Say Matkap nin Pigagawaꞌ ran Pupangulo ran Mammemper
3
Saytin susaritaꞌ ket peteg nin tutuo:“No apesen nan sayay tawo a syay magꞌin nin mammaga nin dupong ran mammemper, maalaga yayti nin trabaho a mampilien na.”
2 Ket banaꞌ ta maalaga ya in a trabaho, si sayay mammaga ran mammemper, matkap a kasa gapo nin gawaꞌ na a maitudoꞌ nin abas. Matkap a sayan-saya tamoꞌ a asawa na.a Matkap a igagalang ya, maong yan mangisip tan mapagdangkaꞌ ya sa lalaman nan diri. Matkap a mapananꞌili ya tan matkap a maong ya nin mangyakay. 3 Matkap a andiꞌ ya nin mabubok, tan amboꞌ nin maꞌmot a ulo na tan kai ya nin kiaway-away no kai mapamasinsya ya tan matkap a amboꞌ ya nin rupan kwarta. 4 Maipaꞌkaꞌ anamaet sa pammali na, matkap a mababaꞌ naya nin ipalalako nin mabista. Saray aꞌnak na, matulok sara tan manꞌigalang rayan kusto. 5 Matkap nin wanin ta mapagawan naya kasi nin sayay tawo a dupong a ikon nan Dios no si pammali nan diri ket kai naya nin mababaꞌ nin ipalalako nin mabista? 6 Matkap a amboꞌ ya et tamoꞌ nin baꞌyu-baꞌyo nin mammemper ta bangliꞌ no umataꞌgay nin tuloy a pangingikit na sa lalaman nan diri, ket masintinsyawan ya nin madusa nin bilang konan Dimunyo. 7 Wanin et anamaet, matkap nin ataꞌgay a rispito ra kona nin saray amboꞌ nin mammemper ta no amboꞌ nin wanin, balawen raya ket konan siin nalaꞌwan nayaynan Dimunyo.
8 Sara anamaet a katulungan sa trabaho, matkap a igagalang sara anamaet tan tutuo sara sa irgo ra. Matkap a andiꞌ sara nin mabubok tan andiꞌ sara nin intrisado sa kwarta. 9 Matkap a masibulot a nakem ran dumaer sa katutuꞌwan maipaꞌkaꞌ sa pammemper nin nipatandaan nayna nin Dios tan tumbuken raya nin main nin maringgas nin kanakman. 10 Saray magꞌin nin katulungan sa trabaho, matkap a masubok sara yapoꞌ. Ket no maꞌkit a kasa nin maipakasalanan konra, magwaꞌ saraynan gawꞌen nin katulungan. 11 Matkap a saray asawa ra ket igagalang sara anamaet. Kai sara nin mamadukaꞌ no kai edet, madangkaan ray lalaman ran diri tan kapagpyawan sara sa sarban bagay. 12 Sara anaod a katulungan sa trabaho ket matkap a sayan-saya tamoꞌ a asawa rab tan mapatulok rasara a aꞌnak ra tan maipalalako ra nin mabista a pammali ra. 13 Ket no wanin, sara nin mampagsirbin maong nin katulungan sa trabaho ket umataꞌgay a pangingikit nin sarba konra, tan magꞌin nin matarigꞌen sara maipaꞌkaꞌ sa pammemper ra konan Cristo a si Jesus.
Say Gagaran Nipanurat na ni Pablo
14 Timoteo, mampilalo ako a sa amboꞌ ana nin maꞌteng ket makapikaꞌ akoynadsen komo. Wanin man, manꞌisurat koytin bubibilin komo sawanin 15 ta pigaw nin no bilang wadiꞌ ket maatrasa ako, tandaꞌ mo no ani a manepeg nin kimeyen ran tutawon iti sa pamilya nan sibibyay a Diosc. Si dupong ran mammemper, baraꞌmo ya nin baton pundasyon tan tuꞌdek nan sayay bali banaꞌ sa pangingiꞌdeng nan katutuꞌwan a mangibwat konan Dios.
Mabli a Katutuꞌwan
16 Kasan sapo nin maalagayti say pagkabyay tamo nin maikanaꞌ sa ginwaꞌ na ni Cristo! Sawanin nayna tamoꞌ et nin nipatandaan ti nin Dios
“Sya, nagꞌin yan tawo nin naꞌkit rayan tutawo.
Pinatutuꞌwan nan Ispirito nan Dios a sya kasa gapo nin kakurangan na.
Naꞌkit raya anamaet nin uanghil.
Nipatandaan a maipaꞌkaꞌ kona sa nagsikabarang nin lugar sa mundo,
abaw sara a nagmatalek kona
tan niyuliꞌ nayan nisubliꞌ nin Dios sa kagalangan a main kona.”