3 Wanin ta sa pangingisagyat mi konan Mabistan Patandaꞌ, kai mi nin agamiren a binubulaꞌ tan kasan gagara min dukaꞌ o nin manglukon siꞌnuman. 4 No kai edet, banaꞌ ta inakoꞌ nan Dios a kumanaꞌ kami nin pangipyawan nan mangipatandaꞌ konan Mabistan Patandaꞌ, manꞌibaritaꞌ mi a rabay nan ipaibaritaꞌ komi nin Dios. Amboꞌ nin tutawo a mampaririketen mi no kai edet, si Dios a syay makapangusisaꞌ sa sain nin iti sa kukanakman mi. 5 Oꞌ tandaꞌ moyon peteg a kai kami nin nangagamir nin pammabur-pabor tan kasan apes min kwartawan kamo. Sitatandaꞌ yaynamaet a lamang sa sain a Dios. 6 Kai mi nin mantikapen a raywen rakamin tutawo, siꞌkamo man o saray raruma et, 7 abirno nin banaꞌ ta apostoles nakami ni Cristo, main nin kanepegan min naningkap nin pangrarayo mangibwat komoyo. Baleꞌ mauyamoꞌ kami ana edet sin isen kami komoyo nin baraꞌmon kamin sayay inan mampamasuso konran aꞌnak na. 8 Wanin anay pangangadoꞌ mi komoyo kanyaꞌ nin nakasadyaꞌ kamin amboꞌ tamoꞌ nin si Mabistan Patandaꞌ nin ibat konan Dios a ibi mi komoyo no kai edet, pati say byay mi. Wanin banaꞌ ta mabli kamon tuloy komi.

9 Mapanemtem moyo et angangko, manꞌaduen kon bubsat, no paꞌno kamin nagtrabahon maong. Nagtrabaho kamin awro tan yabi ta pigaw nin kai kami nin makabyat komoyo legꞌan miyan nipatandaꞌ komoyo a Mabistan Patandaꞌ a inakoꞌ mi konan Dios. 10 Siꞌkamo nin mismo a makapamatutuo, wanin yaynamaet a Dios, no paꞌno kamin nagkabyay isen komoyo nin mammemper konan Cristo. Maringgas kami, mapteg kami tan kasan pakabalawan mi. 11 Tandaꞌ moyon inasikaso mi a barang saya komoyo nin kapadan pangangasikaso nan sayay ama konran aꞌnak na. 12 Pinaksaw mi a nakem moyo, liniwaliwa kamo, tan binibilin kamon maong a magkabyay kamon maikanaꞌ konan Dios, a syay mampangayab komoyon kiramaꞌ sa pinasyan andaꞌ a pagꞌaadiꞌ na.

13 Anamaet a lamang, mampakisala-salamatan miya et a Dios banaꞌ ta sin karngeꞌ moyo sa minsahi na a niparateꞌ mi, inakoꞌ moyo. Wanin ta maamingaw moyon pageꞌ a minsahi tin nangibwat konan Dios, amboꞌ nin saritaꞌ tamoꞌ nin tawo. Ket mampagtrabahwen na komoyo nin siꞌkamon mampagmatalek kona.

14 Anaod, manꞌaduen kon bubsat, say mampangyadiꞌ komoyo ket kapadan mampangyadiꞌ konran iti sa dudupong sa Judea nin iti konan Dios. Mampangyadiꞌ a wanin konra banaꞌ sa pammemper ra konan Cristo a si Jesus. Anaod, nirangep moyoy pammadyaꞌdyaꞌ ran kababalyan moyon diri a kapadan nipamadyaꞌdyaꞌ ran kapada ran Judio konra. 15 Saray raruma konra nin kapada ran Judio a nangmati konran prupita sin naꞌteng anan panaon, saray puri ra a namapati kona ni Uunuren a Jesus, tan sawanin, saray raruma konra ket man-gulwen tan mantabuyen rakami. Mampasagren rayan maong a Dios. Manꞌipaꞌkit ra a kalaban sara nin sarban tawo sa 16 nipamaed-paed ra komi sa pangingipatandaꞌ konran amboꞌ nin Judio nin si minsahin mangibaritaꞌ no paꞌno nasaran isalba nin Dios. Sa wantin gawaꞌ ra, say kasalanan ra ket narateꞌ anay keteg a nibi nan Dios konra. Ket sawanin sa kaꞌtengan, rinmateꞌ ana a panunusa na sa sager na nin Dios konra.

17 Sawanin, siꞌkami, manꞌaduen min bubsat, amboꞌ et nin naꞌteng a naikadayoꞌ kami komoyo, sa lalaman baleꞌ amboꞌ nin sa nakem, ket banaꞌ sa iliw mi komoyo, rabay mi nin tuloy a maꞌkit kamo anamanaet. 18 Kanyaꞌ nin nipamuspusan min maong a bisitawen kamo. Lalo akoynan si Pablo, niꞌnu-niꞌno ko nin sinariꞌ, baleꞌ pinaed nakami ni Satanas. 19 Rabay min tuloy nin maꞌkit kamo anamanaet ta anaod, kai para a siꞌkamo a ilalo mi? Kai para a siꞌkamoy ririket mi, tan say ipasirayo mi banaꞌ ta itaw kamo liꞌ anamaet sa adapan na ni Uunuren a Jesus no rumateꞌ ya? 20 Anaod siꞌkamon peteg a maipasirayo tan ririket mi.