Si Uꞌnan Surat na ni Pablo kona ni
TIMOTEO
1
Siꞌko si Pablo a sayay apostol nan si Cristo a si Jesus. Tinudoꞌ rako nin Dios a Mangingisalba tamo tan ni Cristo a sya a gumwaꞌ nin mangyadiꞌ a sarban mantagaꞌnan tamo.2 Surat koyayti komo Timoteoa a manꞌikwinta ko nin peteg a anak ko yupaꞌ sa pammemper mo kona ni Cristo.
Sapa kumon ta si Dios a si Ama tan si Uunuren tamon Cristo a si Jesus, lawas a bindisyunan raka, ingangaꞌdwen raka tan byan raka nin mabistan kapapaꞌsar.
Matkap nasaran Ikusto ni Timoteo a Mampangyakay nin Abas
3 Timoteo, bilang sa dawat koyna intaw komo sin adap ko sa Macedonia, ituloy mo et a isen sa Efeso ta main sarain saray mampangyakay nin amboꞌ nin kusto. Matkap nin gan-ganen mosara a itgen rayna in a man-gawꞌen ra. 4 Igan-gan mo konra a andiꞌ ra nin pirdyen a tyimpo ra sa ginwa-ginwaꞌ nin istu-isturya tan mataman et sa maipaꞌkaꞌ konran abaw a mitutumbok nin pupuon ra. Sain nin bagay ket puon tamoꞌ nin pididiskusyon, tan kasa gapon maitulong nin sain sa pangwaꞌ tamo a matukid a plano nan Dios sa byay tamo ta mangyadiꞌ ti tamoꞌ yupaꞌ sa pagmamatalek tamoꞌ kona.
5 Anaod, say gagara nin pangingigan-gan ket say pagkakamain nin adoꞌ a mangibwat sa masibulot a kanakman tan sa pakatandaꞌ a kusto a man-gawꞌen tan sa pagmamatalek kona ni Cristo a sayti ket amboꞌ nin piwadiꞌ-wadiꞌ. 6 Main sara a amboꞌ ana in a puntirya ra kanyaꞌ nin natawtaw sarayna sa kasan kabalikasan a pididiskusyon. 7 Rabay ra a magꞌin nin mangangakay nin maipaꞌkaꞌ sa Gugan-gan a naibi kona ni Moises, baleꞌ kai ra nin mangkataros a pipaꞌkaan nin say manꞌiyakay ra. Pinasyan tepel ran mampagꞌirgu-irgo baleꞌ kai ra nin mangkataros a manꞌibari-baritaꞌ ra.
8 Sigurado atamo nin sain nin Gugan-gan ket maabig no sayti ket usaren nin manepeg. 9 Wanin ta tandaꞌ tamo a say gagara no mayin nin nipataoy a Gugan-gan ket amboꞌ nin para konran matunong nin tutawo. No kai edet, nipataoy in para konran dukaꞌ a tutawo a bilang sarayti:
saray andiꞌ nin paisirong sa layi, saray andiꞌ nin paisirong konran magꞌuray, saray kai nin marabay nin mangrayo konan Dios, saray kai nin tumgen sa pagkakasalanan ra, saray kai nin mangibilang konan Dios tan tuyaꞌ-tuyaen ra a maipaꞌkaꞌ konan Dios, saray mangmamati, tan mataman et nin saray makaitpel nin mangmati konran ama o ina ra, 10 saray kiraray sa amboꞌ ran asawa, saray kirilasyon nin sikswal konran kapada ran lulalaki o kapada ran bubbayi, saray pwirsawen rasaran kalapen a kapada ran tawo, saray mabulaꞌ, saray magtistigos nin mibulaꞌ-bulaꞌ, tan saray raruma et nin mansumubag sa akay maipaꞌkaꞌ sa kabistawan.
11 Sain nin akay ket madumog konan si Sangkabistawan nin Patandaꞌ a kongko ket nipya nayayti nin Dios a sya, iti a pagkakumplito kona.
Sayan Pakaꞌkitan nin Pangingingaꞌdo nan Dios
12 Mampakisalamatan koya si Uunuren tamon si Jesus a syay Cristo ta nikwinta nako nin sayay kapagpyawan ket nibi na kongko a pakababaꞌ nin makapagsirbi kona. Tinudoꞌ nako nin magsirbi kona 13 mataman nin sin saytaw ket abaw a pammadukaꞌ ko kona tan dinuksa-duksaꞌ kosaray tutawo na tan inata-ataki kosara. Wanin man, iningangaꞌdo nako et a lamang nin Dios ta kai ako et intaw nin mamper kona ni Cristo ket kai ko nin tandaꞌ nin dukaꞌ a man-gawꞌen ko. 14 Kasan dugaꞌ nin nibi nan lamang et kongko nin Uunuren tamo a kamaungan na. Binyan nako et nin pagmamatalek tan adoꞌ mangibwat sa nikaipasaya kona ni Cristo a si Jesus.
15 Siti e ket peteg nin tutuo ya tan manepeg nin akuen tan tepren ya nin sarba:
“Si Cristo a si Jesus, nako yadti sa lutaꞌ ta pigaw nin isalba nasara a makasalanan.”
Anaod, siꞌko a sangkadukaan sa sarban makasalanan. 16 Baleꞌ mataman nin wanin, ta pigaw nin maipaꞌkit na ni Jesu-Cristo a sangkaalakyan nin pammasinsya na, iningangaꞌdo nako nin Dios a sangkadukaan nin tawo. Ginwaꞌ nako nin sayay alimbawaꞌ para konran saray magmatalek liꞌ kona ket magaꞌmuran ray anggan-angga nin byay a iti konan Dios.
17 Anaod, si Dios, syan bukod a Dios. Adiꞌ ya anggan-angga. Kasa nin patiti na! Kai ya nin maꞌkit. Ket pagalangan tan itandudoꞌ yay ngaran na anggan-angga!
Peteg a wanin.
Matkap nin Matpel ya si Timoteo sa Pangangakay na
18 Siꞌka Timoteo, kwinta anak katayna ket ipagamet ko komo a gawaꞌ nin pangangakay nin no ani a kusto, nin kumpruntado sa nipatandaan nan Ispirito nan Dios sin saytaw et maipaꞌkaꞌ sa ipamakiꞌ komo. Tumbuken mo ta pigaw nin magꞌin kan mabayani anaod nin bilang sayan sundaloꞌ nin matalo a sarban dukaꞌ. 19 Sa pangngawaꞌ mo nin sain, matkap nin magsen a pagmamatalek mo tan man-gawꞌen mo no ani a tandaꞌ mon manepeg. Anaod, main nin tutawo nin man-gawꞌen ra a abas abirno nin tandaꞌ rayna a sayti ket dukaꞌ ket ginwaꞌ ran kasan sirbi a pagmamatalek ra. 20 Alimbawaꞌ konran sarain ket sara si Himeneo tan si Alejandro. Pinauryan kosaraynan iti sa pakayadiꞌ na ni Satanas ta pigaw nin sa pangingirangep ra ket maadal ra a andiꞌ ana nin mangwaꞌ nin makadukaꞌ kona nin Dios.