Abaw a Dalanan ran Pakapaidap nin saray Mammemper
12
Sin sain nin panaon, manduksaꞌ-duksaen nasara ni Adiꞌ Herodesa a raruma konran mammemper. 2 Nipaputulan naya nin ulo si Santiago a busat na ni Juan. 3 Sin naꞌkit na ni Herodes a mayi saran nakem a Judio sa ginwaꞌ na, nipadakep naya et si Pedro. (Nangyadiꞌ ti sin pista ran Judio nin mantawagen nin Pistan Pangangan nin Tinapay a Kasan Pammakbo.) 4 Sin nadakep yayna si Pedro, nipapriso naya. Nipagwardyawan naya sa aꞌpat a grupo nin sundaloꞌ nin sippaꞌpat a barang grupo tan misusubray sara. Niplano na ni Herodes nin sintinsyawan naya liꞌ si Pedro sa adapan ra nin Judio no mayadiꞌ a pista nin mantawagen nin Pistan Nipanglabasb. 5 Kanyaꞌ nin itaw yan napriso anaod si Pedro. Ket sarba ran mammemper, wanin ana a suet nin kadadasal ra para kona!Niliwaꞌ ya si Pedro sa Priswan
6 Sin yabi nin sintinsyawan nayayna ni Herodes si Pedro, naꞌlek ya si Pedro sa butlay ra nin rway gwardya a naikadina ya konra. Sakalako sara et a mampaggwardya sa purta nan kwarto nan priswan. 7 Kapingmatan, main ana nin anghil nan Dios itaw sa luob nin silid nan priswan tan pinasya nin palaway. Tinapok naya si Pedro ta pigaw nin pukawen naya. Wana kona, “Mibangon ka! Madaliꞌ ka!” Sin sain a lamang ket naglat a kadina sa gamet na ni Pedro. 8 Wana et nin anghil kona, “Mibuknol ka tan misandalyas ka.” Ginwaꞌ na in ni Pedro. Wana anamanaet nin anghil, “Mikapa ka tan mayi ka kongko.” 9 Tinmumbok yan linumwaꞌ sa silda si Pedro. Kai na nin tandaꞌ nin mampangyadiꞌ ti nin peteg yupaꞌ sa tulong nan anghil ta manꞌisipen nan mampanaynep ya tamoꞌ. 10 Linabasan rayay primiron pwisto ran gwardya, miꞌsa si ikarwa ket nirateꞌ sara sa purtan pasak a sadaꞌ na a siti mamunta ya sa syudad. Niabri yan bukod a purta ket linumwaꞌ sara. Sin itaw saraynan manlumalako sa sayay dalan sa syudad, bigraꞌ yaynan nakasa a anghil ket bukod nayna ni Pedro.
11 Naimunawan ya si Pedro ket napipigaw na a amboꞌ tamoꞌ nin taynep a sarba. Wana, “Sigurado ako nin nibakiꞌ nayan Dios a anghil na ta pigaw nin isalba nako sa gamet na ni Herodes tan sa kadukaan a rabay ran mangyadiꞌ kongko nin saray raruman Judio.”
12 Sin napipigaw nayna a nangyadiꞌ, nako ya sa bali na ni Maria nin ina na ni Juan a mantawagen et nin Marcosc. Sin sain, abaw sara a iti konan sitin bali a mammemper nin mandumasal. 13 Tinmuktok ya si Pedro sa purta ket nako ya nin kinmikit a sayay alilaꞌ nin babayi a say ngaran na Roda. 14 Naalilbiꞌ nay busis na ni Pedro ket banaꞌ sa alakin ririket na, kai naya nin inabryan a purta no kai edet, nalayo ya nin sinmubliꞌ sa bali tan nibaritaꞌ nan itaw ya sa rikor si Pedro. 15 Ket, “Mangkumalawakaw ka!” wanra kona. Baleꞌ nipaseꞌseꞌ nan si Pedro nin pageꞌ a itaw kanyaꞌ nin wanra baleꞌ kona, “Si anghil nin gwardya na angangko in.”
16 Si Pedro anamaet, tuktok yayna nin tuktok sa purta. Nakaꞌngap saran maong sin inabryan raya ta si Pedro nin pageꞌ. 17 Sininyasan nasaran mititinek ket inisturya na konra no paꞌno naya nin niliwaꞌ sa priswan nin Catawan. Nibibilin na konra, “Ibaritaꞌ moyoyti anamaet kona ni Santiagod tan konran raruman bubsat nin mammemper.” Miꞌsa, nibwat yadtaw tan nako ya sa raruma nin lugar.
18 Kabuklasan, nagulo saran maong a gwardya maipaꞌkaꞌ kona ni Pedro, no ani kadiꞌ a nangyadiꞌ kona. 19 Nipakrap naya ni Herodes baleꞌ kai raya nin nadumog. Inimbistiga nasara a gwardya miꞌsa nasara nin nipapati. Miꞌsa, nibwat yadtaw sa Judea tan nako ya sa Cesarea, ket itaw yayna.
Si Dios, Ginlat nayay Makapaed a si Adiꞌ Herodes
20 Sin sain, masager yan tuloy si Adiꞌ Herodes konran tutawo sa syudad nin Tiro tan Sidon. Ket say ginwaꞌ ra, nipapasaya sara nin nako kona. Inamigo raya yapoꞌ baleꞌ a ingkargado sa palasyo a si Blasto tan nipalalamoꞌ sara nin mako nin kituno konan Adiꞌ. Ginwaꞌ ra in banaꞌ ta sa lugar nin sakop nin pagꞌadian na nin mangibwat a ikabyay ra.
21 Nangitandaꞌ yan awro nin piaadap ra a adiꞌ. Sin narateꞌ ya in nin awro, nisulot yan seket na bilang sayay adiꞌ tan tinmekreꞌ ya sa truno na miꞌsa ya nin nagdiskurso konran tutawo. 22 Rinayo rayan tutawo ket wanra nin nitaꞌwa-taꞌway, “Amboꞌ in nin irgo nin sayay tawo tamoꞌ no kai nin sayay dios.” 23 Konan sitaw nin lamang, pinagmasakit naya nin anghil nan Dios si Herodes banaꞌ ta say lalaman nan diri a nipasirayo na konran tutawo, amboꞌ yay Dios. Inurer a lalaman na ket siin anay nipati na.e
24 Ana edet, sin sain, say minsahi nin nangibwat konan Dios, naitayak anan naitayak, ket inmabaw saraynan inmabaw a mammemper.
25 Ket sin nagwaꞌ raynay nipagwaꞌ itaw konra, sinmubliꞌ sarayna si Saulo tan si Bernabe sa Antioquia nin ibat sa Jerusalem, tan niꞌras raya si Juan a mantawagen et nin Marcos.