Bubibilin Maipaꞌkaꞌ sa Pakiirgo na ni Timoteo sa Barang Saya
5
Andiꞌ ka nin mangikapuet nin masiken dyan siꞌka, no kai edet, kairgwen mosara nin mabista nin bilang nin ama mo. Kairgwen mosara nin mabista a lulalaki nin malagoꞌ dyan siꞌka nin bilang nin bubsat mo. 2 Kairgwen mosara nin mabista a bubbayin matuntawo dyan siꞌka nin bilang nin ina mo tan kairgwen mosara nin mabista a bubbayi nin malagoꞌ dyan siꞌka nin bilang nin bubsat mo. Matkap a malinis lawas a kaisipan mo maipaꞌkaꞌ konra.Bubibilin Maipaꞌkaꞌ konran Balo
3 Matkap a main nin pangingigalang nin tulungan mosaray bubbayin balo sa dupong nin kasan manupurta konra. 4 Baleꞌ no si sayay babayin balo ket main nin aꞌnak o apupo na, matkap nin muꞌna-muꞌna sa pagsisirbi ra konan Dios ket say pammaga ra konran pamilya ra tan konran matua ra. Makapaririket ti konan Dios. 5 Wanti na nin si sayay peteg a babayin balo: bukud-bukod nayna tan kasaynan manupurta kona, ket si Dios a mampagmatalkan na nin tumulong kona tan pirmi ya tanan dumasal nin kidawat kona awro tan yabi. 6 Baleꞌ si sayay babayin balo nin say karigawan tamoꞌ nin lalaman na a manꞌasikaswen na, kwintan nati yayna konan Dios mataman no mabyay ya et.
7 Ket, igan-gan mo in konran pamilya ran diri nin saray balo ta pigaw nin kasan mabalaw konran mammemper. 8 Wanin ta si mammemper a kai nin manupurta konran kukanayon na, laloyna konran pamilya nan diri, masakit-sakit ya et dyan amboꞌ nin mammemper. Ipaꞌkit nin sain nin gawaꞌ na a ginurutan na a pammemper na.
9 Sa listawan ran saray peteg a bubbayin balo, maikwa sara tamoꞌ a magꞌidad nin aꞌnem a puloꞌ o masurok. Matkap a saya tamoꞌ a nagꞌin nin asawa na.a 10 Matkap a pitanda-tandaꞌ ya sa maabig a gawaꞌ-gawaꞌ na. Ualimbawaꞌ nin sayti ket pinaalaki nasaran mabista a aꞌnak na, mapananꞌili ya, nagsirbi yab konran tutawo nan Dios, tinmulong ya konran mangkapaidap tan lawas a say gumwaꞌ nin maabig a apes na.
11 Baleꞌ andiꞌ moyo sara nin iyayi sa listawan a bubbayin balo nin malalagoꞌ et, ta no kai ra nin kapukpukan a kaingaran ra ket apesen ray kikalamoꞌ anamanaet ket mapauryan raynay nipangakoꞌ ra kona ni Cristo. 12 Ket konan siin, masintinsyawan sara sa kai ra nin nikatukid sa nipangakoꞌ ra kona ni Cristo. 13 Saya et nin rason a andiꞌ sara nin iyayi sa listawan ket si magꞌin saran matamlad tan pirdyen ra tamoꞌ a panaon ra nin manumba-tumbaliꞌ. Ket amboꞌ in tamoꞌ, kabiangan ray byay ran raruman tawo tan mangulit-ulit sara tan mangibari-baritaꞌ sara nin kai ra nin manepeg nin irgwen.
14 Kanyaꞌ nin sa angan-angan ko, mabista no saray bubbayin balo nin malalagoꞌ et ket kiasawa sara anamana, manganak sara, tan alinyawen ray pammali ra. No wanin a gawꞌen ra, kasa gapo nin magꞌin nin puon a main nin mairgo ran dukaꞌ maipaꞌkaꞌ kontamon mammemper nin saray mangkumuntra kontamo. 15 Wanin a bibilin ko banaꞌ ta main saraynaytaw saray balo nin nabarang ket mantumumbok sarayna kona ni Satanas.
16 Si siꞌnuman a mammemper nin babayi a main nin babayin balo nin kanayon na, matkap a alilaen nasara, a amboꞌ yay dupong ran mammemper a mangasikaso konra ta pigaw nin matulungan saraytaw saray balo nin kasaynan pamilyan manupurta.
Bubibilin Maipaꞌkaꞌ konran Pupangulo
17 Saray pupangulo anamaet a mabistay pangingipangulo ra, matkap nin igalang sara tan swildwan sara nin masuruk-surok, lalun-lalo saray mampagtrabaho nin maong a manꞌipatandaan ray saritaꞌ na nin Dios tan mampangyakay sara nin no ani a rabay na nin Dios. 18 Wanin ta, wana nin Dios sa Masanton Kasuratan,
“Andiꞌ ma nin berberen a bebey nan baka a manꞌusaren nin mangirik.”c
Wana et a lamang nin Dios,
“Si sayay mampagtrabaho, kanepegan na a upaan.”d
19 No main nin darom a kuntra konan sayay pangulo, andiꞌ mo nin rengꞌen no kai ra nin patutuꞌwan nin no amboꞌ nin tulo, rwa ray tistigos. 20 Saray mampagkasalanan, matkap a pagꞌirgwan mosara sa adapan ran sarba ran mammemper ta pigaw nin saray raruma ket lumiꞌmo sara. 21 Sa adapan nan Dios, sa adapan nan Cristo a si Jesus, tan sa adapan ran saray uanghil a piniliꞌ nan Dios, igan-gan ko a gawꞌen mo in say nibaritaꞌ ko nin kasa nin paburan mo no kai pari-parihoy pangingikit mo sa sarba.
22 Andiꞌ mo nin inu-inumꞌayen nin ipababo a gamet mo sa sayay tawo ta pigaw nin gawꞌen yan trabahador na ni Cristo. Wanin ta no kai ya nin maikanaꞌ maranod ka sa kasalanan na. Ituluy-tuloy mo anaod nin malinis lawas a byay mo.
Bubibilin et kona ni Timoteo
23 Siti et e: Andiꞌ ka tamoꞌ nin minom nin ranom no kai minum-minom ka nin daiteꞌ nin arak a tambar nan tyan mo tan raruma et nin maingar mo ta maisasakit ka.
24 No mamiliꞌ kan saray magꞌin nin pupangulo, panemtemen mo a say dukaꞌ a gawaꞌ-gawaꞌ ran raruma nin tawo ket padaran ana nin maꞌkit, ket sayti mapala-palaway nin pakadusawan ra liꞌ. Baleꞌ say dukaꞌ a gawaꞌ-gawaꞌ nin raruma ket kai et yapoꞌ nin maꞌkit anggan mailiwaꞌ liꞌ. 25 Wanin anamaet a lamang sa maabig a gawaꞌ-gawaꞌ, say gawaꞌ-gawaꞌ ran raruma ket mangkaꞌkit ana baleꞌ say gawaꞌ-gawaꞌ ran raruma anamaet ket kai et, baleꞌ mailiwaꞌ liꞌ a lamang.