2 Surat koyayti komo Timoteo^a, a manꞌikwinta kon anak kon diri a mabli kongko.

Sapa kumon ta si Dios a si Ama tan si Uunuren tamon Cristo a si Jesus, lawas a bindisyunan raka, ingangaꞌdwen raka tan byan raka nin mabistan kapapaꞌsar.

3 Kisalamatan koya banaꞌ komo a Dios nin nagsirbyan ran pupuon ko tan mampagsirbyan ko anamaet nin tandaꞌ ko a kusto a gawaꞌ-gawaꞌ ko. Ket, awro tan yabi, panemtemen taka no dumasal ako. 4 Mapanemtem koy kaaakis mo sin nipatanidan atan rwa, kanyaꞌ nin masulit akon maꞌkit ka ta pigaw nin maliso a ririket ko. 5 Mapanemtem ko anamaet a peteg nin pagmamatalek mo konan Cristo, a bilang anaod sa pagmamatalek na ni Loida a baying mo tan ni Eunice a inay mo. Sigurado ako a sain nin pagmamatalek mo ket sawanin kapada nin pagmamatalek ra.

6 Ket ta wanin anaod, manꞌipapanemtem ko komo a mas lalo mo et nin usaren nin maong sa pagsisirbi konan Dios a pakababaꞌ a nipuyaꞌ na komo sin nipababo koy gamet ko sa ulo mo sa nipangibakiꞌ komo. 7 Anaod, si Dios, say ipuyaꞌ na ket pangibwatan nin pakayadiꞌ tamo tan nin pangangadoꞌ tamo tan nin pagdadangkaꞌ sa lalaman tamon diri, amboꞌ nin pagꞌinen atamon takrot.

8 Anaod, andiꞌ ka nin madingꞌey nin mangipatandaꞌ nin maipaꞌkaꞌ kona ni Jesus a Uunuren tamo, o banaꞌ ta mangkapriso ako banaꞌ sa pagsisirbi kona, no kai edet, sa pakayadiꞌ nan Dios ket kipasaya ka kongko sa pangingirangep nin abaw a dyaꞌdyaꞌ anamaet banaꞌ konan Mabistan Patandaꞌ. 9 Anaod sa sain a pakayadiꞌ nan Dios, nisalba natamo ket kinayaban natamo nin magꞌin atamon tutawo na nin naitalaga kona. Ginwaꞌ nayti amboꞌ nin banaꞌ sa gugawaꞌ tamo, no kai banaꞌ sa gagara na tan sa kamaungan na. Saytin kamaungan na, nigagara naynan gindat nin ipagaꞌmuran kontamo sin saytaw et sin baꞌyo nin tinmaranaꞌ a sarba yupaꞌ sa gawꞌen na nin Cristo a si Jesus. 10 Ket padaran nan nipaꞌkit anayti anaod nin kamaungan na sin pinaitawo yay Cristo a si Jesus a Mangingisalba tamo. Inanggawan nay pakayadiꞌ nin patiti, ket nipadar na a peteg nin magnayon a byay yupaꞌ konan Mabistan Patandaꞌ. 11 Ket sinuyoꞌ nakon Dios nin ibabakiꞌ na ta pigaw nin ipatandaan tan iyakay koyaytin Mabistan Patandaꞌ. 12 Siin a rason no mayin a mampangirangep akon wanti ket, kai ako gapo nin madingꞌey. Anaod, katandaꞌ koyay Dios a syay mampagmatalkan ko tan sigurado akon main pakayadiꞌ nan prutiksyunan a byay ko a nitalek ko kona^b anggan sa awron paninintinsya na.

13 Say kuston adal a narngeꞌ mo kongko, sain a tumbuken mo sa pangangakay mo ket legꞌan nin man-gawꞌen mo in ituluy-tuloy moy pagmamatalek tan pangangadoꞌ a nagkamain komo banaꞌ sa nikaipasaya mo konan Cristo a si Jesus. 14 Sa panunulong nan Ispirito nan Dios a mampiikap kontamo, pagawan mon maong in say mablin nitalek nan Dios komo.

15 Sawanin, tandaꞌ mon peteg a ginurutan rakoyna nin dandani sarba ran saray isen sa prubinsyan Asia a mamper kona ni Jesus, pati sara si Figelo tan Hermogenes. 16 Baleꞌ si Onesiforo, pirmi nan pinaksaw a nakem ko, kanyaꞌ nin mandawaten ko konan Uunuren tamo a tulungan nasara kumon a pamilya na. Mataman nin nakapriso ako ket kai nako nin nikadingꞌey. 17 Ana edet, sin nakarateꞌ yadti sa syudad nin Roma ket, nipamuspusan nakon dinumog angga sin naꞌkit nako. 18 Tandaꞌ mo anamaet a kukaabigan a ginwa-ginwaꞌ na kongko isen sa Efeso. Ket anaod, gun-gunawan naya liꞌ kumon nin Uunuren sa awron paninintinsya na.