3
Ket banaꞌ ta kai mi ana nin matambar a iliw mi, nipagketan mi a mabatiꞌ kamin rwa ni Silas sa Atenasa, 2 ket ibakiꞌ miyadsen tana si Timoteo. Busat tamoya sa pammemper tan kapada miyan mampagsirbi konan Dios sa pangingipatandaꞌ nin Mabistan Patandaꞌ maipaꞌkaꞌ kona ni Cristo. Nibakiꞌ miyadsen anaod nin tumulong nin paksawen a nakem moyo ta pigaw nin umget a pagmamatalek moyo kona ni Cristo, 3 ket kasan siꞌnuman komoyo a mapatapoꞌ nin saytin pammadyaꞌdyaꞌ a manꞌirangep moyo. Baleꞌ tandaꞌ moyon peteg a sayti ket naitandaꞌ anan rumateꞌ kontamo. 4 Anaod, sin isen kami et komoyo nipau-pauꞌna mi ana komoyo a mangirangep ta mangirangep atamon pakapaidap, ket mampangyadiꞌ ana nin bilang tandaꞌ moyo. 5 Siin a rason no ambaleꞌ a sin kai koyna nin matpelan a kasan matandaan ko maipaꞌkaꞌ komoyo, nibakiꞌ koyadsen si Timoteo nin keen na tandaen na a paꞌsar nin pagmamatalek moyo. Kai ko nin maglat a umaburido nin bangliꞌ no natukso nakamoynan si Mannugsog a si Satanas ket nagꞌin kasa gapon kabalikasan nin pagal midsen.Say Makaliwaliwan Patandaꞌ a Nirateꞌ na ni Timoteo
6 Baleꞌ sawanin, nakasubliꞌb yaynadti komi si Timoteo nin ibat isen komoyo tan nirateꞌ nay makapaririket nin patandaꞌ a mampagmatalkan moya et a Dios tan manlabyen moyo et a saya tan saya. Niparateꞌ na et komi a sipapanemtem rakami nin pulos kabistawan a mapanemtem moyo tan masulit kamo lawas anamaet nin maꞌkit kami kapadan sulit min lamang nin maꞌkit kamo. 7 Ket banaꞌ sa sain nin natandaan mi, manꞌaduen kon bubsat, a mabistan kapapaꞌsar nin pagmamatalek moyo, napaksaw a nakem mi mataman no abaw a makapaaburido komi tan abaw a dyaꞌdyaꞌ mi. 8 Ket sawanin marigsa ana a byay mi no tumuluy-tuloy kamon umdeng nin madaer sa byay moyon naipasaya kona ni Cristo.
9 Anaod, paꞌno miya kadiꞌ nin makakisalamatan nin sumadag a Dios banaꞌ komoyo? Wanin a ibaritaꞌ mi banaꞌ ta alaki a ririket mi sa adapan na banaꞌ komoyo. 10 Awro tan yabin masuet nin pidasal-dasal mi a makalamoꞌ kamo anamanaet tan mapunꞌan mi a kakurangan et nin pagmamatalek moyo.
11 Manꞌidasal mi et a sapa kumon ta si Dios a Ama tamo anan diri tan si Uunuren tamon Jesus a manglat nin animan a mampamaed nin kappikaꞌ midsen komoyo. 12 Ket siꞌkamo anamaet, paalakyen na kumon nin kasan tegen nin Uunuren a pangangadoꞌ moyo sa saya tan saya tan konran sarban tutawo, a kapada nin pangangadoꞌ mi komoyo. 13 No wanin, say kukanakman moyo ket mapagsen nan Uunuren ket magꞌin kasa liꞌ kumon nin pakabalawan moyo tan maringgas kamo sa pangingikit nan Dios a Ama tamo no rumateꞌ ya si Uunuren tamon Jesus nin kalamoꞌ nasaray sarba ran tutawo na.