Nipaꞌdeng yay Dupong ran Mammemper Itaw sa Tesalonica
17
Dinmalan sara si Pablo sa syudad nin Amfipolis tan Apolonia tan nako sara sa syudad nin Tesalonica a itaw ket main nin sinaguga ra nin Judio. 2 Bilang sa man-gawꞌen nayna nin gindat ni Pablo, naku-nako ya sa sinaguga. Ket sindo Awron Painawa sa luob nin tulon linggo, nikipapalawayan ya konran tutawodtaw. 3 Nipapalaway tan nitudoꞌ nay wana sa Masanton Kasuratan nin nipatarusan na konran tutawo a si syay Cristo ket matkap a mapadyaꞌdyaꞌ tan patyen ya, mayadiꞌ baleꞌ ket sumubliꞌ ya nin mabyay. Wana ni Pablo, “Siti si Jesus nin manꞌipatandaan ko komoyo, sya in a Cristo.” 4 Main saray Judio nin nasagyat ket nikipasaya sara konra ni Pablo. Abaw sara et a Griego nin mampangrayo konan Dios a nikipasayan lamang konra, wanin sara et a bubbayi nin ataꞌgay a pangingikit konradtaw.5 Baleꞌ maimbel saray Judio konra ni Pablo, kanyaꞌ nin dininep rasaray luku-luko nin walang-walang itaw sa palingki tan nangwaꞌ sara nin gulo sa intiron syudad. Sinrep rayay bali nan sayay tawon say ngaran na ket Jason ta rabay rasaran kalapen si Pablo tan Silas tan iyadap rasara sa dupong ran gumabali. 6 Sin kai rasara nin maꞌkit, ginuyugoy rayan inawit si Jason tan saray raruma konran mammemper konran saray upisyalis sa syudad, miꞌsa wanra nin niburya-buryaw, “Sarayti nin tutawo, puon sara nin gulo abirno nin adti, ket nirateꞌ saraynadti sa lugar tamo, 7 tan pinagtuloy nasara ni Jason sa bali ra. Sarba ra ket mansumubag sa nipataoy nan gan-gan nin Impirador tamo sa Roma ta manꞌibaritaꞌ ra a main kano nin sakalakon adiꞌ a say ngaran na ket Jesus.” 8 Nagulo a kaisipan ran saray tutawo tan saray upisyalis sa syudad sin narngeꞌ rayti. 9 Ket pinagpyansa raya si Jason tan saray kalalamoꞌ na miꞌsa rasarayna nin binulusan.
Nipaꞌdeng yay Dupong ran Mammemper Itaw sa Berea
10 Sin narateꞌ a yabi sin sain, nibakiꞌ rasara nin mammemper si Pablo tan Silas sa babali nin Berea. Sin nirateꞌ saradtaw, nako sara sa sinaguga ra nin Judio. 11 Saray Judio nin itaw sa Berea, mas mabistay pinanakem ra dyan saray itaw sa Tesalonica ta matetek sara nin mangrengeꞌ sa saritaꞌ na nin Dios, tan inawru-awro, adalen ray Masanton Kasuratan ta pigaw nin tandaen ra no tutuo a manꞌibari-baritaꞌ na ni Pablo. 12 Ket abaw sara konran sarayti nin Judio a namper, wanin sara et a abaw nin bubbayin Griego nin ataꞌgay a pangingikit konra, tan main a lamang nin lulalakin Griego a namper.
13 Baleꞌ sin natandaan ra nin Judio nin itaw sa Tesalonica a manꞌipatandaꞌ ra ni Pablo a minsahi nin nangibwat konan Dios itaw sa Berea, nako saradtaw tan sinugsog rasaran mangwaꞌ nin gulo a tutawo. 14 Sin sain, pinaapura rayan mammemper si Pablo nin mako sa pantalan. Baleꞌ pinaibatiꞌ sara si Silas tan si Timoteo. 15 Saray nangaluyon kona ni Pablo, linalamoꞌ raya angga sa syudad nin Atenas. Miꞌsa, sinmubliꞌ sarayna sa Berea nin nibibilin na ni Pablo a sumunor saran tampor kona si Silas tan Timoteo.
Nipaꞌdeng yay Dupong ran Mammemper Itaw sa Atenas
16 Ket legꞌan a mantumaꞌgan ya konra ni Silas tan Timoteo itaw sa Atenas si Pablo, naasikaso nan pinasyan kaꞌbawan nin imahin nin manraywen ra nin tutawodtaw, ket inmidap a nakem na. 17 Kanyaꞌ nin sin sain, nako ya sa sinaguga tan nikidiskusyon ya konran saray Judio tan konran saray amboꞌ nin Judio nin mangrarayo konan Dios tan inawru-awro, naku-nako ya sa plasa tan nipata-patandaan nay maipaꞌkaꞌ kona ni Jesus konran tutawo nin itaw.
18 Ket main itaw nin saray mangangakay nin pilusupya ran mantawagen nin Epicureoa tan nin grupon mantawagen nin Estoicob a dinibati raya si Pablo. Wanra, “Ani a manꞌibari-baritaꞌ nan siin a mampilabab-labab?” Wanra anamaet nin raruma et, “Mampagꞌirgo ya layi maipaꞌkaꞌ konran dios itaw sa raruma nin lulugar.” Wanti a ibaritaꞌ ra banaꞌ ta say manꞌibari-baritaꞌ na ni Pablo ket say wanan itaw sa Mabistan Patandaꞌ maipaꞌkaꞌ kona ni Jesus tan sa isusubliꞌ nin mabyay. 19 Ket anaod sinagyat raya si Pablo nin mako sa miting nin Kunsiho ran Pupilusupo itaw sa lugar a mantawagen nin Areopago. Itaw, wanra kona, “Rabay mi nin matandaan in si baꞌyon akay a manꞌiyakay mo. 20 Main in say manꞌibari-baritaꞌ mo nin sawanin mi tamoꞌ et nin narngeꞌ ket rabay mi nin matandaan a pipaꞌkaan.” 21 Wanin a wanra banaꞌ ta saray tutawodtaw sa Atenas tan wanin sara et a susanꞌili nin mampiikap itaw, say rabay-rabay ra nin gawꞌen ket si mangrengeꞌ tan mangisturya nin maipaꞌkaꞌ sa animan a baꞌyo.
22 Sin sain, inumdeng ya si Pablo sa adapan na nin Kunsiho sa Areopago tan nagꞌirgo ya a wana, “Siꞌkamon taga Atenas, maꞌkit ko a rilihyuso kamo sa sarba nin bagay. 23 Maibaritaꞌ ko a wanin banaꞌ ta sa nipagpasya-pasyar kodti sa syudad moyo, tan sa nipangikit-kikit ko sa lulugar a pangraywan moyo, main nin naꞌkit kon sayay altar nin itaw ket main nin wantin nakasurat, ‘Para Konan Dios a Kai nin Tandaꞌ.’ Ket siti nin dios a kai moyo nin katandaꞌ a manraywen moyo, kasa anaod nin raruma no kai si Dios nin manꞌipatandaan ko komoyo.
24 Sya a Dios nin namarsa nin mundo tan nin sarba nin iti. Sya a Uunuren nin mampagꞌuray itaw sa langit tan iti sa lutaꞌ, ket kai ya nin miikap sa pupaꞌdeng a ginwaꞌ nin tawo. 25 Saya et, kasan animan nin ginwaꞌ nin tawo nin matkap na banaꞌ ta sya a mampami nin inanawa tan byay, tan say sarbayna konran tutawo.c 26 Siti nin Dios, pinarsa naya yapoꞌ a nuꞌna nin tawo, miꞌsa konan siin nin saya nin tawo nangibwat sara ngaꞌmin a sarbaynan bakas nin tutawo, tan nitayak-tayak nasaradti sa babo nin lutaꞌ. Nikwa-nikwa naynan gindat nin Dios a ketegan nin piikapan ra tan say kaꞌteng nin piikap radti sa mundo. 27 Pinarsa natamo nin Dios ta pigaw nin dumugen tamoya, ket banaꞌ sa panunumog tamo kumon kona, makatandaꞌ tamoya. Say katutuꞌwan, adani ya sa barang saya kontamo a Dios. 28 Gaꞌget na a byay, kimey tan nikatawo nin barang saya kontamo. Bilang in sa wanra nin saray raruma nin turbador moyo. Wanra,
‘Sarba tamo, aꞌnak natamo nin Dios.’
29 Ket banaꞌ anaod ta aꞌnak natamo, andiꞌ tamo nin ipaꞌkaꞌ a say kapapaꞌsar na nin Dios ket bilang tamoꞌ sa imahin a gawaꞌ na nin sayan matudyoꞌ nin tawo mangibwat sa balitok o pirak o bato. 30 Sin saytaw sin panaon a saray tutawo ket kai raya et nin katandaꞌ a Dios, pinalabas na a abas nin gawaꞌ-gawaꞌ ra. Baleꞌ sawanin, man-gan-ganen nasara a sarba nin tutawo sa sarba nin lugar a gurutan rayna a pagkakasalanan ra. 31 Wanin ta main nin awron nitandaꞌ nan Dios, a sitaw si tawo nin piniliꞌ na ket sintinsyawan na liꞌ nin kasan pangipuruk-purok a sarba nin tutawo. Nipaꞌkit nayna nin Dios sa sarban tutawo a gawꞌen na in yupaꞌ sa nipamasubliꞌ na nin mabyay konan siin a tawo.”
32 Sin narngeꞌ ray wana ni Pablo a pinasubliꞌ nayan mabyay nin Dios a sayay nati ana, main saraytaw saray kinakaꞌlisan raya, tan main saraytaw anamaet saray wanra kona, “Rabay mi a mangrengeꞌ liꞌ anamanaet sa sain say manꞌibari-baritaꞌ mo.” 33 Ket nibwat yayna si Pablo. 34 Main konra nin saray nakarngeꞌ kona ni Pablo a tinumper ket nikikalamoꞌ sarayna kona. Saya konra ket si Dionisio nin myimbron Kunsiho sa Areopago, tan saya et konra ket babayi ya a say ngaran na Damaris, tan main sara et a raruma nin namper.