Sara si Pablo itaw sa Iconio
14
Sin itaw sara anamaet si Pablo tan Bernabe sa Iconioa, naku-nako saran lamang nin nangyakay sa sinaguga ran Judio. Ket sa mabistan pangingipapalaway ra sa minsahi nan Dios, abaw saray Judio tan amboꞌ nin Judio nin nagmatalek konan Cristo. 2 Baleꞌ saraytaw saray Judio nin kai nin mamper kona ni Jesus, sinugsog rasaray amboꞌ nin Judio nin itaw sa babali ta pigaw nin masager sara konran mammemper. 3 Ket itaw sara yapoꞌ nin midyo nin naꞌteng sa Iconio si Pablo tan si Bernabe ta matpel sara nin nangipata-patandaꞌ maipaꞌkaꞌ sa ginwaꞌ nan Dios. Ket si Dios binyan nasaran pakayadiꞌ nin makapangwaꞌ nin makapakaꞌngap a pammatutuo sa manꞌipatandaꞌ ra nin kamaungan na.4 Ket natao saray tutawodtaw sa Iconio. Saray umno ra, ayon sara konran apostoles a si Pablo tan si Bernabe; saray raruma anamaet, ayon sara konran Judio.
5 Konan siin, saray Judio tan saray amboꞌ nin Judio, a kalamoꞌ rasaray mampagꞌuray konra, nagꞌiirgwan ra a sasakiten tan patyen rasaran kudasen nin bato si Pablo tan si Bernabe. 6 Natandaan ra ni Pablo in nin plano ra kanyaꞌ nin nalayo sara nin nako sa syudad nin Listra tan Derbe tan sa kukabaraybay nin lugar sa prubinsya nin Licaonia. 7 Sa sayti nin lulugar, nipata-patandaꞌ rayay Mabistan Patandaꞌ.
Sara si Pablo itaw sa Listra tan sa Derbe
8 Sin itaw sara nin mampangipata-patandaꞌ sa Listra, main itaw nin lalaki nin lupoy nangibwat et sin niyanak ya ket kai ya gapo nin makalalako. Nakatekreꞌ ya, 9 nangrengeꞌ ya kona ni Pablo. Pinastang nayan maong ni Pablo tan naꞌkit na a mampagmatalek yayti nin tawo a mapaandaꞌ ya, 10 ket nipaksaw nay busis na a wana kona, “Umdeng ka nin matuꞌrir!” Ket tampor inumdeng ya tan linmala-lalako ya.
11 Sin naꞌkit ra nin tutawo a nagwaan na ni Pablo, wanra nin nitaꞌway sa irgo ra nin Licaonia, “Nanaoy saradti a dios tan nirupa saran tawo!” 12 Tinawag rayan Zeus si Bernabe a syay pangulo nin dios-dios ra tan tinawag raya anamaet nin Hermes si Pablo a syay ibabakiꞌ nin dios-dios ra banaꞌ ta sya a magꞌiirgo. 13 Main nin timplo nin pangraywan ra konan dios-dios ra nin si Zeus sa kaliwaꞌ tamoꞌ nin syudad. Sin sain, si padiꞌ nin mampagsirbi kona ni Zeus, nangawit ya nin bubaka tan kwintas nin buburak itaw sa purta nin timplo ta pigaw nin idaꞌton na tan saray tutawo nin ipangrayo ra konra ni Pablo.
14 Sin natandaan ran saraytin apostoles nin wanin a gawꞌen ra nin tutawo, binisang ray seket ra nin mangipaꞌkit a kai sara nin kumpurmi sa sain a gawꞌen ra. Miꞌsa sara nin nalayo nin nako sa butlay ra nin tutawo tan wanran nagꞌirgo nin maksaw, 15 “Uamigo, andiꞌ rakami nin raywen nin bilang dios! Tawo kami tamoꞌ nin kapada moyo! Nako kamidti komoyo ta pigaw nin ipatandaꞌ miyay Mabistan Patandaꞌ maipaꞌkaꞌ kona ni Jesus ket tumgen kamoynan mangrayo konran sarain a kasan magwaan nin dios-dios ket si raywen moyoyna si sibibyay a Dios. Sya a namarsa nin langit tan lutaꞌ, pati say taaw tan say sarba nin main sa sayti.b 16 Sa linmabas nin panaon, inaburuyan nakamo nin Dios a siꞌkamon amboꞌ nan tutawo ket gawꞌen moyoy bungat ana nin rabay moyo. 17 Wanin man, manꞌipatandaan na komoyo no siꞌno ya ta man-gawꞌen nay no ani a maabig para komoyo. Mambyan nakamo nin rapeg tan mumula a no marateꞌ a kuston panaon ket pabungawen na ta pigaw nin main nin kanen moyo tan ta pigaw nin maririket kamo.” 18 Baleꞌ abirno nin wanin a nibaritaꞌ ra ni Pablo, napaidap sara nin namaed konran tutawo sa pangrarayo konra.
19 Baleꞌ main nin rinmateꞌ itaw nin Judio nin ibat sa Antioquia sa prubinsya nin Pisidia tan saray raruma sa Iconio. Nasagyat rasaray tutawo nin magꞌin nin kuntra kona ni Pablo, ket kinudas-kudas raya nin bato si Pablo miꞌsa raya nin ginuruy-guroy nin nirikor itaw sa syudad nin Listra sin say wanra ket nati yayna. 20 Baleꞌ sin inaribungbungan raya nin saray tumutumbok kona ni Jesus, nibangon ya tan sinmubliꞌ ya sa syudad. Ket sin sinmunor nin awro, nako sara ni Bernabe sa syudad nin Derbe.
Sinmubliꞌ sara si Pablo sa Antioquia sa Prubinsyan Siria
21 Nipata-patandaꞌ raya ni Pablo tan Bernabe a Mabistan Patandaꞌ itaw sa Derbe ket abaw saray nasagyat ran nagꞌin nin tumutumbok kona ni Jesus. Miꞌsa sara nin sinmubliꞌ sa Listra, miꞌsa sa Iconio, angga et sa Antioquia sa prubinsyan Pisidia. 22 Pinaksaw ra a nakem ran saray tumutumbok kona ni Jesus nin itaw sa sain nin lugar tan binibilin rasara nin dumaer sara sa pammemper konan Cristo. Nibaritaꞌ ra et a matkap nin dumalan atamo sa abaw nin dyaꞌdyaꞌ baꞌyo natamo nin aburuyan nin Dios nin kipagꞌadiꞌ kona. 23 Ket sa barang saya nin dupong ra nin mammemper, nanuyoꞌ saran pupangulo si Pablo tan si Bernabe. Ket sin nidasal-dasalan rasara leleg nin nagkulasyon sara, nitalek rasaray mammemper konan Uunuren a syayna a mampagmatalkan ra.
24 Dinmalan sara sa prubinsyan Pisidia ket nirateꞌ sara si Pablo sa prubinsyan Pamfilia. 25 Ket itaw nipatandaꞌ ray minsahi na nin Dios sa babali nin Perga, miꞌsa sara nin nako sa babali nin Atalia. 26 Nangibwat itaw, sinmaki saran sinmubliꞌ ana sa Antioquia sa prubinsya nin Siria. Itaw sin saytaw ket nidasalan rasara nin saray mammemper a sapa kumon ket antabayan nasara nin Dios sa pangngawaꞌ ra nin trabaho nin nibi na konra a sawanin ket nailaꞌpos rayna.
27 Sin rinmateꞌ saraynadtaw si Pablo tan Bernabe sa Antioquia, dininep rasara ngaꞌmin a mammemper itaw, tan nibaritaꞌ ra ngaꞌmin konra a ginwa-ginwaꞌ nan Dios nin pakikalamoꞌ na konra tan say nibi nan Dios nin pagkanawanawa ta pigaw nin saray amboꞌ nin Judio ket magmatalek sara anamaet kona. 28 Ket itaw sara nin naꞌteng sa Antioquia a kalamoꞌ rasara a tumutumbok kona ni Jesus.