Piniliꞌ saran Ibakiꞌ sa Raruman Lugar si Bernabe tan si Saulo
13
Sawanin, sa dupong ran mammemper itaw sa Antioquia, main saray prupita tan mangangakay nin minsahi nan Dios, bilang si Bernabe, si Simeon a say purarag na Negro, si Lucio a taga Cirene, si Manaen a kaanak-anakan tan kalamoꞌ nan inmalaki sa palasyo na ni Gubirnador Herodes Antipas, tan si Saulo. 2 Niꞌsa, legꞌan a mampangrayo sara konan Dios ket mampagkulasyona sara, si Ispirito nan Dios wana konra, “Ipurok moyo sara si Bernabe tan Saulo para sa trabaho nin nangigagarawan ko konra.”3 Ket, sin nayadiꞌ sarayna nin nagkulasyon tan dinmasal para konra, nipababo ray gamet ra konra ni Bernabe tan Saulo, miꞌsa rasarayna nin pinaibwat nin mako para konan sitin trabaho.
Sara si Saulo itaw sa Islan Cyprus
4 Ket, sawanin, banaꞌ ta nibakiꞌ nasaran Ispirito nan Dios si Bernabe tan si Saulo, nako sarayna, itaw yapoꞌ sa Seleucia. Miꞌsa nangibwat itaw sinmaki saran nako sa isla nin Cyprus. 5 Dinmuong sara sa syudad nin Salamina tan nipata-patandaꞌ ray minsahi nin nangibwat konan Dios sa bubali nin pangraywan ran Judio konan Dios a mantawagen nin sinaguga. Kalamoꞌ rayan katulungan ra si Juan Marcos.
6 Kinaꞌ ra a sarban lugar itaw sa isla angga sin nirateꞌ sara sa babali nin Pafos. Itaw nadumog rayay sayay Judio nin maong nin magmadyik tan manꞌibaritaꞌ nan prupita nayan Dios, baleꞌ siin ket bulaꞌ. Say ngaran na Bar-Jesus. 7 Amigo nayan siti a gubirnador sa isla a say ngaran na Sergio Paulob, a saya nin intilihinti nin tawo. Siti si gubirnador, nipakayaban nasara si Bernabe tan Saulo ta rabay nan marngeꞌ a minsahi a nangibwat konan Dios. 8 Baleꞌ sitaw si magmamadyik a si Elimas (ngaran nayayti ni Bar-Jesus sa saritaꞌ nin Griego), ginwaꞌ nay magwaꞌ nan pammaed nin mamper yay gubirnador. 9 Baleꞌ sin sain, si Ispirito nan Dios, liso nayan nagꞌurayan si Saulo a mantawagen a lamang nin Pablo. Pinastang nayan maong ni Pablo a magmamadyik, 10 miꞌsa wana kona, “Siꞌka, Dimunyo ka! Kuntrawen mo a sarba nin mapteg. Napnoꞌ ka nin saor tan kadukaan! Kai mo nin mantegnan nin tursye-tursyen a katutuꞌwan maipaꞌkaꞌ konan Cristo, a mampaliwaen mon bulaꞌ-bulaꞌ! 11 Sawanin dusawen nakaynan Uunuren! Mabulag ka nin kai ka gapo yapoꞌ nin makapadiꞌrap.”
Ket tampor madedlem ana a kaꞌkitan na ni Elimas tan kai yayna gapo nin makaꞌkit ket kara-karapas yayna nin naningkap nin manabin kona. 12 Naimatunan nan gubirnador a nangyadiꞌ ket nagmatalek yayna kona ni Uunuren nin Jesus. Nakaꞌngapan nan maong a akay nin maipaꞌkaꞌ kona.
Sara si Pablo itaw sa Antioquia sa Prubinsyan Pisidia
13 Ket si Pablo tan saray kalalamoꞌ na, nibwat sara ana sa Pafos. Sinmaki sara nin nako sa syudad nin Perga sa prubinsyan Pamfilia. Itaw linakwanan nasara ni Juan Marcos tan sinmubliꞌ yayna sa Jerusalem. 14 Nangibwat sa Perga, tinmuloy sara sa Antioquia a sakop nin prubinsyan Pisidia.c Ket sin narateꞌ a Awron Painawa, nako sara nin nangrayo konan Dios sa sinagugadtaw. 15 Kayadiꞌ a main nin namasa sa Libron Gugan-gan nin nisurat na ni Moises tan sa nisurat ra nin prupita, saray pupangulo sa sinaguga, nipaibaritaꞌ ra konra ni Pablo a no main nin maibaritaꞌ ra nin makapamagsen nin pammemper ran tutawo, magwaꞌ ra a magꞌirgo. 16 Inumdeng ya si Pablo tan sininyasan nasaran mititinek a tutawo. Nagꞌirgo ya a wana,
“Siꞌkamon kapada kon Israelita tan siꞌkamon amboꞌ nin Judio nin mampangrayo konan Dios, mangrengeꞌ kamo sa ibaritaꞌ ko. 17 Si Dios nin manraywen tamo nin siꞌtamon Israelita, piniliꞌ nasaray pupuon tamo tan pinaabaw nasara sin itaw sara nin mampiikap sa amboꞌ ran diri nin nasyon a sa Egipto. Ket, sa alaki nin pakayadiꞌ na, nilakwan nasaradtaw. 18 Ket sa luob nin magꞌaꞌpat a puloꞌ a taon, inanusan nay pigagawaꞌ rad sin itaw sara sa lugar a kasan tawo.e 19 Nipatalo na konran pupuon tamo a pito ra nin nunasyon sa Canaan tan nipaikon nan lamang in nin nunasyon konra. 20 Nangyadiꞌ in ngaꞌmin sa luob nin aꞌpat a yasot tan limampuloꞌ a taon.f
Mayadiꞌ a wanin, namiliꞌ yayna a Dios nin saray mangipangulo konra a say tawag konra ket mangngukom, angga sin panaon na ni Prupita Samuel.g 21 Sin sain a panaon, dinawat ra konan Dios a byan nasara nin adiꞌ a magꞌuray konra ket banaꞌ ta wanin, piniliꞌ naya nin Dios si Saulo nin anak na ni Cis a puri na ni Benjamin. Adiꞌ raya si Saulo sa luob nin aꞌpat a puloꞌ a taon.h 22 Ket sin ginlat nayan adiꞌ nin Dios, nisili naya si David. Siti a wana nin Dios maipaꞌkaꞌ kona ni David, ‘Siti si David nin anak na ni Jesse, tawo yayti nin makapaririket kongko. Gawꞌen na a sarba nin rabay ko.’ ”i 23 Nituloy na ni Pedro, “Ket saya konran puri na ni Adiꞌ nin David a nibakiꞌ na nin Dios nin mangisalba kontamo nin puri na ni Israel nin bilang sa nipangakoꞌ na. Sya, si Jesus. 24 Baꞌyo na nin nitaranaꞌ a gawaꞌ na ni Jesus, si Juan, nipata-patandaꞌ na konran sarba radtaw sa Israel a pagbabawian raynay kukasalanan ra, miꞌsa sara nin pabawtismo.j 25 Ket sin dandani nayna nin ilaꞌpos ni Juan a gawaꞌ na wana konran tutawo, ‘Manꞌipaꞌkaꞌ moyo angangko a siꞌko yaynaytaw si mantagaꞌnan moyon rumateꞌ. Kai, amboꞌ ako! Baleꞌ main liꞌ nin rumateꞌ nin makapangyayadiꞌ yan tuloy nin adayoꞌ dyan siꞌko, ket ni magsirbin manglat nin sandalyas na, kai ako gapo nin maikanaꞌ.’k ”
26 Wana anamana ni Pablo, “Bubsat, siꞌkamo nin Judio nin kapada ko nin puri na ni Abraham tan siꞌkamo nin amboꞌ nin Judio nin mampangrayo konan Dios, manꞌipatandaan nayan pari-pariho kontamo nin Dios a Mabistan Patandaꞌ no paꞌno atamo nin maisalba. 27 Saray tutawodtaw sa Jerusalem tan saray pupangulo ra, kai ra nin naalilbiꞌ a si Jesus a Mangingisalba, tan kai ra nin tinarusan a nipadles ran saray prupita a sayti ket binasa-basa konra tepeꞌ nin Awron Painawa no mangrayo sara konan Dios. Ket sa nipangipapati ra kona ni Jesus, natukid rayti a nipadles ran prupita. 28 Mataman no kai ra nin napatutuꞌwan a main nin kasalanan na nin nepeg nan pakadusawan nin patiti, dinawat ra et kona ni Gubirnador Pilato a ipapati naya.l 29 Sin natukid ana ngaꞌmin a sarba nin nipadles nin gawꞌen kona ni Jesus, nikayupaꞌ rayay bangkay na sa kudos nin nangipasakan ra kona miꞌsa raya nin nitabon. 30 Baleꞌ si Dios, pinasubliꞌ naya nin mabyay. 31 Ket sin sinmubliꞌ yayna nin mabyay, sa luob nin umnoy awro, nipaꞌki-paꞌkit ya konran saraytaw saray nayi kona sin saytaw sa Jerusalem nin nangibwat sa Galilea.m Sawanin, saray nakaꞌki-kaꞌkit kona, manꞌibari-baritaꞌ ray maipaꞌkaꞌ kona konran Judio.
32 Ket siꞌkami anamaet, iti kami komoyo nin ipatandaan miya a Mabistan Patandaꞌ maipaꞌkaꞌ sa ginwaꞌ na nin Dios sawanin a syay nipangakoꞌ na konran saray pupuon tamo. 33 Tinukid nay pangakoꞌ na kontamon pupuri ra sin pinasubliꞌ naya nin mabyay si Jesus. Sain a pipaꞌkaan nin sitaw si wana nin Dios maipaꞌkaꞌ kona ni Jesus a naisurat sa Ikarwan Kanta a wana,
‘Siꞌka, anak kata.
Oꞌ, sawanin, pinaꞌget koy nipanuyoꞌ ko komo.’n
34 Main ti et e nin naisurat nin maipaꞌkaꞌ sa pammasubliꞌ nan mabyay nin Dios kona ni Jesus tan say kai na nin pangiyaburoy a maumok a lalaman na ni Jesus sa nanabunan. Wana,
‘Ibi ko komoyo nin sigurado a masagrado nin bubagay nin nipangakoꞌ ko kona ni David.’o
35 Main yayti et e nin nipadles na ni David nin maipaꞌkaꞌ kona ni Jesus, a wana,
‘Kai mo nin iyaburoy a maumok yay lalaman nan ibabakiꞌ mon tutuo komo.’p ”
36 Nituloy na ni Pablo, “Bubsat, amboꞌ anaod nin si Adiꞌ nin David a mantukuyen isen ta tandaꞌ tamo a sin nayadiꞌ nayna nin ginwaꞌ ni Adiꞌ nin David a nipagwaꞌ nan Dios kona, nati yayna. Nitabon raya sa nanabunan konran pupuon na ket naumok a lalaman na. 37 Baleꞌ si Jesus, a pinasubliꞌ naya nin mabyay nin Dios, kai ya nin naumok a lalaman na.
38 Rengꞌen moyo! Wanti a manꞌipatandaꞌ mi komoyo: Yupaꞌ sa ginwaꞌ na ni Jesus, mapirdunayna a kasalanan. 39 Anaod, banaꞌ sa ginwaꞌ na ni Jesus, nikwintan kai nin nagkasalanan a siꞌnuman nin mampagmatalek kona. Sain nin kapapaꞌsar ket kai nin mapamain nin panunumbok tamo nin nagsikabarang nin gugan-gan a naipudir kona ni Moises. 40 Anaod, pakatalad kamo a kai nin mangyadiꞌ komoyoyti nin naisurat a nipadles ra sin saytaw nin prupita a wana,
41 ‘Kiten moyoy gawꞌen ko, siꞌkamon kai nin mangimbabaet sa Saritaꞌ na nin Dios!
Makaꞌngap kamo ket baleꞌ mati kamo
ta kai moyo nin tepren in nin gawꞌen ko sawanin legꞌan a mabyay kamo et
mataman no main nin mangibari-baritaꞌ komoyo.’q ”
42 Sawanin, sin manlumiwaꞌ sarayna sa sinaguga ran Judio si Pablo tan si Bernabe, dinawat ran tutawo konra a sumubliꞌ sara liꞌ no sumunor a Awron Painawa ta pigaw nin magꞌirgo sara liꞌ anamana maipaꞌkaꞌ sa saytaw sa nibari-baritaꞌ ra. 43 Ket, sin mampibwat saraynay tutawo, abaw saray Judio tan amboꞌ nin Judio nin naꞌwit ana nin peteg sa rilihyon ran Judio a naayat nin kikalamoꞌ konra ni Pablo tan si Bernabe. Ket sarayti, binari-baritaan rasara ni Pablo tan Bernabe nin ituluy-tuloy ra a magmatalek sa kamaungan nan Dios.
44 Anaod, sin sumunor a Awron Painawa, dandani sarba ran tutawodtaw sa babali nin Antioquia ket nako nin nangrengeꞌ sa minsahi a nangibwat konan Catawan. 45 Baleꞌ, sin naꞌkit rasara nin Judio a abaw nin tutawo nin nako nangrengeꞌ, pinasya nin imbel ra ket kinuntra-kuntra ray nibaritaꞌ na ni Pablo tan nagꞌirgu-irgo saran paninidaꞌ kona. 46 Wanin man, matpel sara lawas nin magꞌirgo si Pablo tan Bernabe ket wanra,
“Komoyo nin kapada kon Judio nin matkap nin muꞌnan ipatandaꞌ ti say a minsahi a nangibwat konan Dios. Ket banaꞌ ta andiꞌ kamo nin akuen ti, mansintinsyawan moyoy lalaman moyon diri nin kai nin maikanaꞌ nin mangaꞌmor nin anggan-angga nin byay a iti konan Dios. Sawanin anaod, konran amboꞌ nin Judio mi ana nin ipatandaꞌ 47 ta siti nin bibilin nan Dios ket para ya anamaet komi. Wana,
‘Nigagara kata nin magꞌin nin paꞌsar palaway para konran amboꞌ nin Judio
ta ibakiꞌ kata nin ikaꞌ mo nin ipatandaꞌ konran sarban tutawo a maisalba kosara.’r ”
48 Sin narngeꞌ ra in nin saray amboꞌ nin Judio, pinasyan ririket ra tan nikisalamatan ray minsahi a nangibwat konan Dios. Ket sarba ran saraytaw saray nitalaga nan Dios nin magkamain nin anggan-angga nin byay a iti kona, nagmatalek sara kona.
49 Ket naitayak a minsahi nin nangibwat konan Catawan sa intiro nan sitaw a lugar. 50 Baleꞌ sinugsog rasara nin Judio a impurtantin bubbayi nin mampangrayo konan Dios tan saray lulalaki nin ataꞌgay a pangingikit konra, a masager sara konra ni Pablo tan Bernabe ket mapalakwan rasaradtaw. 51 Sin wanin, pinagpag ra ni Pablo tan Bernabe a taꞌpok sa ayis ra nin mangipaꞌkit a kai nasaraytaw nin inakoꞌ nin Dios a tutawo, miꞌsa sara nin nibwat nin nako sa babali nin Iconio. 52 Sara anamaet a tumutumbok kona ni Jesus itaw sa Antioquia, napnoꞌ sara nin ririket tan peteg a nagꞌurayan nasara nin Ispirito nan Dios.