Si Surat na ni Pablo kona ni
TITO
1
Siꞌko si Pablo, aripen nako nin Dios tan apostol nako ni Jesu-Cristo. Nibakiꞌ nakon Dios ta pigaw nin keen ko nin paꞌgeten a pagmamatalek ran saray piniliꞌ nan magꞌin nin tutawo nan diri, tan ta pigaw nin ipatandaan ko konra a katutuꞌwan nin maipaꞌkaꞌ kona, nin mangipaꞌkit konra no paꞌnoy magkabyay nin maikanaꞌ konan Dios. 2 Ket say bunga nin sain ket si masigurado ra anaod a mabyay sara anggan-angga nin iti konan Dios a nipangakoꞌ nayna nin gindat baꞌyo naya et nin pinarsa a mundo. Anaod, kai ya gapo nin mibulaꞌ-bulaꞌ 3 kanyaꞌ nin sa kuston panaon a nitalaga na, pinangibwat na a matandaan yay Mabistan Patandaꞌ na. Sawanin si Dios a syay Mangingisalba tamo, nigan-gan na a ipatandaꞌ koyaytin Mabistan Patandaꞌ na a siti nipya nan gawꞌen ko.4 Surat koyayti komo, Tito, a manꞌikwinta kon anak kon diri banaꞌ ta pariho atan mampagmatalek kona ni Jesu-Cristo.
Sapa kumon ta si Dios a syay Ama tamo tan si Cristo a si Jesus a Mangingisalba tamo, bindisyunan raka tan byan rakan mabistan kapapaꞌsar.
Say Panunuyoꞌ nin Pangulo
5 Tito, dinawat kon mabatiꞌ kadsen sa isla nin Creta ta pigaw nin ituloy mon ipalasta a bubagay a matkap et nin ipalasta sa dupong ran mammemper tan ta pigaw nin manuyoꞌ ka nin saray lalakin mangipangulon dupong sa barang sayay babalidsen. Sunuren moytaw say nibibilin ko komo:
6 Si sayay pangulo, matkap a kasa gapo nin gawaꞌ na a maitudoꞌ nin abas. Matkap a sayan-saya tamoꞌ a asawa na.a Matkap a saray aꞌnak na ket mammemper sara kona ni Cristo anamaet tan kasan mairgon dukaꞌ a gawaꞌ ra o a suplado sara. 7 Anaod, matkap a kasa gapo nin gawaꞌ nan si sayay mammaga ran mammemper a maitudoꞌ nin abas banaꞌ ta sya a nangipyawan nin say pammaga konran saray tutawo nan Dios. Matkap et a amboꞌ yan marangas tan amboꞌ yan maisasager tan amboꞌ yan mabubok. Matkap a amboꞌ yan abusado tan amboꞌ yan maapes sa kwarta. 8 Ana edet, matkap a mapananꞌili ya, kaririktan nay mabistan pigagawaꞌ, pirmi nin kusto a pangingisip na, matunong ya, maringgas a pinanakem na, tan mapukpukan nay lalaman nan diri. 9 Matkap anamaet nin mapaꞌget a pangangakay na nin si tutuon minsahi nin mapagmatalkan a nangibwat konan Dios.
Matkap nin wanin banaꞌ ta sa pangangakay nan saytin tutuon akay ket mapaꞌget nay pammemper ran kapada nan mammemper tan maipaꞌkit na a saray mangkumuntra sa katutuꞌwan ket iti sara sa abas.
Matkap nin Patgenen nasara ni Tito a Mampangyakay nin Abas
10 Wanin ta abaw saradsen komoyo a kai marabay nin tumulok sa tutuon akay a gagara ran lingwen rasaray kalalamoꞌ ra sa uakay ra a kasan kakanaan. Kaꞌbawan konran sarayti ket saray mammemper nin Judio. 11 Matkap nin patgenen mosara in ta main nin abaw nin intiron pamilya a manlingwen ra banaꞌ sa pangangakay ra nin amboꞌ nin manepeg nin iyakay, tan say gagara ra nin mangyakay ket makapadingꞌey, say magkakwarta sara.
12 Saya intaw nin tawo a kapada ran taga Creta a sya manꞌikwinta yan sayay prupita, wana “Saray tagadti sa Creta, ugaliꞌ ray mibulaꞌ-bulaꞌ, baraꞌmon mabayanin ayep a pigagawaꞌ ra. Matamlad sara tan masibaꞌ sara.”
13 Sain nin wana ket tutuo anaod. Kanyaꞌ nin ikapuet mosaran maong ta pigaw nin maipteg a pammemper ra, 14 tan ta pigaw nin kai rayna nin pirdyen a tyimpo ra nin rumngeꞌ sa pinabri-pabrikan istu-isturya ran Judio tan ta pigaw nin kai rayna nin sunuren a igan-gan ran saray mangkumuntra sa katutuꞌwan nan Mabistan Patandaꞌ.
15 Si sayay tawon say kanakman na ket naparinggas ana, ibilang naynan maringgas a sarban bagay. Baleꞌ saray tutawon say kanakman ra ket kai et nin naparinggas tan kasan pammemper ra konan Dios, kasa gapo nin ibilang ran maabig banaꞌ ta baraꞌmo nin say sarba ket namansawan ana nin kadukaan nin kanakman tan kunsinsya ra. 16 Manꞌibaritaꞌ ra a katandaꞌ rayayna a Dios baleꞌ say gawaꞌ-gawaꞌ ra ket kuntra sa manꞌibaritaꞌ ra. Guraꞌ nasaran Dios, suplado sara tan kai sara gapo nin makagwaꞌ nin animan a manepeg.