Nakatandaꞌ nasara ni Pablo si Aquila tan Priscila sa Corinto
18
Amboꞌ nin naꞌteng, nibwat yayna sa Atenas si Pablo tan nako ya sa syudad nin Corinto.a 2 Itaw main nin mitraasawan Judio nin taga sa prubinsyan Ponto a nakatandaꞌ na, sara si Aquila tan Priscila. Karateꞌ ra tamoꞌ nin nangibwat sa Italia ta pinalakwanb nasara ngaꞌmin ni Impirador Claudio a Judio nin itaw sa Roma. Niꞌsa, binisita nasara ni Pablo 3 ket, ta pariho a tingkapan ra, mangangwaꞌ sara nin turda, nikiikap yaynadtaw konra si Pablo tan nikipagtrabaho ya konra. 4 Tepeꞌ nin Awron Painawa, mako ya sa sinaguga si Pablo nin kidiskusyon yadtaw ta apes nan makumbinsi nasaran pari-pariho nin magmatalek kona ni Cristo a kapada na nin Judio tan saray amboꞌ nin Judio.5 Sin rinmateꞌ sara si Silas tan Timoteo nin ibat sa Macedonia, niꞌpos nayna tana ni Pablo a udas na sa pangingipatandaꞌ nin minsahi na nin Dios, a pinatutuꞌwan na konran kapada nan Judio a si Jesus sya a Cristo nin nipangakoꞌ nan Dios. 6 Baleꞌ sin kai sara nin namper no kai edet, nagꞌirgwa-irgwan raya nin paninidaꞌ kona, pinagpag nay taꞌpok sa seket na nin mangipaꞌkit a kasaynan kabiangan na konra. Wana konra, “No dusawen nakamo liꞌ nin Dios, kasa nin raruman seselen moyo no kai say lalaman moyon diri! Andiꞌ rako liꞌ nin seselen! Mangibwat sawanin, konran amboꞌ nin Judio akoyna nin mako nin mangipatandaꞌ.”
7 Linakwanan nasara tan nako ya nin nikipagtuloy sa bali na nin sayay amboꞌ nin Judio nin mangrarayo konan Dios a say ngaran na ket Ticio Justo. Si bali na ket kadarait nayan sinaguga ran Judio. 8 Ket si Crispo a syay pangulo sa sinaguga ran Judio, nagmatalek ya konan Uunuren. Wanin sara anamaet a pamilya na tan abaw sara et a raruma nin taga Corinto nin nangrengeꞌ kona ni Pablo ket namper sara, ket nipabawtismo sara.
9 Sayay yabi, wana nin Uunuren kona ni Pablo a baraꞌmo ya nin nanaynep, “Andiꞌ ka nin maliꞌmo! Andiꞌ ka nin tumgen sa pangingipatandaꞌ mo sa saritaꞌ ko, no kai edet, ituluy-tuloy mo 10 banaꞌ ta kalamoꞌ nako. Kasa gapo nin makapamaꞌno komodti ta abaw saray tutawo kodti.” 11 Ket niikap yadtaw sa Corinto si Pablo sa luob nin sayay taon tan kapikngaꞌ, nin nipapalaway nay minsahi a nangibwat konan Dios konran tutawo.
12 Sin si Galion ket nagꞌin syay gubirnador sa Acaya,c saray Judio nin amboꞌ nin mammemper kona ni Jesus, nipapasayawan rayan dinakep si Pablo tan niꞌras raya kona ta pigaw nin sintinsyawan naya. 13 Wanra kona ni Gubirnador Galion, “Siti nin tawo, manꞌayaten nasaray tutawo a raywen rayay Dios sa padalan a kuntra sa Lulayi mi.”
14 Magꞌirgo yayna kumon si Pablo baleꞌ wana ni Galion konran Judio, “Siꞌkamo, no say idarom moyo kongko nin ginwaꞌ nan siin nin tawo ket mabyat nin kasalanan o panunubag nin layi, manepeg tamoꞌ a anusan katamo nin rengꞌen. 15 Baleꞌ banaꞌ ta say kai moyo nin mampipagketan ket maipaꞌkaꞌ tamoꞌ sa irgu-irgo, ngaran-ngaran tan sa gugan-gan nin naimatawan moyo, makauray kamoynan bukod nin mangrisulbi. Kasan kabiangan ko sa sain.” 16 Miꞌsa, pinalakwan nasaraynadtaw sa kurti. 17 Sin sain, nipukpok raya si Sostenes a syay pangulo sa sinaguga ra nin Judio tan sinasa-sasakit raya sa adapan nin kurti, baleꞌ kai nasara gapo nin inasikaso ni Galion.
Sinmubliꞌ sara si Pablo sa Antioquia Miꞌsa Nibwat sara anaet
18 Itaw ya yapoꞌ et nin midyo naꞌteng sa Corinto si Pablo, miꞌsa yayna nin nipatanid konran mammemper itaw nin mako ya sa prubinsyan Siria. Kalamoꞌ nasaray mitraasawa nin Aquila tan Priscila. Baleꞌ baꞌyo sara nin sinmaki nin rumuran sa bapor, itaw sa barangay nin Cencrea ket nipakiskis ya si Pablo nin pakaꞌkitan a say nipangakoꞌ na konan Diosd ket natukid nayna. Mayadiꞌ in, sinmaki sarayna. 19 Dinmuong sara sa Efeso ket itaw, nabatiꞌ sara si Aquila. Legꞌan nin itaw ya sa Efeso si Pablo, nako ya sa sinaguga ran Judio tan nikidiskusyon ya konran itaw. 20 Sin dinawat ra kona nin itaw ya yapoꞌ sa lugar ra, kai ya nin inmaburoy. 21 Wanin man, sin mampibwat yayna wana konra, “eSumubliꞌ akodti liꞌ no iyaburoy nan Dios.” Ket sinmaki ya sa bapor nin nibwat anadtaw sa Efeso.
22 Sin nakaduong yaynadtaw sa Cesarea, dinmiritso ya sa Jerusalem nin binisita nasaray mammemper itaw, miꞌsa yayna nin nako sa babalin Antioquia. 23 Ket sin itaw yayna nin midyo naꞌteng nibwat ya anamanadtaw. Naku-nako ya sa sarban bubabali sa prubinsyan Galacia tan Frigia nin pinagse-pagsen nay pammemper ran tumutumbok kona ni Jesus.
Si Apolos itaw sa Efeso tan sa Corinto
24 Sin sain, main nin sayay Judio nin say ngaran na Apolos a rinmateꞌ itaw sa Efeso. Niyanak yayti sa syudad nin Alejandria. Maong ya nin magdiskurso tan abaw a tandaꞌ na sa Masanton Kasuratan. 25 Naakayan yayna nin maipaꞌkaꞌ sa pigagawaꞌ nan Catawan. Pinasyan sulit nan mangipata-patandaꞌ tan kustoy manꞌiyakay na maipaꞌkaꞌ kona ni Jesus. Baleꞌ say bawtismo tamoꞌ nin tandaꞌ na ket say nipamawtismo na ni Juan.
26 Pinasyan tepel na ni Apolos nin nagꞌirgodtaw sa sinaguga ra nin Judio. Sin narngeꞌ raya ni Aquila tan Priscila, sinagyat raya sa bali ra tan nipapalaway ra nin maong kona a pigagawaꞌ nan Dios a kai na et nin tandaꞌ.
27 Naisip na ni Apolos a mako sa prubinsya nin Acaya. Ket saray tumutumbok kona ni Jesus itaw sa Efeso, tinulungan raya tan nanurat sara konran kapada ran mammemper itaw sa Acaya tan dinawat ra a sanꞌilyen raya si Apolos no rumateꞌ yadtaw konra. Ket sin itaw yayna anaod si Apolos, alaki a naitulong na konran saray namper kona ni Jesus banaꞌ sa kamaungan nan Dios. 28 Say ginwaꞌ na, matpel yan nikidiskusyon konran Judio sa adapan ran tutawo, ta pinatutuꞌwan na konran sarba a manꞌiyakay na mangibwat sa Masanton Kasuratan a si Jesus sya a Cristo nin nipangakoꞌ nan Dios.