Si Pablo itaw sa Efeso
19
Legꞌan a itaw ya sa Corinto si Apolos, si Pablo anamaet, sinulpu-sulpot nay bubabalin tatalugtog itaw angga sin nakarateꞌ ya sa Efeso. Ket main nin nadumog nadtaw nin umno ran tumutumbok kona ni Cristo. 2 Nitepet na ni Pablo konra, “Nako ya para nin niikap komoyo a Ispirito nan Dios sin tinumper kamoyna kona ni Jesus?”Ket niꞌbat ra kona, “Kai mi nin tandaꞌ a ta sawanin mi tamoꞌ nin narngeꞌ a main nin siin si Ispirito nan Dios.”
3 Tepet na anamana ni Pablo, “No wanin ani a nakabawtismwan moyo?”
Niꞌbat ra, “Sitaw si nibari-baritaꞌ na ni Juan nin pakabawtismo.”
4 Ket wana ni Pablo, “Say nipamawtismo na ni Juana ket pakaꞌkitan nin pagbababawiꞌ sa kasalanan. Baleꞌ nibaritaꞌ na konran saray mampangrengeꞌ a matkap a magmatalek sara konan si sumubray kona, a sya anaod si Jesus.”
5 Sin narngeꞌ ra in nin wana ni Pablo, nipabawtismo sara nin pakaꞌkitan a mammemper sara kona ni Uunuren tamon Jesus. 6 Nipababo na ni Pablo a gamet na konra, ket nako ya konra a Ispirito nan Dios. Sin sain, nakapagꞌirgo sara sa nagsikabarang nin irgo tan nibari-baritaꞌ ray minsahi nan Dios nin nipatandaan na konra. 7 Sarayti nin binawtismwan ket maglabinrwa sara nin lulalaki.
8 Sa luob nin tuloy bulan, naku-nako ya sa sinaguga ra nin Judio si Pablo tan pinasyan tepel na nin nagꞌirgu-irgodtaw. Nikidisku-diskusyon ya konran itaw nin gagara na a kumbinsyen nasaray tutawo nin mamper sara sa maipaꞌkaꞌ sa pagꞌaadiꞌ nan Dios. 9 Baleꞌ main saraytaw saray matibꞌey a ulo ra nin kai nin mamper. Nagꞌirgu-irgo sara nin dukaꞌ kuntra sa panunumbok konan siti si Baꞌyon Dalan sa adapan ra nin tutawo. Linakwanan nasara ni Pablo ket nitagad nasaraytaw saray tumutumbok kona ni Jesus, tan nituloy nan inawru-awro a pangangakay na itaw sa kwarton pididiskusyunan sa bali na ni Tirano. 10 Wanin nin rway taon, kanyaꞌ nin sarba ra nin tutawo sa prubinsya nin Asia, Judio tan amboꞌ nin Judio, narngeꞌ ray minsahi nan Catawan maipaꞌkaꞌ kona ni Jesus.
Saray Aꞌnak nan Lulalaki ni Esceva
11 Sin sain, binyan nayan Dios nin pakayadiꞌ si Pablo a makagwaꞌ yan naiduman mumilagro, 12 ket mataman say panyoꞌ o seket nin inusar na, iꞌras ran tutawo konran main nin masakit ket umandaꞌ sara tan saray uispiriton dukaꞌ ket lumakwan sara konra.
13 Itaw sa Efeso, main saraytaw saray Judio nin mikadaw-kadaw nin mamalakwan nin uispiriton dukaꞌ nin nakasrep konran tutawo. Ket sinariꞌ rayan inusar a ngaran na ni Uunuren nin Jesus. Wanti a wanra, “Sa ngaran na ni Jesus a manꞌipata-patandaan na ni Pablo, igan-gan ko komo, lumakwan ka.” 14 Sayti a gawaꞌ ran saray piton aꞌnak nan lulalaki ni Esceva a sayay pangulo nin padiꞌ ran Judio.
15 Niꞌsa, niꞌbat na nin ispiriton dukaꞌ konra, “Si Jesus, tandaꞌ koya; wanin ya et si Pablo; baleꞌ siꞌkamo, siꞌno kamo wadiꞌ?” 16 Ket sitaw si tawo nin nasrepan nin ispiriton dukaꞌ linaybo nasara, tan sinasa-sasakit nasara ket natalo sara. Sin wanin, lusꞌok-labos tan sugat-sugat sara nin nagsipalayon linmakwan itaw sa bali.
17 Natandaan ti nin nangyadiꞌ nin sarba ran tutawodtaw sa Efeso, Judio tan amboꞌ nin Judio, ket wanin ana a liꞌmo ra. Lalo rayaynan rinayu-rayo a Uunuren tamon si Jesus, no siꞌno ya. 18 Abaw sara konran mammemper a pinaipadar nin nipatutuo ra sa tutawo a adin dukaꞌ a ginwa-ginwaꞌ ra. 19 Ket saraytaw saray gindat nin manggagamod, mananantigwa tan raruma et nin albularyo, pinikalamoꞌ ran binunton a lulibro nin inusar-usar ra tan pinuuran ra nin naꞌkit nin sarban tutawo. Kinwinta ray bili ket maglimampuloꞌ a ribon plata nin pirakb ngaꞌmin.
20 Ket anaod, say minsahi nan Catawan, mas lalo anan natanda-tandaan tan mas lalo saraynan inmabaw a mammemper.
Say Pigugulo Itaw sa Efeso
21 Sawanin sin nayadiꞌ nin nangyadiꞌ in, nidisisyonc ni Pablo a mako sa Jerusalem nin dumalan ya sa prubinsya nin Macedonia tan Acaya. “Ket, kayadiꞌ kon makodtaw sa Jerusalem,” wana, “matkap a mako ako sa Roma.” 22 Anaod, pinauꞌna nasarayna sa Macedonia a rwa konran kukatulungan na a sara si Timoteo tan si Erasto; ket sya, itaw ya yapoꞌ et sa prubinsyan Asia.
23 Ket sin sain a itaw ya et si Pablo sa Efeso, main nin nangyadiꞌ nin alakin pigugulo banaꞌ sa akay maipaꞌkaꞌ sa panunumbok konan siti si Baꞌyon Dalan. 24 Say nangyadiꞌ, main itaw nin sayay mangangwaꞌ nin bubagay a mangusar ya nin pirak, a say ngaran na ket Demetrio. Mangangwaꞌ ya nin timplu-timplo na nin si diosa ran si Artemisd. Main nin tutawon kalalamoꞌ nan mangwaꞌ nin sayti ket abaw a matingkapan ra. 25 Dininep nasara ni Demetrio a tutawo na tan saray raruma et nin kapariho ra a tingkapan. Wana konra, “Bubsat, tandaꞌ moyo nin mabistay byay tamo mangibwat konan siti nin tingkapan tamo. 26 Baleꞌ mangkaimatunan tan mangkarnge-karngeꞌ moyo nin diri a man-gawꞌen nan siin si Pablo. Manꞌibari-baritaꞌ na nin say raywen nin bilang dios a ginwaꞌ nin tawo ket amboꞌ nin peteg nin dios. Ket abaw saraynay mangkaayat na nin gurutan raynay pangrarayo ra konan diosa tamo, amboꞌ tamoꞌ nin iti sa syudad nin Efeso no kai sa dandani intiro nin prubinsyan Asia. 27 Amboꞌ tamoꞌ anaod nin magpiligroyti say paningkapan tamo ta bangliꞌ no kuntrawen rayti nin tutawo, no kai edet, mataman pati si timplo na nin si sangkataꞌgayan a diosa tamon si Artemis ket magꞌin yaynan kasan kakanaan. No mangyadiꞌ a wanin ket si diosa Artemis nin manraywen ra nin sarban tutawo sa prubinsyan Asia tan sa intiron mundo, makasaynay kagalangan na.”
28 Sin narngeꞌ ra in nin wana ni Demetrio, pinasyan sager ra ket wanra nin niburyaw “Makapangyayadiꞌ ya si Artemis nin diosa tamon taga Efeso!” 29 Ket say gulo nagꞌin nin sa intiro nin syudad. Sin naꞌkit rasaran tutawo si Gayo tan si Aristarco nin taga Macedonia a kalalamoꞌ nasaran mampako ni Pablo sa keen-keen na, dinakep rasara tan niꞌras rasara sa lugar a pididinepan ran tutawo. 30 Rabay nan tuloy ni Pablo a makodtaw baleꞌ kai raya nin inaburuyan nin saray tumutumbok kona ni Jesus nin kalalamoꞌ na. 31 Main et nin nibakiꞌ ran saray upisyalis nan prubinsyan Asia nin uamigo na a nangiparateꞌ nin mairot nin dawat ra a andiꞌ ya gapo nin makodtaw si Pablo.
32 Ket sin sain ana, saraytaw saray nididinep ket burya-buryaw sara, baleꞌ sakalakoy manꞌiburyaw nin saya tan saya ta saray kaꞌbawan ket kai ra nin tandaꞌ a rason no ambaleꞌ a nididinep sara. 33 Ket, banaꞌ ta saray Judio ket pinaadap raya konran tutawo si Alejandro, dinagdag rayan raruman tutawo ta pigaw nin magꞌirgo ya konra. Nisinyas na ni Alejandro konran tutawo a rabay nay magꞌirgo. 34 Baleꞌ sin naꞌkit ran tutawo a Judio yan lamang, ginmuryaw sara anamanaet a tutawo a wanra, “Makapangyayadiꞌ ya si Artemis nin diosa tamo nin taga Efeso!” Ket niburya-buryaw ra in sa luob nin rway udas.
35 Sa kaꞌtengan, si sikritaryo nin syudad ket napittinek nasaraytaw saray nididinep, ket wana konra, “Kalugaran ko nin taga Efeso, kasan kai nin magtandaꞌ a naipya kontamo nin taga Efeso a pangangasikaso konan timplo na nin si sangkataꞌgayan a diosa tamon si Artemis tan konan masagradon imahin na nin nanaboꞌ nangibwat sa langit. 36 Kasan makapamaritaꞌ a amboꞌ nin tutuoyti say manꞌibaritaꞌ ko kanyaꞌ nin mikaklek kamo tan andiꞌ kamo nin mirunga-runga nin mangimey. 37 Niꞌras moyo saradti ti nin tutawo ket kai sara anamaet nin nanakaw itaw sa timplo tan kasa anamaet nin inirgo ran dukaꞌ nin kuntra konan diosa tamo. 38 Baleꞌ no main wadiꞌ nin riklamo na ni Demetrio tan saray trabahador na kuntra sa siꞌnuman, nakaabri anay kurti tan main anan upisyalis itaw. Mabista no itaw sara nin mako nin magriklamo. 39 Ket no main et wadiꞌ nin rabay moyon itepet, saytaw ana liꞌ no mididinep atamo nin sigon sa Layi, 40 ta sayti nin nangyadiꞌ sawanin ket kuntra sa Layi nin Roma, ket piligruso atamon tuloy. Kasan sapon maparsawan ratamon nangwaꞌ nin gulo nin saray magꞌuuray, ket no wanin, kasan maibi tamon rason sa ginwaꞌ tamo.”
41 Kayadiꞌ na nin nibaritaꞌ in nin sikritaryo, pinaugot nasarayna sa pammali ra a tutawo.