4
Mataman no maalagayti nin katutuꞌwan ket mapalaway nan lamang nin manꞌibaritaꞌ nin Ispirito nan Dios a sa masusuyot liꞌ nin panaon ket main sara liꞌ a gurutan raytin katutuꞌwan. Maibarang sara nin abas nin uakay a mangibwat sa uispiriton dukaꞌ. 2 Saytin abas nin uakay ket manꞌitayak ran saray mampimaung-maong tan mampibulaꞌ-bulaꞌ. Say kunsinsya ran saraytin tutawo ket kadar a baraꞌmon nakber ana. 3 Alimbawaꞌ nin sain ket say manꞌiyakay ran sarayti a maiyawaꞌ a saray makaDios ket sumrep sara sa byay a main nin asawa tan ibaritaꞌ ran main nin maꞌkan a maiyawaꞌ nin kanen. Baleꞌ si Dios ginwaꞌ nayti nin kanen ta pigaw nin siꞌtamo nin mammemper tan magtandaꞌ sa katutuꞌwan ket mausar tamoyti nin main nin pakikisalamat. 4 Anaod, sarba nin pinarsa nan Dios ket mabista, ket kasa kumon nin maiyawaꞌ kontamo no kai edet, akuen tamoy sarban saytin rigalo nin main nin pakikisalamat konan Dios. 5 Wanin ta, yupaꞌ sa dasal tan say pangangaburoy na nin Dios, say sarba ket maikanaꞌ ana.Bubibilin Para konan Diri ni Timoteo
6 Timoteo, iparateꞌ mo in nin nibaritaꞌ ko konran mammemper ket no wanin, saya kan matunong a aripen nan Cristo a si Jesus. Leleg nin manꞌipapalaway mo in ket mampagsenen mo anamaet anan lamang a pammemper mo yupaꞌ sa say mantepren tamo maipaꞌkaꞌ kona ni Cristo tan say kuston akay a mantumbuken mo. 7 Andiꞌ mo nin pamirdyan nin udas a kidiskusyon maipaꞌkaꞌ sa akay a kasan kakanaan maipaꞌkaꞌ konan Dios tan istu-isturyan mangibwat sin nuꞌnan panaon nin kai mangikadani konran tutawo konan Dios. Ana edet, iparmaw moy lalaman mon diri nin magkabyay nin maikanaꞌ konan Dios. 8 Main nin kakanaan nin pangimarmaw tamon ihirsisyuwen a lalaman tamo ta mapagsen ya. Wanin man mas alaki et nin adayoꞌ a kakanaan nin pammagsen tamon say pagkakabyay nin maikanaꞌ konan Dios, ta siti a makatulong sa byay tamo sa kapresan tan mataman et sa byay tamo liꞌ sa adapen. 9 Siin ket tutuo tan manepeg yan akuen tan tepren nin sarba. 10 Wanin ta, say rason a manꞌipamuspusan tamon gawꞌen a trabaho tamo ket banaꞌ ta mampilalo atamon maong kona nin Dios a sibibyay a syay Mangingisalba nin sarban tawo. Oꞌ a, maisalba nasara a magmatalek kona.
11 Iyakay mo in nin bubagay, Timoteo, tan igan-gan mo nin sunuren nin sarba. 12 Andiꞌ ka mangimey nin magꞌin main nin kai pangingibilang komo nin siꞌnuman banaꞌ ta malagoꞌ ka et.
Ana edet, magꞌin kan ihimplo konran mammemper. Ipaꞌkit moy manepeg ran arigen sa pagꞌiirgo mo tan sa kimey mo, sa pangangadoꞌ mo sa kapada mon tawo tan sa pagmamatalek mo konan Dios, tan sa malinis a kaisipan tan pigagawaꞌ mo. 13 Angga nin makapikaꞌ akoynadsen liꞌ, uꞌna-uꞌnawen mo in say gawaꞌ mon pammasa nin Masanton Kasuratan sa pidudupong ran mammemper, say pangangakay mo tan say pammibilin mo konran mammemper. 14 Usaren mo lawas a pakababaꞌ a nipuyaꞌ nan Ispirito nan Dios komo sin saray pupangulo sa dupong ran mammemper ket nipababo ray gamet ra komo nin nibakiꞌ rakan sayay trabahador nan Dios tan nibaritaꞌ ran prupita nan Dios in a pakababaꞌ mo.
15 Sain a matkap mo nin gawꞌen, Timoteo. Iꞌpos moy mababaan tan panaon mo sa pangngawaꞌ nin sain ta pigaw nin maꞌkit nin sarba a manꞌumadilanta ka sa naipagwaꞌ komo. 16 Pakailag ka sa kimey mo tan sa pangangakay nin katutuꞌwan. Dumaer ka sa sarban sayti ta no wanin a gawꞌen mo, tutuo a maisalba ka, pati sara anamaet a makarngeꞌ komo.