Say Matkap a Main nin Muꞌna-muꞌna sa Pididinep ra
2
Ket anaod, sayti a bubibilin ko komo.Si muꞌna, matkap a pakisalamatan tamoyay Dios para konran sarban tawo tan ipasisingaꞌdo tamo sara nin ikidawat kona. Idasalan tamo sara 2 a mampagꞌuray kontamo tan saray raruma et nin main nin pakauray kontamo ta pigaw nin sa pagꞌuuray ra, ket mabyay atamo nin matinek tan mabista a kapapaꞌsar leleg a manꞌituluy-tuloy tamoy mangwaꞌ nin saytaw say kumanaꞌ konan Dios tan konran kapada tamon tawo. 3 Maabig no man-gawꞌen tamo in tan sain a makapaririket konan Dios a syay Mangingisalba tamo. 4 Wanin ta rabay na nin Dios a say sarba nin tawo ket maisalba tan matandaan ran maong a katutuꞌwan maipaꞌkaꞌ kona.
5 Anaod, sya tamoꞌ a Dios tan
sayan-saya ya a mangingituno nin tutawo konan Dios.
Sya a tawo a si Jesus, a syay Cristo nin
6 nibi na a byay na nin ipambot na sa sarba nin tutawo.
Edet, sa manepeg nin panaon, pinatutuꞌwan nan Dios a isalba na a tutawo. 7 Sain anamaet a rason a sinuyoꞌ nakon Dios nin ibabakiꞌ na tan sayay mangingipatandaꞌ kona nin Mabistan Patandaꞌ ta pigaw nin iyakay ko konran amboꞌ nin Judio a katutuꞌwan, ta pigaw nin mamper sara. Tutuo anaod a manꞌibaritaꞌ ko; kai ako nin mampibulaꞌ-bulaꞌ.
8 Ket anaod, wanti a rabay ko: Sa adtiman nin mididinep kamo, ket dumasal saraynamaet kumon a lulalaki. Matkap ran itaꞌgay a gamet ran dumasal nin maringgas a byay ra tan kasa nin sakit-nakem tan sager ra sa kapada ran tawo.
9 Ket saray bubbayi anamaet, matkap a say pisisket ra, manepeg nin maibagay konra tan amboꞌ nin nalabas-labas a kikit. Andiꞌ ra nin pasubrawan a pammabistan bakas nin sabot ra nin parayo sa tutawo tan andiꞌ ra nin labasen a piaalahas nin balitok o mablin bubato o say pisisket nin mabli nin sayti a puon a raywen sara. 10 Ana edet, say puon ket say maabig a gawaꞌ-gawaꞌ ra ta sayti a maibagay konran bubbayi nin wanra ket makaDios sara. 11 Mabista a mititinek saran mangrengeꞌ a bubbayi no pagꞌaadal nin Saritaꞌ nan Dios. Paisirong sara konan si mampangyakay. 12 Say rabay kon ibaritaꞌ, kai ko anaod nin aburuyan nin sara a mangyakay konran lulalaki sa pidudupong, o a sara a mangipangulo konran lulalaki. Matkap ra tamoꞌ a mititinek nin rumngeꞌ. 13 Anaod, sin pinarsa nan Dios a tawo, nuꞌna nayan pinarsa a lalaki, si Adan, miꞌsa pinarsa nayay babayi, si Eva. 14 Anamaet, amboꞌ nin si Adan a nalingo no kai edet, si Eva kanyaꞌ nin si babayi a sinmubag sa gan-gan nan Dios. 15 Ket mangirangep saray bubbayi nin idap sa pangangabing ra, baleꞌ tulungan nasaran lamang nin Dios noa ituluy-tuloy ray magmatalek kona, tan mapanglabi sara sa kapada ran tawo, tan magkabyay saran manepeg sa adapan nan Dios nin mapagdangkaꞌ sara.