23
Pinastang nasaran maong ni Pablo a nididinep itaw nin pupangulo miꞌsa wana, “Bubsat, legꞌan koynan mangkabyay tan angga et nin sawanin, tandaꞌ ko nin kusto a gawaꞌ-gawaꞌ ko sa adapan na nin Dios.”2 Sin narngeꞌ na in nin si Sangkataꞌgayan nin Padiꞌ a si Ananias, nigan-gan na konran saray iti sa dani na ni Pablo a muꞌmuen raya. 3 Wana ni Pablo, “Muꞌmuen naka liꞌ anamaet nin Dios, siꞌkadsen nin maong kano wadiꞌ! Nakatekreꞌ kadsen ta pigaw nin usisaen nako nin sigon sa wana sa Gugan-gan, baleꞌ mansubagen moy Gugan-gan sa nipangigan-gan mo a muꞌmuen ako.”
4 Ket wanran saray iti sa dani na ni Pablo, “Sukat a mampagsari-saritaan may Sangkataꞌgayan nin Padiꞌ na nin Dios!”
5 Wana ni Pablo, “Bubsat, kai ko nin tandaꞌ a sya a Sangkataꞌgayan nin Padiꞌ. Wanan mabasa sa Masanton Kasuratan, ‘Andiꞌ ka nin magꞌirgo nin kuntra konan si mampangipangulo komoyo nin tutawo.’a ”
6 Naꞌkit na ni Pablo a saray nididinep itaw nin pupangulo ket Pariseo saray raruma tan Saduseo sara anamaet a raruma; ket wana nin nipaksaw, “Bubsat, saya ako nin Pariseo tan saray mangatua ko ket Pariseo sara.b Iti ako sawanin nin mangkausisaꞌ banaꞌ sa pammemper tamo a pasublien sara liꞌ nin mabyay a nunati!”
7 Kayadiꞌ na nin nibaritaꞌ in ni Pablo, nididiskusyon saraynay Pariseo tan Saduseo ket natao yay grupo. 8 Kai sara nin nitutuno ta saray Saduseo ket kai sara nin mamper a pasublien sara liꞌ nin mabyay a nunati tan kai saran lamang nin mamper a main nin uanghil tan pinarsan kai nin maꞌkit. Sara baleꞌ a Pariseo ket mamper sara sa sayti.
9 Ket kinumsaw anan kinumsaw a pibuburyawan ra. Saray raruma konran Pariseo nin Madudunong sa Gugan-gan wanra, “Kasan maꞌkit mi nin kasalanan a nagwaꞌ nan sitin tawo! Angangko main nin ispirito o anghil nin nikiirgo kona!”
10 Sin inmamot anan inmamot a pididiskusyon ra, sinmalak yay Kumander a bangliꞌ no piguguruyan raya si Pablo, kanyaꞌ nin ginan-gan nasaray sundaloꞌ nan keen raya nin pwirsawan nin kalapen tan isubliꞌ raya sa kampo.
11 Sin yabi sin sain, naꞌkit naya ni Pablo a Uunuren nin manꞌumdeng sa dani na. Wana kona, “Paksawen moy nakem mo, Pablo. Nipatandaan moy maipaꞌkaꞌ kongko iti sa Jerusalem, matkap a wanin nin lamang a gawꞌen modtaw sa Roma.”
Si Planon Patyen ya si Pablo
12 Kabuklasan, main saraytaw saray Judio nin nitatarusan tan sinmamba a kai sara nin mangan o minom legꞌan a kai raya nin napati si Pablo. 13 Main sara nin masurok nin aꞌpat a puloꞌ nin katawo. 14 Nako sara konran Pupangulon Pupadiꞌ tan saray pupangulo ran Judio, tan wanra, “Nisamba mi a kai kami gapo nin manaway nin kanen legꞌan a kai miya nin napati si Pablo. 15 Kanyaꞌ nin siꞌkamo tan saray myimbro nin Kunsiho, dawaten moyo konan Kumander nin Romano a no magwaꞌ ket awiten rayadti anamana si Pablo ta wamoyo usisaen moya nin maong ta pigaw nin mapiho moyoy maipaꞌkaꞌ kona. Ket siꞌkami anamaet, saneban tan patyen miya baꞌyo ya nin makarateꞌ iti.”
16 Baleꞌ si anak nan lalaki nin babayin busat na ni Pablo, narngeꞌ nayti nin plano ra. Kanyaꞌ nin nako ya sa kampo tan nibaritaꞌ na kona ni Pablo. 17 Ket sin sain, kinayaban naya ni Pablo a saya konran upisyal tan wana kona, “Iꞌras mayti pa nin tumububaꞌyo konan Kumander ta main nin ibaritaꞌ na kona.” 18 Niꞌras naya anaod nin sarhinto a tumububaꞌyo konan Kumander, tan wana, “Kinayaban nako nin si priso nin si Pablo tan nipaiꞌras nayadti ti nin tumububaꞌyo ta main kano nin ibaritaꞌ na komoyo.”
19 Ket si Kumander, tinabin nayay tumububaꞌyo tan midyo nikadayoꞌ naya miꞌsa wana, “Ani a ibaritaꞌ mo kongko?”
20 Inumbat yay tumububaꞌyo ket wana, “Nitatarusan saray raruma nin Judio a dawaten ra komoyo nin iyadap moya dilap sa Kunsiho si Amay Pablo ta kano wadiꞌ ket usisaen raya nin maong ta pigaw nin mapiho ray maipaꞌkaꞌ kona. 21 Baleꞌ andiꞌ moyo nin aburuyan a dawaten ra ta main nin masurok nin aꞌpat a puloꞌ sara konra a mananeb kona. Nisamba ran sarayti a kai sara nin mangan tan minom legꞌan a kai raya nin napati si Amay Pablo. Sisasadyaꞌ sarayna, say mantagaꞌnan ra tana ket say disisyon moyo.”
22 Nibibilin nan Kumander kona, “Andiꞌ mo gapo nin ibaritaꞌ abirno nin siꞌno a nibaritaꞌ moyti kongko.” Ket pinaibwat nayaynay tumububaꞌyo.
Nipagamet ya kona ni Gubirnador Felix si Pablo
23 Say ginwaꞌ na nin Kumander, nangayab ya nin rwa ra nin upisyal na tan wana konra, “Isadyaꞌ moyo saray rwanyasot a sundaloꞌ, sakalako saray pitumpuloꞌ a magkabayo tan rwanyasot saray mammika ta mibwat kamon mako sa Cesarea mainsan no alas nwibi nin yabi. 24 Mangisadyaꞌ kamo anamaet nin umno ray kabayo para kona ni Pablo ta iyater moya kona ni Gubirnador Felixc nin kai gapo nin napaꞌno.” 25 Sinmunor, nanurat yan ipaꞌwit na konan gubirnador nin wanti a wana:
26 “Komo Man-galangen a Gubirnador Felix:
Nangibwat kongko, si Claudio Lisias.
Kumusta ka?
27 Siti si tawo nin nipaiyater ko komo, dinakep raya nin Judio, tan patyen rayayna kumon. Baleꞌ natandaan ko nin saya yan gumabalin Romano kanyaꞌ nin kinaꞌ miya nin nilibri nin saray sundaloꞌ ko. 28 Banaꞌ ta rabay ko nin matandaan no ani a riklamo ra kuntra kona, niyadap koya konran myimbro nin Kunsiho ra. 29 Natandaan ko a kasa anamaet nin nagwaꞌ nan kasalanan nin manepeg yan ipriso o patyen, no kai say riklamo ra kona ket say kai ra nin pipapagketan maipaꞌkaꞌ sa Layi ra. 30 Ket sin naiparateꞌ kongko a main nin plano ran patyen ya, nipaiyater koyan tampor isen komo. Nibibilin ko tana konran saray mampangiriklamo kona a isen sarayna nin mako komo.
Wanin tana.”
31 Tinukid ra nin sundaloꞌ a nibibilin konra, ket konan sitaw anaod nin yabi nirateꞌ raya si Pablo sa babali nin Antipatris. 32 Kinabuklasan, sinmubliꞌ sarayna sa kampo a sundaloꞌ nin linmalako; sara baleꞌ a nagkabayo ket inaluyon raya et si Pablo. 33 Nirateꞌ sara sa Cesarea, ket nibi rayay surat konan gubirnador tan nipagamet rayayna kona si Pablo. 34 Binasa naya a surat, miꞌsa naya nin tinepetan si Pablo no adti nin prubinsya ya nin taga. Sin natandaan na nin taga Cilicia ya, 35 wana kona, “Rengꞌen ko liꞌ a riklamo komo no iti saraynay mampangiriklamo komo.” Ket nipagwardyawan naya si Pablo itaw sa palasyo nin nipapaꞌdeng na sin saytaw ni Adiꞌ nin Herodes.