3 Nako ya nin nangalap nin sakaawit nin kayo si Pablo, ket sin ikwa nayna sa apoy, main nin linumwaꞌ nin ulay banaꞌ ta maꞌmot, ket kinayat naya sa gamet si Pablo tan itaw ya nin katin-katin. 4 Sin naꞌkit ran tutawodtaw a katin-katin yay ulay sa gamet na ni Pablo, wanra sa saya tan saya, “Mangmamati yayti angangko nin tawo, ket mataman no nalibri ya sa bagyo sa taaw, kai nin iyaburoy nin langit a mabyay ya et.”

5 Baleꞌ niweleg naya tamoꞌ ni Pablo a ulay sa puor nin kai ya gapo nin nangno. 6 Tinaga-tagaꞌnan ran tutawo nin mabayaꞌ-bayaꞌ ya si Pablo o matumba nin nati ana. Baleꞌ sin naꞌteng saraynan mantumaꞌgan ket kasan nangyadiꞌ kona ni Pablo, nasilyan a manꞌipaꞌkaꞌ ra kona. Wanra, “Saya ya nin dios!”

7 Amboꞌ nin adayoꞌ itaw sa kamiꞌnan mi a lutaꞌ nan si pangulo konan sitaw nin isla a say ngaran na Publio. Banaꞌ sa kamaungan na, pinagtuloy nakamin tuloy awro sa bali na. 8 Sin sain, nakaidaꞌ yay tatay na ni Publio ta mangkaꞌmu-kaꞌmot tan mitakliꞌ ya. Kinaꞌ naya ni Pablo sa kwarton kamiꞌnan na; nidasalan naya tan nipababo nay gamet na kona, ket sin sain a lamang inmandaꞌ ya. 9 Banaꞌ konan siin nin nangyadiꞌ, nagsirateꞌ saray raruma et nin main nin masakit itaw sa isla, ket pinaandaꞌ nasara ngaꞌmin. 10 Abaw a narisibi min pakaꞌkitan nin pammagalang ra, tan sin mibwat kami ana konan sitaw nin lugar, nibi ray sarban matkap mi sa pagbibyahi mi.

11 Itaw kami konan sitaw nin isla nin tuloy bulan, miꞌsa kami nin nibwat ana nin ruran nan sayay bapor nin ibat sa Alejandria a namalabas nin panaon nin marayꞌep iti sa isla. Say ngaran nan bapor a ibat sa ngaran ran dios-dios a singin ket Castor tan Polux. 12 Dinmuong kami sa syudad nin Siracusa^a ket itaw kami yapoꞌ nin tuloy awro. 13 Kaaram, nituloy mi ana a sinmaki ket nirateꞌ kami sa babali nin Regio^b. Sin sinmunor nin awro, bulon miyay timog ket nirateꞌ kami sa duduungan nin Puteoli sa luob nin rway awro. 14 Ket itaw main nin nadumog min mammemper kona ni Jesus ket sinagyat rakami nin itaw yapoꞌ nin pitoy awro. Miꞌsa, nangibwat itaw, nituloy mi ana a kappikaꞌ mi sa Roma.

15 Sin natandaan ran saray mammemper itaw sa Roma a rumateꞌ yayna si Pablo, main saraytaw saray sinumnaꞌ komi sa Palingki nin Apio, tan main sara et a sinumnaꞌ komidtaw sa mantawagen nin Tulon Balin Pagtutuluyan.^c Sin naꞌkit nasara ni Pablo, nikisalamat ya konan Dios tan kinumsaw a nakem na.

16 Sin nirateꞌ kami sa Roma, naaburuyan yan miikap si Pablo no adti na nin rabay, tamoꞌ ta main nin gwardya na.

17 Napalabas a tuloy awro, sinagyat nasara ni Pablo a pupangulo ran Judio nin itaw sa Roma ta pigaw nin miaadap sara. Ket sin niaadap sarayna wana konra, “Bubsat, mataman no kasan ginwaꞌ kon animan nin kuntra konran kapada tamon Judio o sa kaugalian nin naimatawan tamo konran pupuon tamo, nipagamet rako nin sayay priso mangibwat itaw sa Jerusalem konran upisyalis nin gubyirno nan Roma. 18 Mayadiꞌ rako nin inusisaꞌ nin upisyalis nin Romano, bulusan rakoyna kumon ta kasa anamaet nin napaliwaꞌ ran ginwaꞌ ko nin nepeg kon pakadusawan nin patiti. 19 Baleꞌ kai sara nin nikikumpurmi a pupangulo tamo nin Judio, kanyaꞌ nin napilitan ako nin dinawat kon iyadap akon mausisaꞌ konan Impirador nan Roma.^d. Kasa gapo nin riklamo ko kuntra konran kapada tamon Judio. 20 Banaꞌ sa wanin nin nangyadiꞌ a rason nin dinawat kon makaadap tan makairgo katamo. Banaꞌ sa pagmamatalek ko sa nipangakoꞌ nan Dios kontamon puri na ni Israel a peteg nin rason a nakakadina ako.”

21 Ket wanra kona, “Kasa gapo nin narisibi min surat nin ibat sa Judea nin mangibaritaꞌ nin maipaꞌkaꞌ sa sain a nangyadiꞌ komo. Mataman anamaet nin saray kapada tamon Judio nin ibat itaw, kasa gapo nin nakairgo, o nagꞌirgo man nin kuntra komo. 22 Edet, rabay min marngeꞌ no ani a wamo ta tandaꞌ min abirno nin adti ket abaw a manꞌibari-baritaꞌ ra nin tutawo nin kuntra konan siin si grupo moyo.”

23 Sin sain, nangitandaꞌ sara nin awro nin piaadap ra anamanaet. Ket sin narateꞌ yay awro, abaw saray nako sa balin mampiikapan na ni Pablo. Nikakaawro nan nipata-patandaan tan nipapalaway a akay maipaꞌkaꞌ sa pagꞌaadiꞌ nan Dios a mangibwat sa Libron Gugan-gan nin nipataoy nin nipudir kona ni Moises tan sa nisurat ra nin prupita. Nipamuspusan na nin maayat nasaran mamper kona ni Jesus. 24 Main saray nasagyat sa nibaritaꞌ na tan main sara anamaet a kai nin namper. 25 Kai sara anaod nin makapitutuno. Ket baꞌyo sara nin nagsiibwat, wanti et a nibaritaꞌ na ni Pablo konra,

“Bagay komoyoytaw say nipaibaritaꞌ nan Ispirito nan Dios konran pupuon tamo a nibaritaꞌ na ni Prupita Isaias. 26 Wanti intaw a wana,

28-29 Wana et ni Pablo, “Anaod, matkap moyon tandaen a sitin minsahi nin maipaꞌkaꞌ sa pangingisalba na nin Dios, ipatandaan ya konran amboꞌ nin Judio ket rengꞌen raya!”^f

30 Rway taon anan itaw ya si Pablo sa Roma sa balin inabangan na. Sarba ran nako kona, inasikaso nasara. 31 Padaran tan kasa gapo nin namaed kona nin nipata-patandaan nay maipaꞌkaꞌ sa pagꞌaadiꞌ nan Dios tan kona ni Jesu-Cristo a syay Uunuren.