Say Pako na ni Pablo sa Macedonia tan sa Grecia
20
Sin nayadiꞌ anaytaw say pigugulo sa Efeso, dininep nasara ni Pablo a tumutumbok kona ni Jesus tan pinaksaw nay nakem ra. Miꞌsa yayna nin pinatanid konra tan nibwat yayna nin nako sa prubinsyan Macedonia. 2 Naku-nako ya sa nagsikabarang nin bubabalidtaw tan pinagse-pagsen nay nakem ran saray mammemper. Nituloy na angga sin nako yayna sa prubinsyan Acayaa. 3 Itaw ya nin tuloy bulan. Nidisisyon nay sumaki nin mako sa Siria ket natandaan na nin manꞌiplano raya nin patyen nin Judio. Kanyaꞌ nin sinilyan nay plano na ket dinmalan yan lumalako sa Macedonia. 4 Nayi sara kona si Sopater nin taga Berea a anak naya ni Pirro, si Aristarco tan Segundo nin taga Tesalonica, si Gayo nin taga Derbe, tan si Timoteo; wanin ra anamaet ni Tiquico tan Trofimo nin taga Asia. 5 Nuꞌna saraynayti tan tinmaꞌgan sara komi sa Troas. 6 Mayadiꞌ a mantawagen nin Pista nin Pangangan nin Tinapay a Kasan Pammakbo, sinmaki kamin nibwat itaw sa Filipos. Limay awro a napalabas, nirateꞌ kami sa Troas ket nakapidudumog kamidtaw. Itaw kami nin sayay linggo.Itaw sa Troas, Sinmubliꞌ yan Mabyay si Eutico
7 Sin awron Linggo, siꞌkamin tumutumbok kona ni Jesus, nididinep kami ta pigaw nin mangan kamin tinapay nin pammanemtem sa nipati na. Sin sain, nangipapalaway ya si Pablo angga sin kapikngaꞌ nin yabi banaꞌ ta mibwat ya kinabuklasan. 8 Abaw a tyoꞌ sa kwarto nin itaw ya sa taꞌgay sa balin nididinepan mi. 9 Sin sain, main nin sayadtaw nin lalakin malagoꞌ et a tinmekreꞌ sa dudungawan nin say ngaran na Eutico. Sa eteng nan nangyakay ni Pablo, nangitunggeꞌ yayna si Eutico angga sin mabistaynay elek na ket nanaboꞌ yan nangibwat sa ikatlon grado. Nati yayna nin pinurot ra. 10 Inmarak ya si Pablo tan linmukob ya sa babo na tan yinakap naya. Miꞌsa wana ni Pablo konran tutawo, “Andiꞌ kamo nin mapaga. Mabyay ya et.” 11 Sinmubliꞌ ya sa taꞌgay nin bali si Pablo. Nangalap ya nin tinapay nin pammanemtem sa nipati na ni Jesus miꞌsa, nangan sara. Nikiirgu-irgo ya konran itaw angga sin mapalaway ana miꞌsa yayna nin nibwat. 12 Sitaw si tububaꞌyo anamaet, niyugot rayayna sa bali ra nin marigsa, ket matinek a kaisipan ra.
Sa Pakudti-pakodtaw ra ni Pablo, Nirateꞌ sara sa Mileto
13 Siꞌkami nin kalalamoꞌ na ni Pablo, sinmaki kamin muꞌnaynan mako sa babalin Ason, ta nikitarusan yan itaw yayna liꞌ nin rumuran, ket lumalako ya yapoꞌ. 14 Sinnaꞌ rakamidtaw sa Ason tan nayi yaynan sinmaki komi ket tinmuloy kami anan nako sa babalin Mitilene. 15 Nangibwat itaw, sinmaki kami anamanaet ket sin sinmunor nin awro linabasan miya a isla nin Quio. Sin sinmunor anamanaet nin awro narateꞌ miya anamaet a isla nin Samos, ket sin napalabas anamana a sayay awro narateꞌ miyay babali nin Mileto. 16 Nidisisyon na ni Pablo a kai yayna nin dumalan sa syudad nin Efeso ta pigaw nin kai yayna nin miꞌteng sa prubinsya nin Asia. Mampangapura ya si Pablo ta no magwaꞌ ket itaw yayna sa Jerusalem no Pistan Pentecostes.
Say Patanid na ni Pablo konran Pangulo ran Mammemper sa Efeso
17 Itaw sa Mileto, nangibakiꞌ ya nin nako sa Efeso nin kayaban rasaray pupangulo nin dudupong ran mammemper itaw. 18 Ket sin itaw sarayna wana konra,
“Tandaꞌ moyo no paꞌnoy nipagkabyay ko leleg a itaw ako komoyo nangibwat sin karateꞌ kodtaw sa prubinsyan Asia angga sin awron nibwat ako. 19 Ginwaꞌ ko a nipagwaꞌ na nin Uunuren kongko a kai ko gapo nin nipataꞌgay a lalaman kon diri. Abaw a lwaꞌ ko nin tinmuroꞌ, tan abaw a dyaꞌdyaꞌ nin nirangep ko banaꞌ sa ginwa-ginwaꞌ ran Judio kongko. 20 Tandaꞌ moyo et a sa nipangyakay ko komoyo, sa publiko man o sa pammali moyo, niyakay ko komoyo a sarba nin sa angan-angan ko ket para sa kaabigan moyo. 21 Judio man o amboꞌ nin Judio, pari-pariho nin binaritaan ko a pagbabawian raynay kukasalanan ra ket gumring sara konan Dios tan matkap a magmatalek sara kona ni Uunuren tamon si Jesus.
22 Ket sawanin, mako ako sa Jerusalem nin katutulok ko sa wanan Ispirito nan Dios kongko. Ket kai ko nin tandaꞌ no ani a mangyadiꞌ itaw kongko. 23 Si tandaꞌ ko tamoꞌ ket si, sa sarban lugar a mangkeen-keen ko, manꞌipatandaan nan Ispirito nan Dios kongko a say mantumaꞌgan itaw kongko ket pakapriso tan pakapadyaꞌdyaꞌ. 24 Baleꞌ kai ko nin mampanemtemen in banaꞌ ta para kongko ket amboꞌ nin maalaga a mabyay ako basta magwaꞌ koy manꞌipagwaꞌ na ni Uunuren tamon Jesus, siin ket si ipatandaꞌ koyay Mabistan Patandaꞌ maipaꞌkaꞌ sa kamaungan nan Dios.
25 Anaod, siꞌkamon sarba nin nangipatandaan kon maipaꞌkaꞌ sa pagꞌaadiꞌ nan Dios, tandaꞌ kon kai rakoyna liꞌ nin maꞌkit. 26 Ket ibaritaꞌ koynayti komoyo sawanin: Kasa liꞌ nin ubatan ko no main liꞌ komoyo a kai nin maisalba, 27 ta kasa gapo nin kai ko nin nipatandaan komoyo maipaꞌkaꞌ sa plano na nin Dios. 28 Pagawan moyoy lalaman moyon diri tan saray sarba ran tutawo na nin Dios nin nipakargo nan Ispirito na komoyo a mammaga rakamon saray tutawo nan Dios nin nipurok na yupaꞌ sa nipamaturoꞌ nan dayaꞌ nan diri nin Anak na. 29 Tandaꞌ ko nin no kasa akoyna liꞌ, main nin makodti komoyo nin kano wadiꞌ ket minsahiro nasara ni Cristo a kapada ray mabayanin atap a uayep ket sidaen rakamo. 30 Main anamaet liꞌ nin panaon a sa dupong moyo nin mismo ket main saraytaw saray mamaritaꞌ nin bulaꞌ-bulaꞌ ta pigaw nin maibarang rasaran mayi konra a tumutumbok kona ni Jesus. 31 Kanyaꞌ nin pakailag kamo. Panemtemen moyoy nipangyakay ko sa barang saya komoyo sa yabi tan awro, nin abaw a tinmuroꞌ nin lwaꞌ ko sa luob nin tuloy taon.
32 Ket sawanin, bubsat, ipudir katamoyna konan Dios. Si minsahi maipaꞌkaꞌ sa kamaungan nan Dios, pagsenen nay pammemper moyo, tan si Dios ibi na liꞌ komoyo in say manꞌisadyaꞌ na konran sarba ran nipurok nan tutawo na.
33 Ibaritaꞌ ko komoyo, kai ko gapo nin inapes a pirak o balitok o seket nin siꞌnuman. 34 Tandaꞌ moyo nin namaturoꞌ akon saynget ko ta pigaw nin matingkapan koy ikabyay mi nin saray kalalamoꞌ ko. 35 Sa sarba nin panaon, nipaꞌkit kon nipaarig komoyo a matkap a tulungan tamo saray mampagkakurang mangibwat sa wanin a ginwaꞌ ko nin pammaturoꞌ kon saynget. Panemtemen moyoy nibaritaꞌ na ni Uunuren tamon Jesus nin diri a wana, ‘No mami yay sayay tawo konran raruma, makarmaꞌ yan adayoꞌ dyan no mangrisibi ya tamoꞌ.’ ”