Inawit ya si Pablo sa Roma
27
Sawanin, sin naidisisyon a sumaki kami nin mako sa Italia, nipagamet ya si Pablo tan saray raruma et nin priso konan sayay upisyal nin grupo ran sundaloꞌ a mantawagen nin “Sundaloꞌ nan Impirador,” a say ngaran na Julio. 2 Itaw sa Cesarea, rinmuran kami sa saya nin bapor nin ibat sa Adramicio a siti ket adap na sa saka-sakalakon pwirto sa prubinsya nin Asia. Kalamoꞌ miya ni Pablo si Aristarco nin taga Tesalonica sa prubinsyan Macedonia. 3 Sin sinmunor nin awro, dinmuong kami sa babali nin Sidon. Naundoꞌ ya si Kapitan Julio kona ni Pablo, ket inaburuyan nayan pasya-pasyaren nasaray uamigo nadtaw ta pigaw nin mabyan rayan say matka-matkap na. 4 Ket nibwat yadtaw a bapor nin rinuranan mi. Banaꞌ ta sungsong yay siri, nangliklik kami sa rigri-rigrig nan isla nin Cyprus nin masalipneꞌ sa siri. 5 Linabasan mi a temben nin prubinsyan Cilicia tan Pamfilia, miꞌsa kami nin dinmuong sa syudad nin Mira sa prubinsyan Licia. 6 Itaw si upisyal ran sundaloꞌ, main nin nadumog nan bapor nin ibat sa Alejandria a adap na sa Italia ket niyalis nakamin niruran konan siti.7 Maedeed a kadadaras mi sa luob nin abaw a awro ket idap mi baꞌyo kami nin nirateꞌ sa temben nin babali nin Cinido. Banaꞌ ta sungsong ya anamanaet a siri, itaw kami nin dinmalan sa rungos nin Salmon, linmiklik kamin nangrigri-rigrig sa isla nin Creta nin masalipneꞌ sa siri. 8 Nangrigri-rigrig kami, ket idap mi baꞌyo kami nin nirateꞌ sa sayay lugar a mantawagen nin Mabistan Duduungan itaw sa danin syudad nin Lasea.
9 Abaw ana a awro nin nikaatrasa mi ket nayadiꞌ anay panaon nin pagkukulasyon.a Kayadiꞌ nan siin nin panaon, piligruso ana a sumaki, kanyaꞌ nin mapilit nin wana ni Pablo konra nin upisyal, 10 “Uamigo, maꞌkit ko a piligruso no ituloy tamoy kasasaki tamo ket abaw a mapirdi nin karga tamo tan kona nin bapor, tan magwaꞌ a maꞌmet et a byay tamo.” 11 Baleꞌ mas rinngeꞌ nan upisyal ran sundaloꞌ a irgo ra nin si Kapitan nan bapor tan si main nin ikon konan bapor dyan say wana ni Pablo. 12 Banaꞌ ta si lugar nin dinuungan mi ket amboꞌ yan mabistan pamalabasan nin tyimpon marayꞌep, rabay ran kaꞌbawan a ituloy mi anay sumaki awaꞌ lamang a mirateꞌ kami sa Fenix. Duduungan yayti sa isla nin Creta a adap ya sa amyanan nin panrupan tan sa bagatanan nin panrupan ket magwaꞌ yan palabasen a tyimpon marayꞌep iti.
Si Bagyo sa Taaw
13 Sin sain, sumiplu-siplog ya tamoꞌ a timog kanyaꞌ nin sa wanra ket magwaꞌ raynay tumuloy sa gagara ran keen. Kanyaꞌ nin inarwas raynay pundo tan nangrigri-rigrig sarayna sa islan Creta.
14 Baleꞌ amboꞌ nin naꞌteng, rinmateꞌ yay pinasyan kasaw nin sirin dugudog nin ibat sa isla, 15 ket inasok nayay bapor. Kai ya nin makasungsong sa siri kanyaꞌ nin pinauryan miyayna nin mipadpad. 16 Pinairigrig kami sa adanin salipneꞌ nin parti nan isla nin Cauda, mataman nin maidap ket nipamuspusan mi nin naisapwat ya sa bapor a buti. 17 Sin naisapwat rayaynay buti, tinaker rayan namalibed nin rubir a bapor ta pigaw nin kai ya nin mawagwag. Sa liꞌmo ra nin misadsad ya sa bengbeng sa damir nin Libya, niluslos ray layag tan pinalasta ray agamiren ket kutaw-kutaw kami tana. 18 Ket, sin kabuklasan, sin kasan paꞌwatan na nin bagyo, ninabuꞌ-naboꞌ raynay raruma nin kargaminto. 19 Sin sinmunor nin awro ket wantaw et nin lamang a tyimpo, kanyaꞌ nin ninabuꞌ-naboꞌ raynay raruman agamiren. 20 Abaw a awro nin kai miya nin naꞌkit a awro tan kai kami nin nakaꞌkit nin bituen ta talagan kasan paꞌwatan na nin bagyo, ket mas lalo kami anan nakasawan nin ilalon malibri et.
21 Abaw a awro ana a kai sara nin nangan, ket sin sain, inumdeng ya si Pablo tan wana konran kalalamoꞌ na sa bapor, “Kalalamoꞌ, no rinumngeꞌ kamo tamoꞌ kumon kongko ket kai atamo kumon nin nibwat itaw sa Creta, kai atamo kumon nin napaidap tan napirdyan nin wanti. 22 Baleꞌ siti sawanin a ibaritaꞌ ko komoyo: Paksawen moyoy nakem moyo. Kasa gapo nin siꞌnuman kontamo a makaꞌmet nin byay na; wanin man si bapor ket mawagwag ya. 23 Maibaritaꞌ kon wanin banaꞌ ta si sayay anghil na nin Dios nin main nin ikon kongko tan syay mampagsirbyan ko, nipaꞌkit ya kongko nayabi, 24 ket wana kongko, ‘Andiꞌ ka nin maliꞌmo, Pablo! Matkap a umadap ka konan Impirador. Alang-alang komo, isalba na nin Dios a byay ra nin sarba ra nin kalalamoꞌ modti sa bapor.’ 25 Kanyaꞌ nin mipatpel kamo, bubsat! Mampagmatalek ako konan Dios a mangyadiꞌ a sarba nin bilang sa nibaritaꞌ na nin anghil. 26 Baleꞌ matkap a maipadpad atamo sa sayay isla.”
27 Ikalabinꞌaꞌpat a awro mi anan iti sa butlay nin Taaw Mediteraneo nin manꞌiyanur-anor nan bagyo. Sin banda nin kapikngaꞌ nin yabi, naidyawan ran saray tripulanti a adani kami ana sa abay. 28 Say ginwaꞌ ra, tinukod ray kaararman nin ranom ket naꞌkit ran rwampuloꞌ nin dupa. Nainsanan nin bugaꞌ tinukod ra anamana ket labinliman dupa ana. 29 Masalak saran bangliꞌ no misadsad sara sa babato kanyaꞌ nin nanginaboꞌ saran aꞌpat ray pundo sa ulin. Nidasal-dasal ra nin buklas ana kumon.
30 Ket saray raruma konran tripulanti naisip ran lakwanan rayayna a bapor, kanyaꞌ nin nikayupaꞌ rayay buti a kano wadiꞌ ket manginaboꞌ saran pundo sa dulong. 31 Sin sain, wana ni Pablo konan upisyal tan konran sundaloꞌ na, “No kasa saradti in, kai atamo gapo nin malibri.” 32 Kanyaꞌ nin pinutol ran sundaloꞌ a rubir na nin buti tan pinauryan raya nin naanor.
33 Sin dandani ana nin parbangon, masuet nan dinawat-dawat ni Pablo sa sarba a mangan ta mangan sara. Wana, “Labinꞌaꞌpat a awro ana nin aburido kamon mantumaꞌgan tan kai kamo nin mampangan. 34 Sawanin, ibaritaꞌ ko komoyo, mangan kamo ta pigaw nin main nin kasaw moyo nin umadap sa saytin idap; kasa gapo nin mangno komoyo.” 35 Kayadiꞌ na nin nibaritaꞌ in ni Pablo, nangalap ya nin tinapay, tan sa adapan nin sarba ket nikisalamat ya konan Dios. Miꞌsa, namping ya tan kinnan na. 36 Napaksaw a nakem nin sarba ket nangan sara. 37 Rwanyasot tan pitumpuloꞌ tan aꞌnem kami ngaꞌmin. 38 Sin nayadiꞌ sarayna nin nangan, ninabuꞌ-naboꞌ rayna sa taaw a karga ra nin trigo ta pigaw nin yumꞌan yay bapor.
Nawagwag yay Bapor
39 Sin mapalaway ana, main nin natamuraw ra nin lutaꞌ baleꞌ kai ra nin maalilbiꞌ no anin lugaran ya. Baleꞌ itaw main nin naꞌkit ran bungangaꞌ nin ranom a bubuyangin ya kanyaꞌ nin naisip ra nin isadsad rayadtaw a bapor no magwaꞌ. 40 Kanyaꞌ nin binulusan ray pundo tan winarwar ray taker nin ugit. Binukaꞌ ray layag sa adapan ta pigaw nin awiten nayan siri a bapor sa abay. 41 Baleꞌ naisadsad ya sa bubuyangin tan naikutkot ya a dulong ket kai yayna nin makaalis. Winagwag ya anamaet nin alalakin daluyon a ulin.
42 Sin wanin, naisip ran sundaloꞌ a patye-patyen rasaraynay priso ta pigaw nin kasa konra a makatangoy nin malayo. 43 Baleꞌ rabay nan upisyal a mabyay ya si Pablo, kanyaꞌ nin pinaed nasaray sundaloꞌ sa plano ra. Nuꞌna nasaran pinalukso ngaꞌmin a magtandaꞌ nin tumangoy ta pigaw nin mako sarayna sa abay. 44 Saray kai nin magtandaꞌ nin tumangoy, pinangalap nasaran pipatawan ran kayo o raruman parti nan sidaꞌ nin ulin nan bapor. Wanin a ginwaꞌ angga sin nakaabay kami ngaꞌmin.