2 Sin narngeꞌ ra a mampagꞌirgo ya sa saritaꞌ ra nin Hebreo si Pablo, nititinek saran maong ket nituloy nay nagꞌirgo. Wana,

3 “Saya ako nin Judio a niyanak sa syudad nin Tarso sa prubinsyan Cilicia, baleꞌ iti ako nin inmalaki tan nagꞌadal sa Jerusalem. Si Gamaliel a maistro ko ket niyakay nakon maong maipaꞌkaꞌ sa Gugan-gan a nibatiꞌ ran pupuon tamo kontamo, tan kapada moyo sawanin, matetek kon ginwaꞌ a say wangko ket karabayan nan Dios nin gawꞌen ko. 4 Kanyaꞌ nin dinuksa-duksaꞌ tan nipapati-pati kosaray mampanumbok konan siti si Baꞌyon Dalan. Dinakep kosara, babayi man o lalaki, tan nipapriso kosara. 5 Matistigusan rayti nin manꞌibaritaꞌ ko nin si Sangkataꞌgayan nin Padiꞌ tan sarba ran myimbro nin Kunsiho. Saran mismo a nami kongko nin surat para konra nin kapadan Judio nin itaw sa Damasco, kanyaꞌ nin nako ako anaod itaw ta pigaw nin dakpen kosaray mammemper kona ni Jesus tan awiten kosaradti sa Jerusalem ta pigaw nin dusawen sara.^a

6 ^bBaleꞌ sin dandani akoyna nin mirateꞌ sa Damasco, banda nin ugtiawro ana, kapingmatan ana nin siniraan ako nin pinasyan salag nin palaway a ibat sa langit. 7 Naipalukob ako sa lutaꞌ, kaaram main nin busis nin narngeꞌ ko a wana, ‘Saulo, ambaleꞌ a manduksaꞌ-duksaen nako?’

8 Tinepet ko, ‘Siꞌno kamo, Ser?’

Ket wana nin inumbat, ‘Siꞌko si Jesus nin taga Nazaret nin manduksaen mo.’ 9 Saray kalalamoꞌ ko, naꞌkit rayaytaw anaod si palaway baleꞌ kai rayaytaw nin narngeꞌ si busis.

10 Tinepet ko et, ‘Uunuren, ani a rabay mo nin gawꞌen ko?’ Ket wana nin Uunuren, ‘Umdeng ka tan mako ka sa Damasco, ket itaw ibaritaꞌ ngaꞌmin a ipagwaꞌ ko komo.’ 11 Nabulag ako sin sain banaꞌ konan sitaw si pinasyan salag nin palaway, kanyaꞌ nin tinabin rakon kalalamoꞌ ko anggan Damasco.

12 Itaw, main nin sayay tawon say ngaran na Ananias. Matunong yan tawo nin masuet nan mantumbuken a Gugan-gan tamo ket ataꞌgay a pangingikit ra kona nin sarba ran Judio nin itaw sa Damasco. 13 Nako ya kongko, tan nakaꞌdeng ya sa dani ko ket wana, ‘Busat a Saulo, makaꞌkit kayna anamanaet.’ Ket tampor a nakaꞌkit ako anamana ket naꞌkit koya.

14 Wana et ni Ananias, ‘Si Dios a syay nagsirbyan ran pupuon tamo, piniliꞌ naka nin matandaan moy karabayan na, tan nin maꞌkit may si Sayan Kasa Gapo nin Kasalanan, tan nin marngeꞌ moy busis na nin magꞌirgo yan diri komo. 15 Wanin ta gawꞌen naka nin tistigos na nin mangipatandaꞌ sa sarba nin tawo sa say nipaꞌkit tan niparngeꞌ na komo. 16 Ket sawanin anaod, andiꞌ kayna nin pakaꞌteng. Mangimbabaet ka kona nin pabawtismo ka tan nin dawaten mo konan syay Mangingisalba ta pigaw nin ringgasan naka sa kasalanan mo.’ Wanin a nibaritaꞌ na ni Ananias kongko.

17 Sinmunor, sinmubliꞌ akoynadti sa Jerusalem. Ket sin mandumasal akodtaw sa sakop nan Timplo, main nin naꞌkit ko a baraꞌmo akon nanaynep. 18 Naꞌkit koya si Jesus tan wana kongko, ‘Apurawen mo, lumakwan kan tampor iti sa Jerusalem ta saray tutawodti, kai ra nin tepren a ibaritaꞌ mo maipaꞌkaꞌ kongko.’

19 Inumbat ako kona a wangko, ‘Uunuren, mamper sara angangko ta tandaꞌ ran peteg a gindat sinre-sinrep koy susinaguga ket dinakep-dakep tan dinuksa-duksaꞌ kosaray mammemper komo. 20 Sin pinati ya si Esteban^c. a sayan nangipatandaꞌ nin maipaꞌkaꞌ komo, itaw ako nin ayon sa nipangmati ra. Siꞌko et a namantay nin seket ran saray nangmati kona.’

21 Baleꞌ wana kongko, ‘Mibwat kayna. Ibakiꞌ kata sa adayoꞌ, itaw konran amboꞌ nin Judio.’ ”

22 Baꞌyo na nin nairgo ni Pablo a maipaꞌkaꞌ konan amboꞌ nin Judio, nangrengeꞌ saran maong kona a Judio. Baleꞌ sin nitambay nasarayna, nagsiburyaw saray Judio a wanra, “Patyen ya in a tawo! Kai ya in nin manepeg nin mabyay!” 23 Kapresan a man-gumuryaw sara, nibasyu-basyo ray taꞌgay nin seket ra tan sinabwa-sabwagan rayan taꞌpok sa sager ra kona. 24 Sin sain, nigan-gan nan Kumander konran sundaloꞌ a awiten rayayna sa kampo si Pablo tan sanet-saneten raya ta pigaw nin paliwaen ra no mayin nin wantaw nin kuntra kona a manꞌitaꞌwa-taꞌway ran Judio. 25 Ket sin nabaror rayayna si Pablo ta pigaw nin sanet-saneten raya, wana konan upisyal ran sundaloꞌ a nakaꞌdeng itaw, “Aburuyan para nin layi a sanet-saneten yay sayay gumabalin Romano nin kai ya et nin nausisaꞌ?”

26 Sin narngeꞌ na nin upisyal a wana ni Pablo, nako ya konan Kumander tan wana kona, “Ambaleꞌ a ipasanet-sanet maytaw ket saya ya anamain nin gumabalin Romano?”

27 Nako yay Kumander kona ni Pablo tan tinepet na, “Pageꞌ para a gumabalin Romano ka?”

“Oꞌ,” wana ni Pablo.

28 Wana et nin Kumander, “Namayad ako nin abaw ta pigaw nin maibilang akon gumabalin Romano.”

“Siꞌko baleꞌ,” wana ni Pablo, “nangibwat et sin niyanak ako, gumabalin Romano akoyna.”

29 Saraytaw saray mananet-sanet ana kumon kona ni Pablo, apurado nin kinmadayoꞌ sarayna, tan si Kumander, masalak yan lamang ta nipabaror naya si Pablo ket gumabalin Romano ya anamain.

30 Rabay nan mapiho nin Kumander no anin peteg a manꞌiparsa ran Judio kona ni Pablo, kanyaꞌ nin sin sinmunor nin awro, pinididinep nasara ngaꞌmin a Pupangulon Pupadiꞌ tan saray sarba ran myimbro nin Kunsiho. Linukakan nay pangangwardya kona ni Pablo, miꞌsa naya nin niyadap konra.