3 Wanin anaod ta mataman nin siꞌtamo, sin saytaw ket kurang anamaet a pakatandaꞌ tamo maipaꞌkaꞌ konan Dios tan masubag atamo intaw kona. Liningu-lingo atamo tan nibarang atamo nin amboꞌ nin kuston akay tan inaripen atamo nin nagsikabarang nin bakas nin kadukaan tan riga nin naimundwan. Nagkabyay atamo et intaw nin napnoꞌ nin kadukaan tan imbel. Guraꞌ ratamo nin kapada tamon tawo ket guraꞌ tamo sara anamaet.

4 Wanin man a kapapaꞌsar tamo, si Dios a Mangingisalba tamo, sin narateꞌ a panaon nin nipatandaan nay kamaungan na tan pangangadoꞌ na kontamo ket, 5 nisalba natamo. Nisalba natamo anaod amboꞌ nin banaꞌ ta nangwaꞌ atamo nin maabig, no kai banaꞌ tamoꞌ sa ingangaꞌdo na kontamo. Nisalba natamo a bilang nin naiyanak atamon uman banaꞌ sa gawaꞌ na nin Ispirito na nin mampalinisen natamo tan manꞌumanen na a pitatawo tamo. 6 Siti anaod nin Ispirito na, nibi naya nin Dios kontamo nin sibubulos banaꞌ sa ginwaꞌ na ni Jesu-Cristo a syay Mangingisalba tamo. 7 Si gagara a ginwaꞌ na in anaod nin Dios ket ta pigaw nin yupaꞌ sa kamaungan na kontamo ket ikwinta natamo nin mapteg tan magkamain atamo nin anggan-angga nin byay a iti konan Dios a siin a manꞌilalwan tamoyna sawanin. 8 Sain nin nibari-baritaꞌ ko ket peteg nin tutuo. Kanyaꞌ nin rabay kon iyakay mo in nin maong konran saray mampagmatalek konan Dios isen, ta pigaw nin magꞌin saran maseseg nin pirmi sa pangngawaꞌ nin maabig. Sain nin uakay ket pinasya nin andaꞌ tan makapami nin kaabigan sa sarba nin tawo.

9 Anamaet baleꞌ, palꞌisan moy pididiskusyon a kasan kabalikasan, say maipaꞌkaꞌ konran abaw a mitutumbok nin pupuon, say pipupurpya tan piaaway maipaꞌkaꞌ sa Gugan-gan a nibi kona ni Moises. Palꞌisan mo in anaod banaꞌ ta sain ket kasan maabig nin maibi tan kasan kakanaan. 10 No main nin tawon mampanidaꞌ nin uksoy ran mammemper, imaꞌnwen ma sa man-gawꞌen na. Ket no nirwa mayna liꞌ nin inimaꞌno ket kai ya et nin mangrengeꞌ, kasaynan kabiangan mo kona a kwinta amboꞌ maynan kalamoꞌ, 11 banaꞌ ta tandaꞌ mo a siti nin tawo ket nabarang yayna ta mataman nin tandaꞌ naynan kasalanan ti a man-gawꞌen na ket manꞌituloy na et a lamang.

12 Ibakiꞌ koyadsen komo si Artemas o si Tiquico. Ket no rinmateꞌ yaynadsen liꞌ a siꞌnuman konra, ipamuspusan mon makodtaw kongko sa syudad nin Nicopolis, ta itaw ako liꞌ leleg nin panaon nin marayꞌep. 13 Maipaꞌkaꞌ kona ni Zenas a abugado tan si Apolos, gawꞌen moy anggawan nin mababaꞌ mo nin matulungan mosara sa kaiibwat ra. Siguradwen mo nin main a sarban matkap ra. 14 Matkap a maadal ra anamaet nin kalalamoꞌ tamon mammemper isen a pakaseseg nin gumwaꞌ nin maabig, ta pigaw nin tulungan rasaray peteg nin makatkap nin tulong. Wanin anaod a gawꞌen ra ta pigaw nin say byay ra ket main nin mabistan bunga.

15 Mampakumustawen raka nin sarba ran kalalamoꞌ kodti. Iparateꞌ mo pa a pammakumusta mi anamaet konran bubsat tamo sa pammemper isen a mampangawaꞌnan komi.