Kalamoꞌ ya si Timoteo sa Nipako nin Mamagsen nin Dudupong
16
Sinmunor, nako ya si Pablo tan saray kalalamoꞌ na sa babali nin Derbe, miꞌsa sa Listra. Sa Listra, main nin sayay tumutumbok itaw kona ni Jesus a say ngaran na Timoteo. Si ina na saya yan Judio a mammemper, baleꞌ si tatay na, Griego ya. 2 Mabista a nibari-baritaꞌ ran sarba ran mammemper itaw sa Listra tan sa Iconio maipaꞌkaꞌ kona ni Timoteo. 3 Rabay nayan awit-awiten ni Pablo sa keen-keen na kanyaꞌ nin nipaturiꞌ naya nin mangipaꞌkit a peteg a Judio ya. Ginwaꞌ ra in banaꞌ ta sarba ra nin Judio konan sitaw a lugar ket tandaꞌ ra nin kai ya nin tinuriꞌ ta si tatay na ket Griego ya. 4 Sa lulugar a kinaꞌ-kinaꞌ ra, nipata-patandaan ra konran mammemper nin amboꞌ nin Judioytaw say matkap nin tukiden nin nipapagketan ran saray apostoles tan saray pupangulo ran mammemper itaw sa Jerusalem.5 Ket, anaod, napagsen a pagmamatalek ran mammemper, tan nalamuꞌnan saraynan nalamuꞌnan nin inawru-awro a iti sa dudupong.
Nitungtong nasara nin Dios nin Mako sa Macedonia si Pablo
6 Ket, nako sara sa prubinsya nin Frigia tan Galacia si Pablo banaꞌ ta pinaed nasara nin Ispirito nan Dios nin ipatandaan ray minsahi na sa prubinsya nin Asia. 7 Sin nirateꞌ sara sa lugar nin Misia, rabay ray mako sa prubinsyan Bitiniaa, baleꞌ si Ispirito nan Dios a syan lamang a Ispirito nin iti kona ni Jesus ket pinaed nasara. 8 Sin wanin, nanulpot sara sa Misia nin nako sa syudad nin Troas.
9 Ket sin yabi nin itaw sara sa Troas, naꞌkit naya ni Pablo nin baraꞌmo nin taynep a sayay lalaki nin taga Macedonia, a siti ket mandawaten na kona ni Pablo a mako yadtaw konra sa Macedonia ta pigaw nin tulungan nasara. 10 Kayadiꞌ nan baraꞌmon nanaynep ni Pablo, nagpripara kamib ana nin tampor nin mako sa Macedonia banaꞌ ta mamper kami a manꞌibakiꞌ rakamidtaw nin Dios, nin ipatandaan miyay Mabistan Patandaꞌ maipaꞌkaꞌ kona ni Jesus konran tutawodtaw.
Say Pammemper na ni Lydia a Taga Filipos
11 Nangibwat sa Troas, sinmaki kamin nako sa isla nin Samotracia, tan sin sinmunor nin awro, nituloy mi a sinmaki nin nako sa syudad nin Neapolis. 12 Nangibwat sa Neapolis, linmalako kamin nako sa syudad nin Filipos a sayan impurtanti nin syudad itaw konan sitaw a parti nan prubinsyan Macedonia. Nipaꞌdeng yaytin syudad nin gubyirno nan Roma.c Ket itaw kami nin umnoy awro. 13 Sin Awron Painawa, rinmikor kami sa syudad tan nako kami sa rigrig nin ilog a sa wami ket main nin pididinep nin dumasal itaw. Main nin bubbayi nin nididinep itaw ket tinmekreꞌ tan nikiirgo kami konra. 14 Saya konran sarayti say ngaran na Lydia, a gindat nin taga babalin Tiatira. Kumirsyanti ya nin mablin abel nin kulor ubi. Saya yayna nin mangrarayo konan Dios, ket binuꞌkasan nan Uunuren a kanakman na ket inakoꞌ na a nibaritaꞌ na ni Pablo. 15 Nipabawtismo ya tan sarba ra nin kabbali na. Ket wana komi, “No tepren moyo a mampagmatalek akon peteg konan Uunuren tamo, mayi kamo kongko ta itaw kamoyna nin magtuloy sa bali ko.” Pinasyan sulit nan managyat komi kanyaꞌ nin nayi kami kona.
Say Pakapriso ra ni Pablo tan Silas
16 Sayay awro nin adap midtaw sa lugar nin pididinepan ta pigaw nin dumasal, nasnaan miyay sayay anak nin babayi a aripen ya. Siti ket nasrepan ya nin sayay ispiriton dukaꞌ ket mambyan naya nin pakababaꞌ nin mangipadles. Ket saray main nin aripen kona abaw a maꞌkitan ra mangibwat sa sain a gawaꞌ na. 17 Tinumbu-tumbok rakami a kalamoꞌ miya si Pablo tan wana nin niburya-buryaw, “Saraytin tutawo, uaripen nasara nin si Sangkataꞌgayan nin Dios. Manꞌipata-patandaꞌ rayay sayan-saya nin padalan no paꞌnoy pangingisalba nan Dios!”
18 Umnoy awro na nin ginwaꞌ a wanin ket sinumnep ya si Pablo, ket inadap naya tan wana konan ispiriton dukaꞌ, “Sa pakayadiꞌ na ni Jesu-Cristo, igan-gan ko komo, lumakwan ka kona!” Ket sin sain a lamang, linmakwan ya a ispiriton dukaꞌ.
19 Sin napipigaw ran saray main nin aripen kona a nakasawan sarayna nin kwartawan, dinakep rasara si Pablo tan Silas tan ginuyugoy rasaran niꞌras sa plasa nin iyadap konran saray mumampagꞌuray sa syudad. 20 Sin itaw sarayna, niyadap rasara konran saray upisyalis nin Romano tan pinarsawan rasara. Saray main nin aripen konan si anak a babayi ket wanra, “Judio sarayti nin tutawo ket mampangibwatan sara nin gulodti sa lugar tamo. 21 Mampangyakay sara nin kukaugalian nin kuntra sa lulayi tamo nin siꞌtamon Romano, ket kai tamo nin magwaꞌ nin akuen o tumbuken.”
22 Sin sain, saray abaw nin tutawo nin itaw ket nikiranod sarayna nin sinasakit rasara si Pablo tan Silas. Ket saray upisyalis anamaet nin Romano, linusꞌukan rasara miꞌsa rasara nin nipasanet-sanet. 23 Sin nasanet-sanet rasaraynan maong si Pablo, nipriso rasara. Ginan-gan rayay gwardya nin bantayan nasaran maong. 24 Konan siin nin gan-gan, nikwa nasaradtaw sa anggawan ana sa sarba nin silid sa priswan tan nikwa nay ayi ra sa ubot nin kayo nin nigagara nin itaw para sa sayti nin usar.
25 Sin bandan kapikngaꞌ nin yabi, dinmasal sara si Pablo tan nangansyon sara nin pangrarayo konan Dios. Ket nangrengeꞌ saray raruma nin priso. 26 Kapingmatan, rinmayon ya nin pinasyan kasaw ket nayegyeg yan maong a priswan. Naabryan ngaꞌmin a purta tan naglat a kadina ra nin sarba ran priso. 27 Nakaimata yay gwardya, ket sin naꞌkit na nin nakaabri ngaꞌmin a purta sa priswan, say wana no nakabulos sara ngaꞌmin a priso. Kanyaꞌ nin inuyos nayay ispada na ta mipati yayna. 28 Baleꞌ tinmaꞌway ya si Pablo a wana, “Andiꞌ mo nin susudyen a lalaman mo ta iti kami ngaꞌmin!”
29 Sin sain, nikidawat ya nin tyoꞌ a gwardya miꞌsa ya nin nalayo nin sinumrep sa priswan. Tinmalimukod ya sa adapan ra ni Pablo tan Silas a mampamayegpeg ya. 30 Miꞌsa nasara nin nirikor sa priswan tan tinepet na konra, “Sinyoris, ani a matkap ko nin gawꞌen ta pigaw nin maisalba ako?”
31 Ket wanra kona, “Magmatalek ka konan Uunuren a si Jesus ket maisalba ka tan wanin ra anamaet nin sarba ran kabbali mo.” 32 Ket nipatandaꞌ ra kona tan konra nin sarba ra nin kabbali na a minsahi nin nangibwat konan Catawan. 33 Konan sitaw a lamang nin udas konan sitaw a yabi, kinalap nasara nin sitin gwardya tan inuyasan nay sugat ra. Miꞌsa, nipabawtismo ya tan sarba ra nin kabbali na. 34 Niꞌras nasara si Pablo tan Silas sa bali na tan pinakan nasara. Pinasyan ririket na pati nin saray kabbali na banaꞌ ta mampagmatalek sarayna konan Dios.
35 Kabuklasan, namakiꞌ saran pulis a upisyalis nin Romano nin mako mamaritaꞌ konan gwardya a bulusan sarayna si Pablo tan Silas.
36 Niparateꞌ nayti nin gwardya konra ni Pablo a wana, “Nigan-gan ran upisyalis nin Romano a ibulos kamoyna. Kanyaꞌ nin mako kamoyna tan mititinek kamoyna.”
37 Baleꞌ wana ni Pablo, “Nipasanet-sanet rakami sa adapan ran abaw a tutawo miꞌsa rakami nin nipriso abirno nin kasan naꞌkit ran kasalanan mi! Abas in a ginwaꞌ ra lalun-laloyna ta gumabalin Romano kami anamaet! Sawanin, ilayas rakami nin paibwaten? Kai nin magwaꞌ a wanin! Saran diri a matkap nin makodti nin mamulos komi!”
38 Nibaritaꞌ ran pulis ti nin wana ni Pablo konran saray upisyalis, ket pinasya nin liꞌmo ra sin natandaan ra a gumabalin Romano sara anamaet anamain si Pablo. 39 Kanyaꞌ nin nako sara nin nikidawat nin dispinsa konra ni Pablo, miꞌsa rasarayna nin niliwaꞌ sa priswan tan dinawat-dawat ra nin lumakwan sarayna konan sitaw a syudad. 40 Kaliwaꞌ ra ni Pablo tan Silas itaw sa priswan, nako sara sa bali na ni Lydia nin kinaꞌ rasara nin binisita a mammemper. Binari-baritaan rasara nin pammaksaw nin nakem ra, miꞌsa sarayna nin nibwat konan sitaw a syudad.