3 Kiranod ka nin mangirangep nin abaw a dyaꞌdyaꞌ bilang sayay naipasal a sundaloꞌ nan Cristo a si Jesus. 4 Matkap a si sayay kapresan a sundaloꞌ, kai yayna kibiang-biang sa gugawaꞌ ran saray amboꞌ nin sundaloꞌ ta apes nan paririketen nayay kumandanti na. 5 Wanin anamaet a lamang konan sayay kilumbaꞌ nin malayo; no kai na nin sunuren a riglaminto konan sitin ikap, kai ya nin mabyan nin primyo.^a 6 Anamaet a lamang, si matkap a muꞌna anaod nin minabang sa naprudukto sa nimula ket si mangmumula nin nagkapagal.^b 7 Isip-isipen moytin manꞌibari-baritaꞌ ko ket anaod si Catawan, ipatarusan na liꞌ komo ngaꞌmin a sarban saytin bubagay.

8 Isipen ma anaod si Jesu-Cristo. Sya, puri naya ni Adiꞌ David^c tan sya, pinasubliꞌ nayan mabyay nin Dios, a say maipaꞌkaꞌ sa sayti ket matandaan sa Mabistan Patandaꞌ a manꞌiyakay ko. 9 Banaꞌ anaod sa pangangakay ko nin siti ket mampangirangep akon abaw a dyaꞌdyaꞌ sawanin tan nakakadina ako et nin mangkapriso a bilang sayay kriminal baleꞌ say pakaipatandaꞌ nin minsahi a nangibwat konan Dios ket kai nin makadinawan. 10 Wanin anaod kanyaꞌ nin siaanos kon manꞌitpel a sarban idap para konran tutawon piniliꞌ nan Dios, pigaw nin magaꞌmuran ra anamaet a pakaisalba a mangibwat konan Cristo a si Jesus ket kalamoꞌ raya liꞌ a Dios anggan-angga.

11 Oꞌ saytin susaritaꞌ ket peteg nin tutuo:

14 Ipapanemtem mo in a katutuꞌwan konran mammemper isen, tan sa adapan nan Dios, bibilinen mosaran palꞌisan ray mipupurpya maipaꞌkaꞌ sa kabalikasan tamoꞌ nin sari-saritaꞌ. Wanin ta, say pipupurpya ket kasan maabig a maibi, no kai pangibwatan ana edet nin pakasidaꞌ nin pammemper ran makarngeꞌ. 15 Siꞌka baleꞌ, asirtawen moy pangingipataros mo sa sain a katutuꞌwan a nangibwat konan Dios. Oꞌ, gawꞌen moy anggawan nin mababaꞌ mon magꞌin kan sayay trabahador nin makapaririket konan Dios, ket kasan sukat ikadingꞌey mo.

16 Palꞌisan moy kibiang sa irgu-irgo nin kasan kakanaan sa pangingikit nan Dios ta saray tawon sain a gawaꞌ ra ket manꞌikadayoꞌ rasaray raruma tan say lalaman ran diri konan Dios, 17 tan say uakay ra ket tumayak a bilang nin masakit a kanser. Saray rwa konran saray mampangyakay nin sayti ket sara si Himeneo tan si Fileto. 18 Kinmadayoꞌ sarayna sa katutuꞌwan ta manꞌibaritaꞌ ran nayadiꞌ anay nipamasubliꞌ nin mabyay konran nunati. Sa wantin manꞌibaritaꞌ ra ket mansidaen ray pagmamatalek ran raruma konan Cristo. 19 Wanin man, si paꞌsar pundasyon nin nipaꞌdeng nan Dios a mantukduan ran sarban mammemper ket maꞌget ya. Sarayti nin rwa ket naisurat itaw:

20 Sawanin, maipada atamo sa nagsikabarang a uagamiren sa alakin bali nan sayay mayaman. Amboꞌ nin sarba ket nagwaꞌ sa balitok o pirak, no kai main anamaet nin nagwaꞌ sa basta kayo o lutaꞌ. Main nin agamiren nin usaren no main nin ispisyal nin ukasyon, tan main anamaet nin agamiren para basurawan nin itampal. 21 Kanyaꞌ nin si siꞌnuman a kumadayoꞌ sa kadukaan ket maipada ya sa sayay mablin agamiren. Nitalaga nay byay na konan Uunuren ket mausar naya tan lawas a nasadyaꞌ ya para sa animan a maabig a gawaꞌ.

22 Anaod, kadayꞌan mo a dukaꞌ a manꞌapes-apesen ran gawꞌen nin saray malalagoꞌ et a kapada mo. Wanin et, ipamuspusan mo a lawas nin mapteg a pigagawaꞌ mo, tan magꞌin lalo kaynan mapagmatalkan tan mapanglabi tan makakituno^e konran kalalamoꞌ mon mampangrayo konan Catawan nin main malinis nin kanakman. 23 Andiꞌ mo nin pamirdyan nin udas a pididiskusyon a kasan kabalikasan nin kapada ran saray tutawon kurang a tandaꞌ. Tandaꞌ moynan peteg a sayti a pangibwatan nin piaaway nin tutawo. 24 Wanin ta, matkap a si sayay trabahador nan Catawan ket kai ya nin kiaway-away, no kai edet, matkap nin mauyamoꞌ ya sa sarba, maong yan mangyakay tan mapamasinsya ya no main nin abas a ginwaꞌ kona. 25 Matkap a ipatunong nasaran siuuyamoꞌ a mangkumuntra sa uakay nan Dios, awaꞌ lamang nin pangibwaten na a magbabawiꞌ sara tan alilbien raynay katutuꞌwan. 26 Ket sa wanin, makabulos sarayna sa paꞌsar nipanglaꞌwan nan Dimunyo a syay mampangaꞌget konra ta pigaw nin gawꞌen ra no ani a rabay na.