“Man-galangen a Gubirnador, banaꞌ sa kaungan mo nin mampangipangulo komi, main nin katinekan iti sa lugar mi sa anro ana nin panaon, tan abaw a mabistan nangumanan nan nasyon mi. 3 Alilbien mi anggan makaꞌnuman a utang mi nin maong a nakem para sa sarban mabistan ginwa-ginwaꞌ mo sa adtiman. 4 Kai ko nin rabay nin abaraen kamo, baleꞌ dawaten ko pa a anusan moyo a mangrengeꞌ sa anted nin ibaritaꞌ ko komoyo.

5 Naimatunan mi a siti nin tawo ket pirwisyo ya. Puon yan pigugulo ran Judio abirno nin adti ya nin mako tan syay lider nan grupo ran mantawagen nin Nazareno; 6-8 tan amboꞌ in tamoꞌ, no kai gawꞌen nayayna kumon nin basta-basta a Timplo mi, kanyaꞌ nin dinakep miya.^a No usisaen moya in, mapatutuꞌwan moyo a sarban riklamo mi kuntra kona.”

9 Ket sara anamaet a Judio nin itaw, tinistigusan ra nin tutuo a sarban nibaritaꞌ na ni Tertulo.

10 Sininyasan nayan magꞌirgo nin gubirnador si Pablo kanyaꞌ nin nagꞌirgo ya. Wana,

“Man-galangen a Gubirnador, tandaꞌ ko nin abaw nin taon ana a mapteg moyan man-gaꞌgetan ti si nasyon mi, kanyaꞌ nin maririket ako nin idipinsa koy lalaman kon diri sa adapan moyo. 11 No mangusisaꞌ kamo, mapiho moyo a labinrwan awro tamoꞌ et a napalabas, nako akodtaw sa Jerusalem ta pigaw nin mangrayo ako konan Dios. 12 Kai rako gapo nin naꞌkit nin kapada kon Judio nin nikidiskusyon sa siꞌnuman itaw sa sakop nin Timplo o nangwaꞌ nin gulo sa susinaguga ra, o adtiman sa Jerusalem. 13 Kasan maiprisinta ran pammatutuo sa manꞌiparsa ra kuntra kongko. 14 Akuen koyti e sa adapan moyo, Man-galangen a Gubirnador:

Mampagsirbyan koyay Dios a syan lamang a Dios nin nagsirbyan ra nin pupuon mi nin panunumbok ko konan siti si Baꞌyon Dalan a wanra nin saraytin tutawo ket saya nin pakiisyay. Mantepren ko anamaet baleꞌ ngaꞌmin a nipataoy nin nipudir kona ni Moises tan say naisurat sa lulibro nin nisurat ran prupita. 15 Bilang anamaet a lamang konran saraytin tutawo, mampagmatalek ako a pasublien na liꞌ nin mabyay nin Dios a sarban tutawo, matunong man o amboꞌ. 16 Banaꞌ ta wanin, manꞌipamuspusan ko a kasa lawas nin pakabalawan ko sa adapan na nin Dios, wanin et sa tawo.

17 Mayadiꞌ a umnoy taon a kasa akodtaw sa Jerusalem, sinmubliꞌ ako nin nangikaꞌ nin tulong nin kwarta konran kalugaran ko tan ta pigaw nin mangidaꞌton ako konan Dios. 18 Sin kapresan ko a mampangidaꞌton itaw sa Timplo ta nayadiꞌ koyayna nin ginwaꞌ a ritwal sa pakaparinggas sa kasalanan, main saray Judio nin ibat sa prubinsyan Asia a nakaꞌkit kongkodtaw. Umno ra tamoꞌ a tawodtaw tan kasa anamaet nin gulo.^b. 19 Saraytaw nin ibat sa Asia, sara kumon a nakodti komoyo nin nagriklamo no main wadiꞌ nin mairiklamo ra kuntra kongko. 20 Ket sarayti saray iti sawanin, mabista nin ibaritaꞌ ra no ani a ginwaꞌ kon kasusubag a napaliwaꞌ ra sin niyadap ako konran myimbro nin Kunsiho. 21 Si kal-la maitudoꞌ ra tamoꞌ ket si nitaꞌway ko sa adapan ran myimbro nin Kunsiho; wangko, ‘Iti ako sawanin nin sintinsyawan banaꞌ ta mampagmatalek ako a pasublien sara liꞌ nin mabyay a nunati.’ ”

22 Ket sin sain, banaꞌ ta abaw anay tandaꞌ na ni Gubirnador Felix maipaꞌkaꞌ konan siti si Baꞌyon Dalan, pinatgen nayna yapoꞌ a pangungusisaꞌ kona ni Pablo. Wana, “Mami ako liꞌ nin sintinsya no iti yayna si Kumander Lisias.” 23 Nibibilin na konan sayay upisyal a ituloy rayan gwardyawan si Pablo, baleꞌ andiꞌ raya nin irutan no kai edet, aburuyan rasaray uamigo na nin tulungan raya sa matka-matkap na.

24 Napalabas a umnoy awro, sinmubliꞌ yadtaw si Gubirnador Felix nin kalamoꞌ nayay asawa nan si Drusila a sayay Judio. Nipakayaban naya si Pablo tan nangrengeꞌ ya kona nin nangipapalaway maipaꞌkaꞌ sa pagmamatalek konan Cristo a si Jesus. 25 Baleꞌ sin nagꞌirgo yayna si Pablo maipaꞌkaꞌ sa kinamapteg, pagdadangkaꞌ sa lalaman nin diri tan sa rumateꞌ liꞌ nin awro nin pangungukom nan Dios, sinmalak ya si Felix kanyaꞌ nin wana kona ni Pablo, “Kustoyna yapoꞌ sawanin, ipakayaban kata liꞌ anamana no main nin udas ko.” 26 Mantaga-tagaꞌnan na anamain ni Felix a pasuksukan naya ni Pablo kanyaꞌ nin manꞌipakayaban nayayna nin manꞌipakayaban nin kairgo.

27 Napalabas a rway taon, sinilyan nayan gubirnador ni Porcio Festo^c si Felix. Ket banaꞌ ta rabay na ni Felix a mangalap nin rupa konran Judio, pinauryan naya sa priswan si Pablo.