Si Prublima Maipaꞌkaꞌ sa Pakatkapan nin Paturiꞌ
15
Sin sain, main nin tutawo nin rinmateꞌ itaw sa Antioquia a ibat sa Judea ket mampangyakay sara anamaet konran mammemper. Wanran sarayti konran mammemper, “Kai kamo nin maisalba no kai kamo nin paturiꞌ nin bilang sa wana nin gan-gana nin naipudir kona ni Moises.” 2 Kai sara nin nikikumpurmi si Pablo tan Bernabe sa sain nin akay ra ket nagꞌin nin maꞌmot a pididiskusyon ra. Sin wanin, saray mammemper itaw sa Antioquia, nipapasayawan ra a sara si Pablo tan si Bernabe nin kalalamoꞌ rasaray raruman mammemper ket, mako sara sa Jerusalem nin keen ra nin tandaen a disisyon ran apostoles tan saray pupangulo ran mammemper maipaꞌkaꞌ sa nididiskusyunan radtaw sa Antioquia.3 Sin sain anaod, pinaibwat nasara nin dupong ran mammemper itaw si Pablo. Itaw sara nin dinmalan sa prubinsya nin Fenicia tan Samaria, ket nibari-baritaꞌ ra konran mammemper itaw a saray abaw nin amboꞌ nin Judio ket mampagmatalek sara anamaet ana sawanin konan Dios. Ket saray mammemper, maririket saran tuloy sa sain a narngeꞌ ra.
4 Sin rinmateꞌ sara sa Jerusalem si Pablo, maririket rasara nin inakoꞌ nin dupong ran mammemper itaw tan saray pupangulo ra, tan saray raruma nin apostoles. Inisturya ra ni Pablo konra a sarba nin ginwa-ginwaꞌ nan Dios nin pakikalamoꞌ na konra. 5 Baleꞌ main nin mammemper itaw nin myimbro sara nin grupo ran Pariseo a ipasuet ra nin matkap saran paturiꞌ a mammemper a amboꞌ nin Judio tan matkap a tukiden ra a raruma et nin gugan-gan a naipudir kona ni Moises.
6 Konan siin anaod, nagmiting saray apostoles tan saray pupangulo ra nin mammemper ta nagꞌirgwan ray maipaꞌkaꞌ sa sain. 7 Naꞌteng sara nin nagꞌiirgo, ket kayadiꞌ, inumdeng ya si Pedro tan wana,
“Bubsat, pitanda-tandaꞌ moyo a sin anron panaon ana a linmabas, piniliꞌ nako nin Dios nangibwat kontamo nin ipatandaan koya konran amboꞌ nin Judio a Mabistan Patandaꞌ maipaꞌkaꞌ kona ni Jesus, ta pigaw nin mamper sara kona nin sya a Cristo.b 8 Ket, si Dios a tandaꞌ na a sarban iti sa kanakman ra nin tutawo, nipaꞌkit na a mataman nin saray amboꞌ nin Judio, akuen nasara ta nibakiꞌ nayan miikap konra a Ispirito na kapada nin nibakiꞌ naya kontamo.c 9 Konan Dios, kasan pidumawan tamon Judio tan saran amboꞌ nin Judio ta banaꞌ ta nagmatalek sara kona ni Jesus, rininggasan nasara sa kasalanan ra kapada nin pangriringgas na kontamo. 10 Sawanin, mayin a manꞌikwa moya sa sayan panunubok a Dios banaꞌ sa pammatukid moyo konran tumutumbok kona ni Jesus nin sain say gugan-gan nin pinasyan idap nin tukiden? Ni saray pupuon tamo, mataman et siꞌtamo, ket kai nin makatukid. 11 Amboꞌ nin manepeg a wanin! Tepren tamo a naisalba atamo banaꞌ sa kamaungan na ni Uunuren tamon Jesus kontamo. Ket isalba nasaran lamang anamaet nin Dios a amboꞌ nin Judio sa wanin nin padalan.”
12 Kasa gapo nin inumbat kona ni Pedro sin nayadiꞌ na nin nibaritaꞌ in, no kai nangrengeꞌ sara tana konra ni Pablo tan Bernabe sa isturya ra maipaꞌkaꞌ sa makapakaꞌngap nin pupakaꞌkitan nin pakayadiꞌ nan Dios a ginwa-ginwaꞌ na yupaꞌ konra sin mampangipata-patandaꞌ sara konran amboꞌ nin Judio.
13 Ket sin nayadiꞌ sarayna nin nagꞌirgo, si Santiago anamaet a nagꞌirgo nin wana,
“Bubsat, rengꞌen moyoy ibaritaꞌ ko komoyo. 14 Nairgo nayna komoyo ni Simon Pedro no paꞌno na nuꞌnan nipaꞌkit nin Dios a ingangaꞌdo na konran saray amboꞌ nin Judio ta pigaw nin main anamaet konra a magꞌin nin tutawo nan diri. 15 Nangyadiꞌ in anaod nin tumekep sa wanan nisurat ra nin prupita nan Dios nin mabasa sa Masanton Kasuratan. Wana,
16 ‘Mayadiꞌ in, wana nin Catawan, sumubliꞌ ako liꞌ
ta pigaw nin paꞌdengen ko anamana a nasidaꞌ nin pagꞌadian na ni David.
Pakandaen koy nasidaꞌ tan ipalasta koya
17 ta pigaw nin sarba ra nin raruma nin Judio ket dumugen rako,
ta saray amboꞌ nin Judio,
ket sinagyat kosara anamaet nin magꞌin nin tutawo ko.
18 Wanin a irgo na nin Catawan nin nipatarusan anan naꞌteng sin saytaw et.’d
19 Edet,” wanan nituloy ni Santiago, “say ibaritaꞌ ko komoyo ket, andiꞌ tamo sara nin pabyatan a amboꞌ nin Judio nin mampagmatalek konan Dios. 20 Say gawꞌen tamo ket si manurat atamo konra nin ibaritaꞌ tamo a andiꞌ sara nin mangan nin say maiyawaꞌ nin kanen a sayti ket nidaꞌton nin ipangrayo sa dios-dios, tan andiꞌ ra nin samaꞌ-samaen a lalaman ra yupaꞌ sa amboꞌ nin manepeg a pirararay. Andiꞌ sara et nin mangan nin dayaꞌ tan nin karni nin pinatin ayep a kai nin pinadayaꞌ.e 21 Wanin a dawaten tamo ta say gugan-gan nin nipagamet kona ni Moises ket naꞌteng anan tuloy a panaon nin mambasawen sa susinaguga tepeꞌ nin Awron Painawa tan manꞌiyakay sa sarba nin lugar.”
Si Bibilin konran Mammemper a Amboꞌ nin Judio
22 Ket sin sain anaod, nipapasayawan ra nin saray apostoles, saray pupangulo tan si intiron dupong ran mammemper itaw sa Jerusalem, a mamiliꞌ sara nin lulalaki sa grupo ra nin mayi konra ni Pablo tan Bernabe nin sumubliꞌ sa Antioquia. Saray napiliꞌ ra ket sara si Judas nin mantawagen et nin Barsabas tan si Silas, a saray mammemper ket ataꞌgay a pangingikit ra konran saraytin pariho. 23 Main nin surat nin nipaꞌwit ra konran sarayti a wana,
“Siꞌkami nin apostoles tan pupangulo ran mammemper iti sa Jerusalem,
Pakumustawen mi kamon amboꞌ nin Judio nin bubsat mi sa pammemper isen sa Antioquia tan sa prubinsyan Siria tan Cilicia.
24 Natandaan mi a main saray kalalamoꞌ midti nin nakodsen ket ginulo ray kaisipan moyo ta manwerweren rakamo sa manꞌiyakay ra. Kai misara nin nibakiꞌ taw nin mako mangyakay isen komoyo. 25 Banaꞌ anaod ta wanin, nagꞌiirgo kami tan nipapasayawan mi a mamiliꞌ kami nin ibakiꞌ midsen komoyo nin kalamoꞌ rasara ni mampablyen tamon si Pablo tan Bernabe. 26 Sara, manꞌisanlaꞌ ray byay ra sa pagsisirbi ra kona ni Uunuren tamon Jesu-Cristo. 27 Ket, saray ibakiꞌ midsen a si Judas tan si Silas, rupan-rupa ra liꞌ nin ibaritaꞌ a no ani a iti sa surat mi komoyo. 28 Nipaingar nan Ispirito nan Dios komi tan nipapasayawan min nagꞌiirgwan a andiꞌ mi kamoyna nin pabyatan nin panukiden et sa gugan-gan a maidap nin tukiden. Main ti tamoꞌ say impurtantin tuloy nin ipatukid mi komoyo. Sayti:
29 Andiꞌ kamo nin mangan nin animan a nidaꞌton nin ipangrayo sa dios-dios.
Wanin et, andiꞌ kamo nin mangnaꞌ nin dayaꞌ tan nin karni nin pinati nin ayep a kai nin pinadayaꞌ.
Andiꞌ kamo nin kiraray nin amboꞌ nin manepeg.
Maabig no tukiden moyoyti.
Wanin ana.”
30 Ket pinaibwat rasarayna. Sin rinmateꞌ saradtaw sa Antioquia, dininep rasaray sarba ra nin mammemper tan niparisibi raya konra a surat. 31 Sin nabasa raya, pinasyan ririket ra banaꞌ sa saytaw say bibilin konra. 32 Sara si Judas tan si Silas a sarayti ket prupita sara, pinagsen ray nakem tan pammemper ran mammemper sa anron pakiirgu-irgo ra konra. 33-34 Itaw sara yapoꞌ nin midyo naꞌteng sa Antioquia, miꞌsa sarayna nin sinmubliꞌ konran apostoles sa Jerusalem. Pinaibwat rasara nin mammemper a wanra, “Bindisyunan nakamo kumon nin Dios.”f
35 Baleꞌ nabatiꞌ sara si Pablo tan Bernabe. Sara tan abaw saray kalalamoꞌ ra, niyakay-akay tan nipapala-palaway ray minsahi nin nangibwat konan Catawan itaw sa Antioquia.
Niswiꞌ a Kinaꞌ ra ni Pablo tan Bernabe
36 Napalabas a umnoy bulan, wana ni Pablo kona ni Bernabe, “Sumubliꞌ ata tan bisitawen tasara ta kikiten tay kapapaꞌsar ra nin bubsat nin mammemper sa bubabali nin nangipata-patandaan ta nin minsahi nan Catawan.” 37 Say rabay na ni Bernabe ket kalamoꞌ raya si Juan a mantawagen et nin Marcos. 38 Baleꞌ andiꞌ ya si Pablo banaꞌ ta si Marcos, kai na nin nituloy a nikikalamoꞌ konra angga sin nayadiꞌ ray gawaꞌ ra, no kai edet, nibwat ya tan linakwanan nasarag. sin itaw sara sa Pamfilia. 39 Banaꞌ konan siin, nakapisangkinian sara si Pablo tan si Bernabe ket nisyay sara. Si Bernabe, si Marcos a kalamoꞌ na, ket sinmaki saran nako sa Cyprus. 40 Si Pablo anamaet, si Silas a kalamoꞌ na. Nibwat sara kayadiꞌ a saray mammemper ket nidasalan rasara a sapa kumon ket antabayan nasara nin Catawan. 41 Nako sara sa prubinsya nin Siria tan Cilicia tan pinatarigꞌen ray dudupong ran mammemper sa pammemper ra.