Pinau-pauꞌnawan rayan Mammemper sa Tiro si Pablo
21
Nipatanid kami ana konran pupangulo nin dudupong ran mammemper ket sinmaki kami nin diri-diritson nako sa isla nin Cos. Sin sinmunor nin awro, narateꞌ miya a isla nin Rodas, tan nangibwat itaw ket tinmuloy kami sa Patara. 2 Itaw main nin narateꞌ min bapor nin mako sa Fenicia ket rinmuran kami. 3 Kaaram, masirꞌip miyaynay isla nin Cyprus ket linmabas kami sa bagatanan na nin adap sa prubinsyan Siria. Dinmuong kami sa babali nin Tiro ta magdiskarga yadtaw a bapor. 4 Dinumog misaray tumutumbok kona ni Jesus itaw ket nikikalamoꞌ kami konra nin nanglinggo. Banaꞌ sa nipaninreg nan Ispirito nan Dios konra, nibaritaꞌ ra kona ni Pablo a andiꞌ yayna yapoꞌ nin tumuloy nin mako sa Jerusalem. 5 Wanin man, sin narateꞌ ana a awro nin pibwat mi, tinmuloy kami nin lamang. Ket niyater rakami nin sarba ran mammemper, lulalaki, bubbayi tan uaꞌnak anggan sa liwaꞌ nin babali. Sin itaw kami ana sa rigrig nin baybay, nanalimukod kami ngaꞌmin tan dinmasal kami. 6 Miꞌsa, nipatanidan kami ana; ket rinmuran kami ana sa bapor, tan sara anamaet, nugot sarayna sa pammali ra.Nipadles a Pakapriso na ni Pablo
7 Nangibwat sa babali nin Tiro, nituloy mi a sinmaki ket dinmuong kami sa babali nin Tolemaida. Pinasyar misaray mammemper itaw ket itaw kami nin sayay awro. 8 Sin tinmumbok nin awro, nibwat kami ket nirateꞌ kami sa babali nin Cesarea. Nagtuloy kami sa bali na ni Felipe a saya nin mangingipatandaꞌ konan Mabistan Patandaꞌ. Saya ya intaw konran saray piton lulalakin piniliꞌ itaw sa Jerusalem nin katulungan ran apostolesa. 9 Main nin aꞌpat ran aꞌnak nan bubalasang a pinayaburan nan Dios nin pakababaꞌ nin mangibaritaꞌ nin nipatandaan na konra.
10 Napalabas a umnoy awro ana a itaw kami, main nin rinmateꞌ itaw nin sayay prupita nin ibat sa Judea a say ngaran na Agabob 11 Ket nako ya komi; kinalap nayay barkes na ni Pablo; miꞌsa na nin tinaker nin siti a gamet tan ayi nan diri, kaaram wana, “Manꞌipatandaan na nin Ispirito nan Dios a si main nin ikon konan siti, baruren raya liꞌ nin wanti nin saray Judio nin itaw sa Jerusalem, miꞌsa raya nin ipagamet liꞌ konran amboꞌ nin Judio.”
12 Sin narngeꞌ mi in, nikidawat kamin ingangaꞌdo tan saray tagadtaw a andiꞌ yayna nin mako sa Jerusalem si Pablo. 13 Baleꞌ niꞌbat na ni Pablo, “Ambaleꞌ a umakis kamo? Andiꞌ moyo kadiꞌ nin patapuen a nakem ko! Nasadyaꞌ akon amboꞌ tamoꞌ nin mabaror no kai mataman et nin matidtaw sa Jerusalem no para sa kakanaan na ni Uunuren tamon Jesus.”
14 Sin talaga nin kai miya nin mapaed, tinumgen kami ana ket wami tana, “Say karabayan na nin Uunuren kumon a maunor.”
15 Napalabas a umnoy awro, nagpripara kami miꞌsa kami ana nin nako sa Jerusalem. 16 Nayi sara komi a raruma nin tumutumbok kona ni Jesus itaw sa Cesarea. Sa Jerusalem, niꞌras rakami sa bali na ni Mnason nin itaw a pagtuluyan mi. Taga ya Cyprus tan saya ya konran saray nuꞌnan nagꞌin nin tumutumbok kona ni Jesus.
Ginwaꞌ na ni Pablo a Ritwal sa Pakaparinggas sa Jerusalem
17 Sin rinmateꞌ kami anaod sa Jerusalem, maririket saran nangakoꞌ komi a bubsat sa pammemper itaw. 18 Sin tinmumbok nin awro, kalamoꞌ rakami ni Pablo nin nako kona ni Santiago. Ket itaw sara a sarba ra nin pupangulo ran mammemper.
19 Mayadiꞌ nasara nin pinakumusta ni Pablo, nibaritaꞌ na ngaꞌmin konra a ginwa-ginwaꞌ na nin Dios konra nin amboꞌ nin Judio banaꞌ sa nipangipatandaꞌ na konan Mabistan Patandaꞌ konra. 20 Sin narngeꞌ ray nibaritaꞌ na ni Pablo, rinayo rayay Dios. Miꞌsa wanra kona ni Pablo, “Tandaꞌ mo, busat, rinibo saraynay kapada tamo nin Judio nin mammemper kona ni Jesus tan matetek sara sa panunukid ra sa Gugan-gan tamo nin Judio. 21 Sawanin, narngeꞌ ra a manꞌiyakay mo kano konran kapada tamon Judio nin itaw sa lulugar ra nin amboꞌ nin Judio, a gurutan rayna a panunukid ra sa Gugan-gan a nipataoy nin nipagamet kona ni Moises ta manꞌiyakay mosara kano a andiꞌ rasarayna nin turien a aꞌnak ra tan manꞌiyakay mo et kano nin andiꞌ rayna nin tumbuken a kukaugalian tamo nin Judio. 22 Ket sawanin, ani kadiꞌ a mabista nin gawꞌen? Kasan sapo nin matandaan ra a iti ka.
23 Sapa no wanti e a gawꞌen mo: Main nin aꞌpat ran kalalamoꞌ tamon lulalaki a main nin nipangakoꞌ ra nin mairot konan Dios. 24 Mako ka sa Timplo a kalamoꞌ mosara tan gawꞌen moyo a ritwal nin pakaparinggas sa pangingikit nan Dios bilang sa wana sa Gugan-gan. Siꞌkaynay umbat sa bayad-bayadan ra ta pigaw nin maipakiskisan ray ulo ra nin pakaꞌkitan a natukid raynay pangakoꞌ ra.c Ket no wanin, maipaꞌkit konran tutawo a bulaꞌ-bulaꞌ taw say narngeꞌ ra maipaꞌkaꞌ komo ta mapalaway a mantumbuken mo pa anamain a Gugan-gan.
25 Maipaꞌkaꞌ anamaet konran mammemper a amboꞌ nin Judio, nisurat mi ana konra a nipapagketan tamodti intaw maipaꞌkaꞌ konra. Wami sa surat: Andiꞌ sara nin mangan nin naidaꞌton nin nipangrayo sa dios-dios, tan andiꞌ sara nin mangnaꞌ nin dayaꞌ tan nin karni nin pinatin ayep a kai nin pinadayaꞌ, tan andiꞌ ra nin samaꞌ-samaen a lalaman ra yupaꞌ sa amboꞌ nin manepeg a pirararay.”d.
26 Ket pinaayi nasarayna anaod ni Pablo a lulalaki kona. Sin sinmunor nin awro, ginwaꞌ ray ritwal nin pakaparinggas. Miꞌsa, sinumrep ya sa sayay parti nan Timplo ta pigaw nin ipatandaꞌ na konan padiꞌ no kaꞌno nin mailaꞌpos a pitoy awro nin ritwal tan mangipaidaꞌton ya liꞌ para sa barang saya konra.
Dinakep rayadtaw si Pablo sa Timplo
27 Sin say pitoy awro nin ritwal ket adapen ana nin mailaꞌpos, main nin Judio nin taga prubinsyan Asia a nakaꞌkit kona ni Pablo itaw sa sakop nan Timplo ket nanugsog sara nin abaw nin tutawo a dakpen raya si Pablo. 28 Nitaꞌway ra, “Siꞌkamon kapadan Israelita, tulungan rakami! Sya ey taw si tawon mampangyakay abirno nin adti nin kuntra kontamon Judio, sa Gugan-gan tamo tan konan Timplo tamo. Ket sawanin, nangawit ya et iti nin amboꞌ nin Judio mataman no maiyawaꞌ, ket sa wanin siti nin masagrado nin lugar ket ginwaꞌ naya nin kai ana nin maikanaꞌ konan Dios!” 29 Nibaritaꞌ ra a wanin banaꞌ ta naꞌkit ran kala-kalamoꞌ nayadti ni Pablo sa syudad si Trofimo e. a sayay taga Efeso, kanyaꞌ nin nipaꞌkaꞌ ra a niꞌras naya ni Pablo itaw sa sakop nan Timplo.
30 Konan siin, nanager sara ngaꞌmin a tutawo sa Jerusalem. Nagsikered saran nakodtaw sa Timplo; dinakep raya si Pablo tan ginuyugoy rayan nirikor; miꞌsa ra nin nisadaꞌ nin tampor a purta. 31 Patyen rayayna kumon si Pablo baleꞌ main nin nangiparateꞌ konan Kumander ran sundaloꞌ nin Romano a magulo kano sa intiron Jerusalem. 32 Tampor nangayab yan saray Tinyinti Kirnel na tan susundaloꞌ ra tan nangapura saran nako sa kamiꞌnan nin gulo. Sin naꞌkit rayan tutawo a Kumander tan saray sundaloꞌ, tinegnan rayan binugbog si Pablo. 33 Kinadanyan nayan Kumander si Pablo tan dinakep naya, tan nipabaror naya nin dublin kadina. Miꞌsa, tinepet na konran tutawo no siꞌno ya si Pablo tan no ani a ginwaꞌ na. 34 Saka-sakalakoy itaꞌway ran iꞌbat nin tutawo ket banaꞌ sa kyawkyawan, kai na nin mapapalawayan nin Kumander no anin talagay nangyadiꞌ, kanyaꞌ nin nigan-gan na konran sundaloꞌ na nin iꞌras raya si Pablo sa kampo. 35 Sin itaw sarayna sa aydan, inalsa rayan sundaloꞌ si Pablo banaꞌ ta maꞌmot nin tuloy a ulo ran tutawo, 36 ket wanran manꞌiburya-buryaw nin mantumumbok, “Patyen tamoya!”
Nidipinsa nay Lalaman nan Diri ni Pablo
37 Sin isrep rayayna sa kampo si Pablo, wana konan Kumander, “Main yapoꞌ pa nin ibaritaꞌ ko komoyo?”
Inumbat yay Kumander, “Ya, tandaꞌ moy magꞌirgon Griego! 38 Say wangko no siꞌkaytaw si Egipcio nin nangipangulo nin pagriribildi sa gubyirno sin amboꞌ et nin naꞌteng tan lider ran aꞌpat a ribon lulalakin di-armas nin manꞌumadidtaw sa lugar a amboꞌ nin matawo.”
39 Niꞌbat na ni Pablo, “Saya ako nin Judio. Niyanak ako sa Tarso, si pitanda-tandaꞌ nin syudad sa prubinsyan Cilicia. Aburuyan rako tana pa nin magꞌirgo konran tutawo?”
40 Ket inaburuyan nayan Kumander. Inumdeng ya sa tukar nin aydan si Pablo tan sininyasan nasara a tutawo nin mititinek sara. Ket sin nititinek sara, nagꞌirgo ya sa saritaꞌ ra nin Hebreo.