ani atamo sawanin. Inusar naya a Cristo a si Jesus nin ginwaꞌ natamon baꞌyon parsa ta rabay na a magkabyay atamon man-gawꞌen tamo a maabig nin, sayti ket nisadyaꞌ nayna nin gindat ta pigaw nin gawꞌen tamo.

11 Banaꞌ sa sain, siꞌkamon naiyanak a amboꞌ nin Judio, panemtemen moyoy kapapaꞌsar moyo sin saytaw. Tinuyaꞌ-tuyaꞌ rakamon ibaritaꞌ ran Judio a amboꞌ nakamo kanon tutawo nin Dios a bilang kano konra ta naturiꞌ sara. Baleꞌ say paturiꞌ, iti tamoꞌ sa lalaman. 12 Panemtemen moyo a gindat ket kasan kibiangan moyo kona ni Cristo tan amboꞌ rakamon kalamoꞌ nin tutawo nan Dios nin piniliꞌ na, kanyaꞌ nin sakalakon tutawo kamo. Kai kamo nin nakakiramaꞌ sa pakaisalba a niꞌnu-niꞌno na nin nipangakoꞌ^a nin Dios konran tutawo na. Nagkabyay kamodti sin saytaw nin kasan manꞌilalwan. Ni kai moya nin tandaꞌ a Dios. 13 Baleꞌ sawanin, naipasaya kamoyna konan Cristo a si Jesus, ket siꞌkamo nin sin saytaw ket amboꞌ nan tawo nin Dios, ginwaꞌ nakamoynan amigo na banaꞌ sa dayaꞌ na ni Cristo nin pinaturoꞌ nan nipangiyariglo komoyo konan Dios.

14 Anaod, si Criston diri a mangwaꞌ nin say pikakalamoꞌ tamo ket main anan pitutuno ta pinipasaya natamo nin siꞌkamin Judio tan siꞌkamon amboꞌ nin Judio. Sa patiti na, sya, ginlat nay piguguraꞌ tamo a sayti ket baraꞌmon padil nin mampamipurok kontamo. 15 Anaod, inanggawan nayna a padalan yupaꞌ sa Gugan-gan tan say nagsikabarang nin ipagwaꞌ a para tamoꞌ konran Judio. Ginwaꞌ na in ta pigaw nin siꞌtamon rway naiduman klasin tawo ket gawꞌen natamon baꞌyon klasin tawo nin naipasaya kona ket no wanin mitutuno atamoyna. 16 Sa patiti na ni Cristo sa kudos, ginlat nan diri a piguguraꞌ tamon rway klasin tawo tan ginwaꞌ natamon sayay klasin tawo ta pigaw nin pasublien natamon sayan-saya konan Dios. 17 Oꞌ a, nako yadti si Cristo tan nipatandaan naya sa sarba a Mabistan Patandaꞌ maipaꞌkaꞌ sa pakakituno tamo konan Dios, mataman komoyon amboꞌ nin Judio nin adayoꞌ konan Dios tan komin Judio nin adani kona.^b 18 Kanyaꞌ nin banaꞌ sa ginwaꞌ na ni Cristo, siꞌtamon rway klasin tawo, Judio tan amboꞌ nin Judio, makakidani atamoyna konan Dios a syay Ama tamo sa tulong nan sayan-sayay Ispirito na.

19 Edet, siꞌkamon amboꞌ nin Judio, amboꞌ kamoynan nikwintan sakalakon tutawo ta sawanin naikalamoꞌ kamoyna konran tutawo nan Dios nin piniliꞌ na tan nagꞌin kamoynan aꞌnak nan Dios. 20 Ket siꞌkamon lamang, pinagꞌin nakamon Dios nin bilang matiryalis sa bali na nin nipatukdoꞌ na konran apostoles tan prupita na. Sara a baraꞌmon tuꞌdek tan si Cristo a si Jesus nin diri a bilang baton nakaipatukduan nin sarain nin tuꞌdek nan sitin bali. 21 Banaꞌ kona ni Cristo, maꞌget a nikapaꞌdeng nan sitin baraꞌmon bali, tan siti ket mangibwat kona, mampagꞌin yan timplo a manepeg nin para konan Dios. 22 Ket banaꞌ ta mangkipasaya kamo anamaet kona ni Cristo, siꞌkamon amboꞌ nin Judio, manꞌiyalep kamoyna konan sitin piikapan na nin Ispirito nan Dios.