4 Anaod, inisturya na ni Pedro konra a sarban nangyadiꞌ nangibwat sa taranaꞌ. 5 Wana, “Niꞌsa nin mandumasal ako sin itaw ako sa Joppa, main nin naꞌkit ko a baraꞌmo ako nin nanaynep. Main nin baraꞌmon alakin ules nin naitaker a aꞌpat nin duyo na a mangkumayupaꞌ nin nangibwat sa langit ket dinumpaꞌ ya sa dani ko. 6 Kinikit koyan maong ket naꞌkit kon konan sitaw nin baraꞌmon ules ket sarbaynan klasi nin uayep bilang saray atap nin uayep, saray kumayam tan saray manuk-manok. 7 Kapingmatan, main nin narngeꞌ ko nin busis a wana, ‘Pedro, mangmati ka ta pigaw nin main nin kunaen mo.’

8 Baleꞌ wangko nin niꞌbat, ‘Andyak, Uunuren, ta kai ko et gapo nin nasariꞌ a nangnaꞌ nin uayep a ikwinta nin nikasamaꞌ ta maiyawaꞌ komi nin Judio.’

9 Ket wana anamanaet nin busis nin ibat sa langit, ‘Andiꞌ mo nin ibaritaꞌ nin nikasamaꞌ tan maiyawaꞌ nin kanen a wana nin Dios ket maꞌkan.’

10 Nibaritaꞌ in nin nitlo miꞌsa sitaw si baraꞌmo nin ules ket nipataꞌgay yayna nin sinmubliꞌ sa langit. 11 Ket sin sain a lamang nin udas, main nin tulo ran lulalaki nin rinmateꞌ itaw sa mampagtuluyan mi. Nibakiꞌ sara kongko nin nangibwat sara sa Cesarea. 12 Si Ispirito nan Dios, nibaritaꞌ na kongko a andiꞌ ko nin asikaswen a amboꞌ saran Judio. Ket, sarayti nin aꞌnem nin bubsat sa pammemper a tagadtaw sa Joppa, nayi sara kongko. Ket sin itaw kami ana sa Cesarea, nako kami sa bali na ni Cornelio. 13 Ket nibaritaꞌ na ni Cornelio komi a main nin anghil nin nakodtaw kona sa bali na tan wana kano kona, ‘Mamakiꞌ kadtaw sa Joppa nin keen raya nin kayaban si Simon a mantawagen et nin Pedro. 14 Ipatandaan na komo no paꞌno nin siꞌka tan sarba ra sa pammali mo ket maisalba sara.’ Wanin kanoy wanan anghil kona.

15 Ket, sin itaw kami anaod sa bali na ni Cornelio, sin tinmaranaꞌ akon magꞌirgo konran itaw, si Ispirito nan Dios nako ya nin nagꞌuray konra nin kapadan sin primiro nan nako nin nagꞌuray kontamo. 16 Sin sain, napanemtem koy wana intaw ni Uunuren tamon Jesus, ‘Si Juan, say ipamawtismo na ranom, baleꞌ siꞌkamo, mabawtismwan kamo liꞌ nin Ispirito nan Dios.’ ^a 17 Ket, main paran kapangyadian kon kuntrawen ya a Dios? Anaod, nibakiꞌ nayan Dios nin miikap a Ispirito na konran amboꞌ nin Judio, kapadan nipamakiꞌ nan siti kontamo sin nagmatalek atamo kona ni Uunuren a si Jesu-Cristo.”

18 Sin narngeꞌ ra in nin wana ni Pedro, nitgen raynay paninita ra kona, tan rinayo rayayna edet a Dios. Wanra, “No wanin, binyan nasara anamaet anamain nin Dios nin pagkanawanawa nin magbabawiꞌ sa kukasalanan ra a amboꞌ nin Judio ta pigaw nin magkamain sara nin byay a iti kona.”

19 Saray mammemper, nitatayak sara anaod banaꞌ sa nikaduksa-duksaꞌ ra nin tinmaranaꞌ sin pinati ya si Esteban, ket nipata-patandaꞌ ray maipaꞌkaꞌ kona ni Jesus baleꞌ konran kapada ra tamoꞌ nin Judio. Main nin nirateꞌ anggan sa prubinsya nin Fenicia, sa isla nin Cyprus tan sa syudad nin Antioquia. ^b. 20 Wanin man, main saray mammemper nin taga Cyprus tan taga Cirene nin nirateꞌ itaw sa Antioquia, nin nipatandaan ra konran amboꞌ nin Judio a maipaꞌkaꞌ kona ni Uunuren nin Jesus. 21 Sa nipangipata-patandaꞌ ra, iti a pakayadiꞌ nan Dios konra ket abaw saray nagmatalek tan tinmulok konan Uunuren.

22 Say maipaꞌkaꞌ sa sayti ket nakarateꞌ sa pakatandaꞌ nan dupong ran mammemper itaw sa Jerusalem, ket nibakiꞌ rayadtaw sa Antioquia si Bernabe. 23 Sin rinmateꞌ yadtaw si Bernabe, naꞌkit na a alakin mabistan man-gawꞌen nan Dios konran saraytaw nin tutawo, ket maririket ya nin tuloy. Ket binibilin nasara ngaꞌmin nin dumaer sara sa katutulok ra konan Uunuren nin napasaya a nakem ra. 24 Siti si Bernabe, maong yan tawo, peteg a mampagꞌurayan nayan Ispirito nan Dios tan magsen a pagmamatalek na konan Dios. Kanyaꞌ nin abaw saray namper kona nin Uunuren.

25 Kaaram nako ya sa Tarso si Bernabe ta pigaw nin keen naya nin tikapen si Saulo. 26 Ket sin nadumog naya, niꞌras nayadtaw sa Antioquia. Sayay taon a nikikala-kalamoꞌ sara konran mammemper kona ni Jesus itaw, tan nangyakay sara nin abaw nin tutawo. Itaw sa Antioquia sara nin nuꞌnan tinawag nin “Cristiano” a tumutumbok konan Cristo.

27 Sin sain nin panaon, main saraytaw saray prupita nan Dios nin rinmateꞌ itaw sa Antioquia a ibat sara sa Jerusalem. 28 Saya ya konra si Agabo.^d Sin niꞌsa a nididinep saray mammemper, inumdeng ya si Agabo sa adapan ra tan banaꞌ sa nipaninreg nan Ispirito nan Dios, nipadles na a magkamain nin bitil sa intiron sakop nin pagꞌurayan nan Roma. Ket natukid in anaod sin si Claudio a Impirador sa Roma.^c 29 Konan siin, nipapasaya saray tumutumbok kona ni Jesus itaw sa Antioquia a mamaꞌwit saran tulong konran saray mumaidap itaw sa Judea, ket, say barang saya nami nin tulong sigon sa pakababaꞌ na nin mami. 30 Ginwaꞌ ra anaod in miꞌsa ra nin nipaꞌwit a tulong ra konra ni Bernabe tan Saulo nin iparisibi ra konran pupangulo ran mammemper itaw.