Surat koyayti komoyo nin tutawo nan Dios isen sa syudad nin Efeso^a nin mandumaer nin naipasaya konan Cristo a si Jesus.

2 Sapa kumon ta si Dios a syay Ama tamo tan si Uunuren tamon Jesu-Cristo bindisyunan rakamo tan byan rakamon mabistan kapapaꞌsar.

3 Raywen yay Dios a syay Dios tan Ama nan Uunuren tamon si Jesu-Cristo! Sya, mambindisyunan natamon sarbaynan mabista nin ibat sa pudir na banaꞌ sa nikaipasaya tamo kona ni Cristo. 4 Wanin ta, sin adapen nayan pinarsa a mundo, piniliꞌ natamoynan gindat nin ipasaya kona ni Cristo ta pigaw nin magꞌin atamo nin maringgas tan kasa gapo nin pagkurangan tamo sa pangingikit na. Banaꞌ sa pangangawaꞌnan nan Dios, 5 nidisisyon nayna sin saytaw et a gawꞌen natamon aꞌnak nan diri yupaꞌ sa ipagwaꞌ na kona ni Jesu-Cristo. Ginwaꞌ na in nin Dios ta sain a rabay na 6 ket marayo ya banaꞌ sa kamaungan nan kasan kapada. Nipayabor na in kontamo nin masibulot a nakem na yupaꞌ sa nikaipasaya tamo konan si Anak na a kawaꞌnan na.

7 Yupaꞌ sa dayaꞌ nan tinmuroꞌ nin siin si Anak nan kawaꞌnan na, simbot natamon nisubliꞌ konan Dios banaꞌ sa wanin anan kamaungan na, a say rabay nin saritaꞌnen ket napirduna nayna a kukasalanan tamo. 8 Masuruk-surok anaod a ginwaꞌ nan Dios para kontamo. Mangibwat sa kadunungan na tan sa ararem nin pakataros na nin sarba ngaꞌmin ket 9 maririket ya nin ipatarusan nayna kontamo a rabay na nin gawꞌen, a gindat ket kai na nin manꞌipatandaan. Masibulot a nakem nan nidisisyon nin Dios a kona ni Cristo 10 ket matukid anayti no marateꞌ a kuston panaon ta pigaw nin pipapasayawen na a sarban pinarsa nin magꞌin nin iti sa sirong nin pakauray na ni Cristo, mataman say itaw sa langit tan say iti sa lutaꞌ.

11 Yupaꞌ sa nikaipasaya mi kona ni Cristo, nipurok nakami nin Dios nin para kona nin diri. Ginwaꞌ nan Dios nin mangyadiꞌ a sarba ngaꞌmin ta pigaw nin matukid a plano nan diri tan wanin a nidisisyon naynan gawꞌen sin saytaw et. 12 Ginwaꞌ na in ta pigaw nin, say kabibyay min Judio nin siꞌkami a nuꞌnan nilalo kona, ket pangibwatan nin pakairayo na banaꞌ sa gawaꞌ nan kasan kapada.

13 Yupaꞌ sa nikaipasaya moyo anamaet a lamang kona ni Cristo, piniikap naya komoyo nin Dios a pakaꞌkitan a tutawo nakamo. Wanin a ginwaꞌ na sin nagmatalek kamo kona ni Cristo sin narngeꞌ moyay minsahi nin katutuꞌwan maipaꞌkaꞌ kona, a si Mabistan Patandaꞌ nin Pakaisalbawan moyo. Sitin pakaꞌkitan, ket masantos ya ta syay Ispirito na nin Dios nin nipangakoꞌ na sin saytaw. 14 Syaynaod a paniguradwan tamo a ipagaꞌmuran na ngaꞌmin kontamo nin Dios a nipangakoꞌ na anggan ilaꞌpos nayna a pangwaꞌ na a magꞌin ikon natamo. No wanin, marayo yay Dios banaꞌ sa gawaꞌ nan kasan kapada.

15 Ket banaꞌ anaod sa sain a ginwaꞌ nan Dios, kisalamatan koya para komoyo. Nangibwat ana sin natandaan ko a wanin anay pagmamatalek moyo konan Uunuren a si Jesu-Cristo tan say pangangadoꞌ moyo konran sarba ran tutawo nan Dios, 16 pirmi koya tanan mampakisalamatan. Manꞌidasalan katamo 17 konan si manraywen nan lamang anamaet ni Uunuren tamon Jesu-Cristo, a syan lamang a Ama tamo nin gumwaꞌ nin say sangkabistawan ana, tan mandawaten kon ipuyaꞌ na kumon komoyo a kanakman nin makadumog tan makataros sa sangkabistawan a gawaꞌ na ta pigaw nin makatandaꞌ moyan peteg. 18 Manꞌidasal ko et a palawayan na kumon nin Dios a kukanakman moyo ta pigaw nin masariꞌ-sariꞌ moyo sa kabibyay moyo no ani a mailalwan tamo sa nanagyatan na kontamo, tan ta pigaw nin masariꞌ moyo a say makapakaꞌngap nin ipagaꞌmuran na liꞌ konran tutawo na ket malaem, 19 tan ta pigaw nin masariꞌ moyo et kumon a kai gapo nin masukat nin kaalakyan nin pakayadiꞌ nan mantumulong kontamon mammemper kona. Siin a lamang nin pinasyan kaalakyan nin pakayadiꞌ 20 a nipamasubliꞌ nan mabyay nin Dios kona ni Cristo tan pinatekreꞌ naya sa pagꞌurayan sa wanan nadtaw sa langit. 21 Nikwa nayadtaw nin mampagꞌuray si Cristo nin mas makapangyayadiꞌ nin adayoꞌ nin tuloy dyan sarba ngaꞌmin nin main nin pagꞌaadiꞌ o pagꞌuuray o pakayadiꞌ. Kasa gapo nin mas ataꞌgay dyan sya mataman konan sitin kapresan nin panaon o sa adapen et. 22 Say sarba ngaꞌmin, nikwa nan Dios sa sirong nin pakayadiꞌ na ni Cristo ket sya a makapangyayadiꞌ sa sarba. Nibi nayan Dios nin ulo ran lapag nin tutawo na 23 a sarayti a paꞌsar lalaman nan diri ni Cristo. Kanyaꞌ nin siꞌtamon mammemper tan si Uunuren tamon Jesu-Cristo, baraꞌmo atamon magꞌin nin masibulot a lalaman leleg a mampasibuluten nay sarban main sa sarban lugar.