Dinawat na ni Pablo nin Mausisaꞌ nayan Impirador
25
Ket rinmateꞌ ya si Festo sa prubinsyan gaꞌgetan na. Napalabas a tuloy awro, nako ya sa Jerusalem nin ibat sa Cesarea. 2 Sin nagmiting sara nin pangangabrasa kona a Pupangulon Pupadiꞌ tan saray raruma konran pupangulo ran Judio, niparateꞌ ra kona a riklamo ra kuntra kona ni Pablo. Masuet ran 3 dinawat nin pabor nayna konra a ipaiyater nayadtaw sa Jerusalem si Pablo. Wanin a dawat ra banaꞌ ta plano ra anamanaet nin saneban tan patyen raya si Pablo. 4 Baleꞌ say ubat na ni Festo konra, “Priso yadtaw sa Cesarea si Pablo. Sa amboꞌ ana nin maꞌteng ket sumubliꞌ akoynadtaw. 5 Mayi sara liꞌ kongko a pupangulo moyo tan iriklamo ra no main nin ginwaꞌ nan abas nin sitaw nin tawo.”6 Itaw ya et yapoꞌ nin walo o mapuloꞌ nin awro sa Jerusalem si Festo miꞌsa yayna nin sinmubliꞌ sa Cesarea. Sin sinmunor nin awro sin itaw yayna, tinmekreꞌ ya sa lugar nin panintinsyawan tan nipakalap naya si Pablo. 7 Sin itaw yayna si Pablo, inaribungbungan raya nin saray Judio nin ibat sa Jerusalem. Nagsikabarang nin mabyat a niparsa-parsa ra kona baleꞌ kasa gapo nin naiprisinta ran pammatutuo.
8 Wana ni Pablo nin pangidipinsa sa lalaman nan diri, “Kasan animan nin ginwaꞌ ko nin kuntra sa Gugan-gan tamo nin Judio, o sa Timplo, o konan Man-galangen a Impirador nan Roma.”
9 Rabay na ni Festo a mangalap nin rupa konra nin Judio kanyaꞌ nin wana kona ni Pablo, “No magwaꞌ ket mako atamo sa Jerusalem ta pigaw nin itaw ana, sa adapan ko nin bistawen a kaso mo.”
10 Inumbat ya si Pablo, “Iti akoyna sawanin sa kurti nin iti sa sakop nan Roma, ket iti ako nin manepeg nin masintinsyawan. Tandaꞌ moyo nin diri a kasan talagan animan a ginwaꞌ kon kuntra konran Judio. 11 No sinubag ko wadiꞌ a layi ket main nin ginwaꞌ ko nin manepeg a pakadusawan ko nin patiti, kai ko nin palaywan a mati. Baleꞌ no kasan katutuꞌwan a manꞌiparsa ra kongko, kasan siꞌnuman a main nin pakayadiꞌ nin mangipagamet kongko konra. Dawaten ko nin iyadap akon mausisaꞌ konan Impirador nan Roma.”
12 Nikiirgo ya yapoꞌ si Festo konra nin mammibilin na, miꞌsa wana kona ni Pablo, “Edet, ta dinawat mon iyadap ka konan Impirador, ikaꞌ ka konan Impirador.”
Kinmunsulta ya si Festo kona ni Adiꞌ Agripa
13 Napalabas a umnoy awro, rinmateꞌ saradtaw sa Cesarea si Adiꞌ Agripaa tan si busat nan si Berenice ta pigaw nin iparateꞌ ray pangangabrasa ra kona ni Festo. 14 Mayadiꞌ a umnoy awro nin itaw sarayna, nibaritaꞌ na ni Festo kona ni Adiꞌ Agripa a maipaꞌkaꞌ sa kaso na ni Pablo. Wana, “Main nin prisodti nin linakwanan na ni Felix. 15 Ket sin nako ako sa Jerusalem, saray Pupangulon Pupadiꞌ tan saray raruma konra nin pupangulo ra, niriklamo raya tan say rabay ra ket sintinsyawan koyan madusa. 16 Baleꞌ nibaritaꞌ ko konra a amboꞌ nin pigagawaꞌ nin Romano a basta sintinsyawan yay sayay tawon manꞌiriklamo nin kai sara yapoꞌ nin niaadap nin saray mampangiriklamo kona, ta pigaw nin mabyan yan pagkanawanawan ubatan nay riklamo kona. 17 Kanyaꞌ nin, sin saray nangiriklamo kona ket nako saradti kongko, kai koyna nin pinaꞌteng. Sin sumunor nin awro sin iti akoyna, tinmekreꞌ ako sa lugar nin panintinsyawan tan nipakalap koyaytaw si tawo. 18 Sin niaadap sarayna, say wangko no main nin mabyat nin kasalanan nin iparsa ra kona, baleꞌ kasa anamaet. 19 Kal-la say sangkinian ra ket maipaꞌkaꞌ sa rilihyon ra tan maipaꞌkaꞌ konan sayay tawon say ngaran na ket Jesus nin nati yayna baleꞌ ipasuet na ni Pablo nin mabyay ya. 20 Ket banaꞌ ta kai ko nin tandaꞌ no paꞌno koya nin gaꞌgetan a wanin nin kaso, tinepetan koya si Pablo a no magwaꞌ ket itaw yayna nin sintinsyawan sa Jerusalem. 21 Baleꞌ dinawat na a magmantinidti ta rabay nan maiyadap a kaso na konan Impirador nan Roma. Kanyaꞌ nin nigan-gan kon iti ya et nin priso anggan maipaiyater koyayna konan Impirador.”
22 Wana ni Agripa kona ni Festo, “Rabay koya anamaet nin marngeꞌ in nin tawo.”
“Dilap liꞌ,” wana ni Festo.
23 Ket, sin sinmunor nin awro, nilibot saran pinagalangan si Agripa tan si Berenice nin nisket sara bilang adiꞌ tan rina, tan sinumrep sara sa kurti nin inaluyon ran atataꞌgay nin upisyal ran sundaloꞌ tan saray atataꞌgay nin tutawodtaw sa Cesarea. Nipakalap naya ni Festo si Pablo; ket sin itaw yayna, 24 wana ni Festo, “Mapagalang a Adiꞌ Agripa tan sarba moyo nin iti sawanin, iti ya sawanin ti si tawon niriklamo ra kongko nin sarba ra nin Judio sa Jerusalem tan iti man sa Cesarea. Niburya-buryaw ra a kai yayna kano nin manepeg nin mabyay et. 25 Baleꞌ sa nipangusisaꞌ ko kona kasan animan nin naꞌkit ko nin ginwaꞌ na a nepeg nan pakadusawan nin mati. Ket banaꞌ ta dinawat nay maiyadap nin mausisaꞌ sa adapan na nin Impirador nan Roma, ipaiyater koyadtaw. 26 Baleꞌ amboꞌ akon sigurado sa kaso na, kanyaꞌ nin niyadap koya komoyo sawanin, laloyna komoyo, Adiꞌ Agripa, ta pigaw nin mayadiꞌ ma nin usisaen ket main nin maisurat ko konan Impirador a syay uunuren ta. 27 Wanin ta amboꞌ nin manepeg, para kongko, a ipaiyater koyadtaw a sayay priso nin kai ko nin maibaritaꞌ nin mapalaway no ani a riklamo kona.”