Bubibilin Maipaꞌkaꞌ konran Uaripen
6
Saray mammemper a uaripen, matkap nin paisirong sara nin pangipaꞌkit ran pangingigalang ra konran saray main nin ikon konra. Gawꞌen ra in ta pigaw nin kasa nin makapagꞌirgo nin dukaꞌ konan Dios tan sa akay a nangibwat kona. 2 Ket no mammemper sara anamaet a main nin ikon konra, matkap nin andiꞌ a banaꞌ ta bubsat rasara sa pammemper ket kai rasaraynayti nin kabilangan nin saray uaripen. Ana edet, mas sesegan ray pagsisirbi ra banaꞌ ta saray mapaburan nin pagsisirbi ra ket bubsat rasara sa pammemper tan kawaꞌnan nasara nin Dios.Timoteo, iyakay mon maong tan ipatumbok mo in nin uakay.
Pammauꞌna Maipaꞌkaꞌ sa Nagsikabarang nin Uakay
3 Main saray mampangyakay nin naiduma tan amboꞌ nin kumpruntado sa tutuon uakay a nangibwat kona ni Uunuren tamon Jesu-Cristo nin sayti ket mangipunta kontamo sa dalan nin pagkabyay a makapaririket konan Dios. 4 Si siꞌnuman a mangwaꞌ nin wanin, mipataꞌgay ya; wanin a lamang baleꞌ, kasa nin tandaꞌ na. Si wanin a tawo, masakit nayna a kiꞌbatan tan kiaway maipaꞌkaꞌ sa sari-saritaꞌ, a sayti ket pangibwatan nin piiimbelan, pisasageran, pisisidaan tan pagsususpitsan dukaꞌ konran raruma 5 tan pisasangkinian nin pirmi. Gawꞌen ra in ta kasan matunong nin iti sa kaisipan ra tan kasayna nin tandaꞌ ra maipaꞌkaꞌ sa katutuꞌwan. Manꞌisipen ra a say pagkamakaDios ket sayay padalan nin yumaman.
6 Pageꞌ anaod, no makaDios atamo tan kuntinto atamoyna sa no ani a main tamo, gawꞌen in a mayaman atamo 7 ta kasa gapo nin animan a nirateꞌ tamodti sa mundo sin niyanak atamo. Wanin a lamang kasa gapo liꞌ anamaet nin iꞌras tamon ibat iti sa mundo no mati atamo. 8 Kanyaꞌ nin no main ana nin sumadag nin ikabyay tan isket tamo, matkap a kuntinto atamoyna. 9 Baleꞌ saray tutawo nin masulit tuloy nin yumaman, madaliꞌ saran matukso tan baraꞌmo saran nakalap nin laꞌwan banaꞌ ta say kasan kakanaan nin bubagay a manꞌapesen ra, ket sayti a manidaꞌ konra tan mangikaꞌ konra sa pakadusa nin kasan anggawan. 10 Anaod, gawꞌen ran tutawo a sarbaynan bakas nin kadukaan banaꞌ sa agom ra sa kwarta. Ket anaod banaꞌ sa sain nin agom ra, main saraynaytaw saray ginurutan raynay pammemper ra kona ni Cristo. Say bunga baleꞌ nin sayti ket abaw a idap nin nakem tan kaberengan.
Gawꞌen na ni Timoteo nin Sayay Trabahador nan Dios no Ani a Mapteg
11 Baleꞌ siꞌka, Timoteo, a sayay trabahador na nin Dios, kumadayoꞌ ka sa sain a bubagay. Ket ipamuspusan mon gawꞌen a no ani a mapteg tan maikanaꞌ konan Dios. Tumuluy-tuloy kan magmatalek konan Dios. Mapangawaꞌnan ka, mapangitpel ka tan mapangabot ka. 12 Gawꞌen moy anggawan nin mababaꞌ mo nin magkabyay bilang sayay tutuo nin mammemper kona ni Cristo. Gawꞌen mo in ket sa kapresan a lamang, mangkagaꞌmuran moyna a anggan-angga nin byay a iti konan Dios a siin a nangayaban nan Dios komo sin nipatutuo mo a pagmamatalek mo kona ni Jesu-Cristo sa adapan ran abaw a tutawo.
13 Ket sawanin, sa adapan na nin Dios a mampamabyay sa sarba, tan sa adapan nan Cristo a si Jesus nin nangipadar nin katutuꞌwan sa adapan na ni Poncio Pilato, igan-gan ko komo, 14 asikaswen mon maong a nangigan-ganan kontamo ta pigaw nin kai nin malawukan nin abas tan kasa gapo nin makapamalaw. Gawꞌen mo in anggan sa awro nin rumateꞌ ya si Uunuren tamon Jesu-Cristo 15 sa manepeg nin panaon. Si Dios a gumwaꞌ a mangyadiꞌ ti.
Iti kona a pagkakumplito tan bukud-bukod nay main nin pakauray.
Syay Adiꞌ ran sarban uadiꞌ tan syay Uunuren ran sarban uunuren.
16 Sya tamoꞌ a puon nin byay a kasan makapangrep tan
syay mampiikap sa pinasyan tuloy salag nin palaway a kasa gapo nin makakadani.
Kasa et gapo nin nakaꞌkit kona ta kasa gapo anaod nin magwaꞌ nin kumikit kona.
Pagalangan ya lawas kumon tan magnayon kumon a magꞌuray ya.
Peteg a wanin.
17 Timoteo, igan-gan mo konra nin mumayaman a andiꞌ sara nin mipataꞌgay. Amboꞌ nin say kayamanan ra a pagmatalkan ra ta sayti ket kai nin magnayon; ana edet, si Dios ta syay malaem nin mampami nin sarban bagay ta pigaw nin usaren tamo nin siririket. 18 Bibilinen mosara nin gumwaꞌ nin nagsikabarang a maabig ta sain a tutuon kayamanan ra. Matkap a andiꞌ sara nin masiblet tan matkap a sisasadyaꞌ saran mangitao nin main ra konran mampagkurang. 19 Sa wanin, mampaninep saran tutuon kayamanan a manꞌilalwan ran risibyen liꞌ sa adapen. No wanin a gawꞌen ra, magaꞌmuran ray byay a peteg a main nin kakanaan.
Say Bibilin tan Patanid na ni Pablo
20 Anaod, Timoteo, sain a nitalek komo, ilagen mo. Kumadayoꞌ ka sa irgu-irgo nin kasan kakanaan sa pangingikit nan Dios tan sa say mampididiskusyunan ra tamoꞌ a sain a peteg kanon kadunungan. 21 Wanin ta main saray nangakoꞌ sa sain nin peteg kanon kadunungan ket nabarang saraynan mangkaikadayoꞌ sa katutuꞌwan nin pammemper.
Bindisyunan nakamo kumon nin Dios.