Sadyaan moyoy Irarateꞌ nan Uunuren tamon si Jesus
5
Sawanin, manꞌaduen kon bubsat, no kaꞌno mangyadiꞌ ti nin bubagay, kai koyna angangko matkap nin isurat komoyo, 2 ta peteg a tandaꞌ moyoynan kasan magtandaꞌ no kaꞌno a awron isusubliꞌ na ta pigaw nin manintinsya yay Uunuren kapada a kasan makatandaꞌ no kaꞌno ya nin rumateꞌ sa yabi a mannakaw.a 3 Mangyadiꞌ ti sa panaon no kaꞌno ra manꞌirgwen nin tutawo a matinek tan kasan kapangnwan nin sarba, ket konan sitaw anan lamang nin panaon, ket konra, rumateꞌ ana a pakasidaꞌ ket kai sara gapo nin makapalꞌis. Bigraꞌ nin rumateꞌ nin kapadan kararateꞌ nin pangingingar nan sayay mangabing.4 Baleꞌ siꞌkamo, kai kamo nin mampagkabyay sa kadedleman, manꞌaduen kon bubsat. Kanyaꞌ nin kai kamo bigraen nin isusubliꞌ nan Uunuren nin kapadan pammigraꞌ nan mannakaw. 5 Anaod, sarba moyo baraꞌmo kamon mangkabyay sa palaway no awro ta siꞌtamon mammemper man-gawꞌen tamo no ani a kusto. Amboꞌ ratamon kapada nin saray iti sa dedlem nin kasalanan. 6 Kanyaꞌ nin andiꞌ tamo sara nin arigen a raruma a saray amboꞌ nin mammemper a baraꞌmo saran tawon mampaꞌlek, no kai edet, matkap a baraꞌmo atamon sayay nimata ket mapalaway a pangingisip tamo tan pirmi atamon sisasadyaꞌ. 7 Wanin ta, kai para a no yabi a pangengelek, tan say pipabok ran saray mabubok? 8 Baleꞌ siꞌtamo, iti atamo sa awro a mapalaway, kanyaꞌ nin matkap a pirmi atamo nin sisasadyaꞌ. Magwaꞌ tamoyti no isulot tamo a paꞌsar dipinsa nan kerep tan gurot a say pipaꞌkaan ket say pagmamatalek tan pangangadoꞌ, tan paꞌsar hilmit a siti ket say ilalo nin pakaisalba, 9 ta nipurok natamo nin Dios amboꞌ nin ta pigaw nin dusawen na no kai edet, ta pigaw nin ilaꞌpos nay pangisalba na kontamo yupaꞌ kona ni Uunuren tamon Jesu-Cristo. 10 Nati ya para kontamo ta pigaw nin abirno nati atamoyna o mabyay atamo et ket mabyay atamo liꞌ nin kalamoꞌ na. 11 Kanyaꞌ anaod nin ituluy-tuloy moyon liwaliwawen a saya tan saya tan mitutulungan kamon mapaꞌget a pammemper moyo, kapada nin man-gawꞌen moyoyna sawanin.
Say Bibilin na ni Pablo para sa Kaabigan na nin Dupong
12 Dawaten mi komoyo, bubsat, a alilbien moyo saray mampakaidap para komoyo, saray piniliꞌ nan Uunuren nin mampangipangulo tan mampangyakay komoyo. 13 Ibi moyoy ataꞌgay nin pammagalang tan alakin pammabli konra banaꞌ sa gawaꞌ ra. Mikakalamoꞌ kamon main nin pitutuno.
14 Masuet min dawaten et komoyo, bubsat, a bibilinen moyo saray matamlad, paksawen moyoy nakem ran matapoꞌ, pagawan moyo saray makapoy et a pammemper ra tan anusan moyo saran sarba. 15 Siguradwen moyo a kasan siꞌnuman komoyo a gumaleꞌ konran siꞌnuman a nakagwaꞌ nin abas kona, no kai edet, say maabig para sa barang saya tan konran raruma et nin tawo a dumugen moyon gawꞌen. 16 Pirmi kamon rumiriket. 17 Pirmi kamon dumasal. 18 Mataman no ani a mangyadiꞌ, pirmin kisalamat kamo konan Dios. Siin a rabay nan Dios nin gawꞌen moyo banaꞌ sa nikaipasaya moyo konan Cristo a si Jesus.
19 Say gawaꞌ nan Ispirito nan Dios ket andiꞌ moyo nin sambenanb. 20 No si sayay tawo ket ibaritaꞌ nay nipatandaan nan Ispirito nan Dios kona, andiꞌ moyo nin yaan-yaanen. 21 No kai edet, timbangen moyoy sarban bubagay; puruten moyoy maabig, 22 tan say sarban kadukaan ket kadayꞌan moyo.
23 Sapa kumon ta dirin si Dios a syay puon nin katinekan ket paringgasen nan liso a byay moyo. Sapa kumon ta iyilag nay intiron byay moyo — say kapusuan, nakem, tan lalaman moyo — ta pigaw nin kasa gapo liꞌ nin maꞌkit nin pakabalawan moyo no rumateꞌ ya si Uunuren tamon Jesu-Cristo. 24 Mapagmatalkan yay Dios a syay nangayab komoyo, kanyaꞌ nin gawꞌen na in komoyo.
Patanid ya si Pablo
25 Idasalan rakami anamaet, manꞌaduen kon bubsat.
26 Iparateꞌ moyoy maꞌmot a pammakumusta ko konran sarba ran bubsat sa pammemper isen.c 27 Banaꞌ sa pakayadiꞌ a nibi na kongko nin Uunuren, igan-gan ko komoyo a basawen moyaytin surat sa adapan ran sarba ran bubsat sa pammemper isen.
28 Rumateꞌ kumon komoyo ngaꞌmin isen a bindisyon na ni Uunuren tamon Jesu-Cristo.