4 Pinastang naya ni Cornelio a anghil a pinasyan liꞌmo na tan wana, “Ani a rabay moyo, Ser?”

Ket wana nin anghil kona, “Napagustwan yay Dios sa dudasal mo tan sa panunulong mo, ket tubaleen naka. 5 Ket sawanin anaod, mamakiꞌ kadtaw sa Joppa a keen raya nin kayaban a sayay tawon say ngaran na Simon baleꞌ say tawag kona ket Pedro. 6 Mangkipagtuloy ya konan sayay tawo a say ngaran na anamaet ket Simon a mangangwaꞌ ya nin bubagay nin mangusar yan katat nin ayep. Si bali na itaw ya sa rigrig nin baybay.”

7 Sin nibwat yaynay anghil, tinawag nasaran tampor ni Cornelio a rwa ran katulong na tan saya konran saray sundaloꞌ na. Mangrarayo yayti anamaet nin sundaloꞌ konan Dios. 8 Nibaritaꞌ na ni Cornelio a sarba konra miꞌsa nasara nin nibakiꞌ sa Joppa.

9 Sin sinmunor nin awro, sin saraytaw saray nibakiꞌ na ni Cornelio ket adani sarayna sa Joppa, si Pedro anamaet, nuliꞌ ya sa patag nin atep nan bali nin kamiꞌnan na ta pigaw nin dumasal ya. Sin sain, magꞌugtiawro ana. 10 Mabitil yayna si Pedro, ket legꞌan a manꞌisadyaꞌ ray kanen na, baraꞌmo yan nanaynep. 11 Sa pakaꞌkit na ket niabri a langit tan main nin baraꞌmon alakin ules nin naitaker a aꞌpat nin duyo na nin mangkumayupaꞌ itaw sa kamiꞌnan na. 12 Itaw konan sitaw si baraꞌmon ules ket sarba anan klasi nin uayep bilang saray atap nin uayep, saray kumayam tan saray manuk-manok. 13 Kapingmatan main nin narngeꞌ nan busis ni Pedro a wana, “Pedro, mangmati ka ta pigaw nin main nin kunaen mo.”

14 Baleꞌ niꞌbat na ni Pedro, “Andiꞌ ako, Uunuren, ta kai ko et gapo nin nasariꞌ a nangnaꞌ nin ayep a ikwinta nin nikasamaꞌ ta maiyawaꞌ komi nin Judio.”

15 Ket wana anamanaet nin busis kona, “Andiꞌ mo nin ibaritaꞌ nin nikasamaꞌ tan maiyawaꞌ nin kanen a wana nin Dios ket maꞌkan.” 16 Nitlo in nin nibaritaꞌ kona ni Pedro miꞌsa sitaw si baraꞌmo nin ules ket naipataꞌgay yayna nin namunta sa langit.

17 Ket mintras nin mampakaꞌngapan na ni Pedro a pipaꞌkaan nin sain nin nipaꞌkit nan Dios kona, saraytaw saray nibakiꞌ na ni Cornelio, nadumog rayaynay bali na ni Simon. Itaw saran nakaꞌdeng sa adapan nin purta. 18 Kinmutana sara tan tinepet ra no main nin mampagtuloy itaw nin say ngaran na ket Simon tan mantawagen yan lamang nin Pedro.

19 Sin sain anaod a mintras nin manꞌadalen na ni Pedro a pipaꞌkaan nin say nipaꞌkit nan Dios kona, si Ispirito nan Dios wana kona, “Main nin tulo ray lulalaki nin mampaningkap komo. 20 Manaoy kan tampor tan andiꞌ ka nin masuknad nin mayi konra ta nakem ko a nako saradti.” 21 Ket nanaoy ya si Pedro tan wana konra, “Siꞌko a mantikapen moyo. Ani a gagara moyo kongko?”

22 Wanran niꞌbat kona, “Nibakiꞌ rakamidti nin sayay tawo a say ngaran na ket Cornelio. Upisyal ya nin sundaloꞌ. Matunong ya nin tawo tan manraywen nayay Dios, tan ataꞌgay a pangingikit ran sarba ran Judio kona. Si sayay anghil nan Dios, nibaritaꞌ na kona a sagyaten nakan makodtaw sa bali na ta pigaw nin mangrengeꞌ ya sa ibaritaꞌ mo kona.” 23 Pinaluob nasara ni Pedro tan pinakaꞌlek nasarayna yapoꞌ itaw konan siin nin yabi.

Sin kabubuklas, nayi ya konra, pati saray umno ran mammemper nin taga Joppa. 24 Sin sinmunor nin awro sarayna nin nakarateꞌ sa Cesarea. Itaw saraynan mantumaꞌgan sa bali na si Cornelio tan saray kukanayon tan uamigo na nin sinagyat na. 25 Sin rinmateꞌ saradtaw si Pedro, sinnaꞌ naya ni Cornelio tan nanalimukod yan linmukob sa adapan na nin pinagalangan naya. 26 Baleꞌ pinaꞌdeng naya ni Pedro tan wana kona, “Umdeng kamo. Tawo ako tamoꞌ anamaet a lamang nin kapada moyo.”

27 Mintras nin mampagꞌirgo sara, sinumrep sara sa bali a itaw, naꞌkit na ni Pedro nin abaw saray tutawo 28 ket wana konra, “Tandaꞌ moyon peteg a maiyawaꞌ komi nin Judio a mako sa bali moyo o kilimug-limog komoyo nin amboꞌ nin Judio. Baleꞌ, si Dios, nipatarusan na kongko a matkap a andiꞌ koya nin ikwinta a siꞌnuman nin kai naya nin maakoꞌ nin Dios o kai ya nin maibagay nin kilimug-limugan. 29 Edet, sin nipaꞌkaꞌ rako, kai ako gapo nin masuknad nin nakodti. Ket sawanin edet, ibaritaꞌ moyo pa kongko no ambaleꞌ a nipaꞌkaꞌ rako.”

30 Ket wana ni Cornelio, “Ikaꞌpat nin awro sawanin a napalabas sin wantin magꞌalas tres sa yabina a mandumasal ako, ket kapingmatan ana a main nin lalakin nakaꞌdeng sa adapan ko nin makapulag a seket na. 31 Wana kongko, ‘Cornelio, narngeꞌ na nin Dios a dudasal mo tan kai na nin malingwanan a panunulong mo konran mumaidap. 32 Ket sawanin mamakiꞌ kadtaw sa Joppa a keen raya nin kayaban a sayay tawon say ngaran na ket Simon tan mantawagen ya et nin Pedro. Mangkipagtuloy ya konan sayay tawo a say ngaran na Simon anamaet a mangangwaꞌ ya nin bubagay nin mangusar yan katat nin ayep. Si bali na ket itaw ya sa rigrig nin baybay.’ 33 Anaod, namakiꞌ akon tampor nin nakodtaw komoyo ket kisalamat akon alaki ta nayi kamodti. Ket sawanin anaod, iti kami ngaꞌmin nin nadinep sa adapan nan Dios, nin mantumaꞌgan ta pigaw nin mangrengeꞌ kami sa nigan-gan nan ipatarusan mo komi.”

34 Sin sain, nagꞌirgo ya si Pedro a wana, “Sawanin mataros koynan peteg a kasan pinilian konan Dios.^a 35 Akuen naya nin Dios a siꞌnuman nin mampangunor kona tan mampangwaꞌ nin mapteg mataman no ani a nasyon na. 36 Maipaꞌkaꞌ sa minsahi a nibi na komi nin Israelita, narngeꞌ moyoyna in. Komi naya nin nipatandaꞌ a Mabistan Patandaꞌ maipaꞌkaꞌ sa pakikituno na konran tutawo yupaꞌ kona ni Jesu-Cristo a syay Uunuren nin sarba. 37 Tandaꞌ moyoytaw say nangyadiꞌ sa kamiꞌnan ran Judio. Tinmaranaꞌ itaw sa Galilea kayadiꞌ na nin nipata-patandaꞌ ni Juan a maipaꞌkaꞌ sa pammawtismo na. 38 Tandaꞌ moyo a si Dios ket nitalaga naya para sa sayay gawaꞌ si Jesus a taga Nazaret ket nibi naya a Ispirito na tan say pakayadiꞌ kona. Naku-nako ya sa nagsikabarang nin lugar nangwaꞌ nin maabig para konran tutawo tan pinalimpyo nasara a sarba ran mampangirangepen nan Dimunyo. Nagwa-nagwaꞌ na in ni Jesus ta si Dios ket kaantabay naya. 39 Siꞌkami nin apostoles na ni Jesus, matistigusan mi ngaꞌmin a maipaꞌkaꞌ sa sarban ginwa-ginwaꞌ na sa lugar mi nin Judio, sa nagsikabarang nin prubinsya, wanin et sa syudad nin Jerusalem.

Matistigusan mi et nin pinati raya nin nipasak sa kudos. 40 Baleꞌ siti si Jesus, sin ikatlon awro, pinasubliꞌ nayan mabyay nin Dios, tan nipaꞌkit ya, 41 baleꞌ amboꞌ sa sarba nin tawo no kai edet, komi tamoꞌ nin piniliꞌ nayna nin gindat nin Dios nin makaimaton sa mangya-mangyadiꞌ kona. Siꞌkami a makatistigos ta nikidungu-dungo kami et nin nangan tan ninom kona kayadiꞌ na nin sinmubliꞌ nin mabyay. 42 Ket ginan-gan nakami nin ipatandaan miya konran tutawo a Mabistan Patandaꞌ maipaꞌkaꞌ kona tan ibari-baritaꞌ mi a sya a nikwa nan Dios nin manintinsya liꞌ kontamo ngaꞌmin, mabyay man o nati ana. 43 Syaytaw si wanra nin sarba ra nin prupita a si siꞌnuman nin magmatalek kona, pirdunawen nan Dios a kasalanan na yupaꞌ tamoꞌ sa ginwaꞌ na.”

44 Sawanin, mintras a mampagꞌirgo ya si Pedro, si Ispirito nan Dios nako ya nin nagꞌuray sa barang saya nin mampangrengeꞌ sa manꞌibaritaꞌ na. 45 Ket saraytaw saray mammemper nin Judio nin kalalamoꞌ na ni Pedro, nakaꞌngap saran maong ta nibi naya anamaet nin sibubulos nin Dios a Ispirito na konran amboꞌ nin Judio. 46 Wanin ta narngeꞌ rasaray amboꞌ nin Judio nin mampagꞌirgo nin susaritaꞌ a kai ra nin tandaꞌ tan manraywen rayan tuloy a Dios.

Sin sain anaod, wana ni Pedro, 47 “Nibakiꞌ naya anamaet a Ispirito nan Dios konran sarayti nin kapadan nipamakiꞌ na kontamo. Banaꞌ ta wanin kasan sukat nin makapaed a bawtismwan sara.” 48 Konan siin, nipabawtismwan nasara ni Pedro sa ngaran na ni Jesu-Cristo. Sin nayadiꞌ sarayna nin binawtismwan, dinawat ra kona ni Pedro a itaw ya yapoꞌ nin umnoy awro.