3 Wanin anamaet, bibilinen mosara a mangatuntawon bubbayi. Ibibilin mo konra a magkabyay sara nin maibagay nin kabibyay ran tutawo nan Dios. Matkap a andiꞌ sara nin mamadukaꞌ tan andiꞌ sara nin mabubok. Ana edet, mangyakay sara nin sarban maabig, 4 ta pigaw nin maakayan rasaray malalagoꞌ et nin bubbayi nin magꞌin nin mapangadoꞌ konran asawa ra tan aꞌnak ra.

5 Matkap a maakayan rasarayti et a malalagoꞌ nin bubbayi nin matkap a mapagdangkaꞌ sara sa lalaman ran diri, malinis a kabibyay ra, maasikaso sara sa pammali ra, mabistay ugaliꞌ ra, tan paisirong sara konran asawa ra. Ket no wanin a pigagawaꞌ ran malalagoꞌ et nin bubbayi, kasa nin makapagꞌirgo nin dukaꞌ nin kuntra sa minsahi a nangibwat konan Dios.

6 Wanin anamaet a lamang, bibilinen mosara a malalagoꞌ et nin lulalaki a matkap a mapagdangkaꞌ sara sa lalaman ran diri.^a 7 Siꞌka anamaet, Tito, matkap a sa sarban bagay ket magꞌin kan ihimplo konra sa pangngawaꞌ mo nin maabig. Sa pangangakay mo, matkap a malinis a gagara mo tan kumpruntado sa minsahi nan Dios nin manꞌiyakay mo. 8 Say susaritaꞌ mo ket matkap a peteg nin kusto a kasa gapo nin makapamalaw a sayti ket abas, ta pigaw nin saray mampanguntra kontamo ket dumingꞌey sara ta kasan maibaritaꞌ ran maipamadukaꞌ kontamo.

9 ^bBibilinen mosara anamaet a uaripen nin mammemper a paisirong sara konran amo ra tan matkap a makapaririket sara konra sa sarban pagsisirbi ra. Matkap a andiꞌ sara nin umba-umbat konra 10 tan andiꞌ sara nin mangalap nin ikon ran amo ra, no kai edet, ipaꞌkit ra sa sarban kimey ra a peteg a mapagmatalkan sara. Ket no wanin a pigagawaꞌ ran ualilaꞌ a mammemper, maipaꞌkit ra sa tutawo a kabistawan nin uakay maipaꞌkaꞌ konan Dios a Mangingisalba tamo.

11 Anaod, nipaꞌkit nan Dios a kamaungan na a yupaꞌ sa sayti ket maisalba atamon sarban tawo. 12 Sa nipangipaꞌkit nan saytin kamaungan na, ket manꞌiyakay natamo nin gurutan tamoynay pagkakabyay nin subag sa no ani a rabay na tan say dukaꞌ a manꞌapesen ran saray amboꞌ nin mammemper kona. Manꞌiyakay na et kontamo a magkabyay atamoyna nin mapagdangkaꞌ sa lalaman tamon diri, nin mapteg tan kumpruntado sa no ani a rabay na leleg a mangkabyay atamo et iti konan sitin mundo. 13 Matkap anaod a wanin a pagkabyay tamo legꞌan a mantagaꞌnan tamoyaytaw si makapaririket kontamo a mansiguradwen tamo, say pakaꞌkit tamo liꞌ sa kataꞌgayan na ni Jesu-Cristo no sumubliꞌ yaynadti. Sya, makapangyayadiꞌ nin Dios tan Mangingisalba tamoya.

14 Nigagara nan nibi a byay na para kontamo, ta pigaw nin galten natamo sa pakauray nin sarbaynan kadukaan, tan ta pigaw nin paringgasen natamo nin magꞌin atamon tutawo na nin masuet nin gumwaꞌ nin maabig.

15 Sarba anaod nin sain, iyakay mo konran mammemper isen, a bibilinen mosara tan ikapuet mosara no main nin mangkaꞌkit mon abas a gawaꞌ ra. Sa pangwaꞌ mo nin sain, ipakanaꞌ moy pakayadiꞌ a nibi komo. Andiꞌ mo nin aburuyan a kai raka nin kabilangan.