Say Pagkabyay nin Makapaririket konan Dios
4
Ket sawanin bubsat, main nin masuet min dawaten komoyo banaꞌ sa nibi nan pakayadiꞌ komi ni Uunuren a Jesus. Niyakay mi komoyo a matkap moyon talaga a magkabyay nin makapaririket konan Dios, ket man-gawꞌen moyoynan pageꞌ. Baleꞌ dawaten mi a lalo moyo et nin gawꞌen in say man-gawꞌen moyon makapaririket konan Dios. 2 Anaod, tandaꞌ moyoynay bubibilin a nibi mi komoyo yupaꞌ sa pakayadiꞌ na ni Uunuren a Jesus sa pagkakabyay moyon wanin, 3 ta say rabay nan Dios ket si paringgasen moyoy byay moyo. Oꞌ, andiꞌ kamo nin kiraray nin amboꞌ nin manepeg. 4 Matkap a tandaꞌ nin barang saya komoyo no paꞌno nan madangkaan a lalaman nan diri,a nin say pangwaꞌ moyon sayti ket kusto sa pangingikit nan Dios tan sa pangingikit nin tutawo; 5 andiꞌ kamo nin paꞌwit sa amot nin dayaꞌ ta sain say maꞌmot nin dayaꞌ ket kapadan pigagawaꞌ ran tutawon kai nin magtandaꞌ konan Dios. 6 Anamaet a lamang, kasa nin siꞌnuman kumon a magtraidorb sa kapada nan tawo, o a kai nin mangrispito nin kanepegan nin kapada nan tawo. Nipau-pauꞌna mi ana komoyo sin saytaw a maipaꞌkaꞌ konan siti a si Uunuren nin diri ket dusawen nasaray gumwaꞌ nin wanin. 7 Wanin banaꞌ ta kinayaban natamon Dios sa maringgas, amboꞌ sa nikasamaꞌ, a kabibyay. 8 Ket si siꞌnuman a kai nin rumngeꞌ sa saytin akay, amboꞌ nin tawo a kai na nin rinngeꞌ, no kai si Dios, a syay mampami konan Ispirito na komoyo.9 Ket no maipaꞌkaꞌ sa pilalabyan moyon mibubsat sa pammemper, kasayna angangkon matkap et nin isurat mi komoyo ta niyakay nakamoyna nin Dios ta pigaw nin milalabyan kamo. 10 Pageꞌ anaod a manlabyen moyo saraynay bubsat moyo sa pammemper isen sa intiron Macedonia. Wanin man, masuet min dawaten et komoyo, manꞌaduen kon bubsat, lalo moyo et nin labyen a saya tan saya. 11 Masuet min dawaten et komoyo a ipamuspusan moyoy magkabyay nin matinek, andiꞌ kamo nin kibiang-biang sa byay ran main nin byay tan maningkap kamon ikabyay moyo a nibaritaꞌ mi ana komoyo sin saytaw. 12 Wanin a gawꞌen moyo ta pigaw nin saray amboꞌ nin mammemper ket rispitwen rakamo tan ta pigaw nin kai kamo nin milalo sa raruma sa ikabyay moyo.
Say Pammasubliꞌ nin Mabyay konran Mammemper a Nati ana
13 Sawanin manꞌaduen kon bubsat, rabay min tuloy nin mapalaway a pakatandaꞌ moyo maipaꞌkaꞌ konran saray kapada moyon mammemper nin nati ana ta pigaw nin kai kamo nin gumereng a kapada ran tutawon kai ra nin mailalwan a mangrisibi nin anggan-angga nin byay a iti konan Dios. 14 Banaꞌ ta mantepren tamo nin nati ya si Jesus tan sinmubliꞌ yan mabyay, mantepren tamo anamaet a saray nunati ana nin namper kona no rumateꞌ ya liꞌ anamanaet ket pasublien nasara liꞌ nin mabyay nin Dios ket ikikalamoꞌ nasara liꞌ kona ni Jesus.
15 Sayti anaod a iparateꞌ mi komoyo nin saritaꞌ nan diri nin Uunuren, a siꞌtamon mabyay et liꞌ no rumateꞌ ya anamana a Uunuren, ket kai atamo gapo nin muꞌnan maikalamoꞌ kona dyan saray nati ana. 16 Sayti liꞌ e a mirirngan nin mangyadiꞌ no sumubliꞌ ya: Si Uunuren nin mismo ket manaoy ya liꞌ mangibwat sa langit nin mampangitaꞌway ya nin gan-gan, mantumaꞌway yay sangkataꞌgayan a anghil, tan marngeꞌ yay trumpita nan Dios. Muꞌna, sumubliꞌ sara liꞌ nin mabyay a nunati nin namper kona ni Cristo, 17 miꞌsa siꞌtamo liꞌ nin mabyay et tan saray sinmubliꞌ nin mabyay, ket bigraꞌ atamoynan maꞌwit sa kamiꞌnan nin gunem ta pigaw nin sanaen ya sa taꞌgay a Uunuren. Ket anggan-angga a kalamoꞌ tamoyayna liꞌ a Uunuren.c 18 Edet, liwaliwawen moyoy saya tan saya yupaꞌ sa saytin pakatandaꞌ.