Ipaꞌwit miyaytin surat komoyon isen sa dupong ran mammemper kona ni Cristo a mampididinep isen sa Tesalonica nin iti konan Dios a Ama tan kona ni Uunuren a Jesu-Cristo.

Sapa kumon ta lawas a bindisyunan tan byan rakamon mabistan kapapaꞌsar.

2 Para komoyo, pirmi miyan mampakisalamatan a Dios tan isalambit kamon pirmi tepeꞌ nin dumasal kami, 3 ta kai mi gapon talaga nin manlingwanan nin panemtemen sa adapan nan Dios a sya a Ama tamo no paꞌno moyo nin manꞌibyay a pagmamatalek moyo konan Cristo, no paꞌnoy pagsisirbi moyo banaꞌ sa adoꞌ moyo kona, tan no paꞌno kamon mandumaer sa pananaꞌgan kona banaꞌ sa pangingilalo moyo a iti kona ni Uunuren tamon Jesu-Cristo.

4 Bubsat a mangkawa-kawaꞌnanen nan Dios, tandaꞌ mi a piniliꞌ nakamon Dios nin magꞌin ikon na, 5 ta maꞌkit mi a si Mabistan Patandaꞌ nin manꞌipatandaꞌ mi komoyo ket naiparateꞌ ya, amboꞌ nin sa irgo tamoꞌ no kai edet, main nin pakaꞌkitan nin pakayadiꞌ nan Ispirito nan Dios. Kai kamo gapo nin nagdwadwa a si Mabistan Patandaꞌ nin niyakay mi ket peteg a tutuo ya. Tandaꞌ moyoyna no paꞌno kamin nagkabyay sin isen kami et komoyo. Nagkabyay kamin wantaw para sa kaabigan moyo.

6 Ket siꞌkamo anamaet, inarig moyo no paꞌnoy nipagkabyay mi tan say kinimey na ni Jesus ta abirno abaw a nirangep moyon dyaꞌdyaꞌ banaꞌ ta inakoꞌ moyay Mabistan Patandaꞌ, ket main nin ririket moyo a nangibwat konan Ispirito nan Dios. 7 Ket nagꞌin kamon ihimplo konran sarba ran mammemper isen sa prubinsya moyon Macedonia tan iti anamaet sa prubinsyan Acaya. 8 Banaꞌ konan siin nin ihimplo moyo, naipata-patandaꞌ a minsahi nan Catawan, amboꞌ tamoꞌ sa Macedonia tan sa Acaya, no kai sa abaw et nin raruman lugar ket piirgu-irgo ran tutawo a maipaꞌkaꞌ sa pagmamatalek moyo konan Dios. Kanyaꞌ nin kasaynan matkap min ibaritaꞌ et. 9 Wanin ta sarain nin tutawo, sarayna a mampangibari-baritaꞌ no paꞌno rakami nin inakoꞌ isen. Ibari-baritaꞌ ra a ginurutan moyoynay pangrarayo moyo sa dios-dios ket inmarak kamo tan mampagsirbyan moyayna a sibibyay tan peteg a Dios, 10 tan mantumaꞌgan kamo konan Anak na nin mangibwat sa langit, si Jesus, a syay pinasubliꞌ na nin mabyay tan syay mampangipalꞌis kontamo sa sager nan maong nin Dios a rumateꞌ liꞌ banaꞌ ta sinubag tamoya.